Timoti piiligu daana 6

1Girunsi zaa ba tira ba yidaandima jilima ga, niso zaa ba da nye daama togsi yabee ŋmeŋsi Naawunni, koo ti wusigu maa. 2Ba seesi n mari yidaandimseesi n paara Yeesu zu la, ba da feera maa, a kpali ba zaa n paara la zu, ba ki lee n tira ba jilima, ama ba tumina nene ga, a kpali bo, ba yidaandimseesi n dira ba tono la paarini Yeesu zu, ka Naawunni mi kpabira ba. Moo nufu wusira girunsi ba niŋina n ŋa. 3Ama niso zaa n cherigira ti wusigu ŋa, ka bi sagi n paara ti duuma Yeesu Kristu yamonsi, a ni seema Naawunni n kpabira la zu, 4o pooya, ka bi baŋŋi seŋ, ka amore diibu miina u, a ti pubeerim nyisigira, niriba ba zabira taaba, ka tuura taaba, ka bi tira yeride, 5ka yi dira amore. N ŋa dima ka yam, ka bi kpabira yamonsi, ka tulimi n feera maa, ka ba paara Naawun zu, ba ni loobi bindaandima. 6Ka nivu paara Naawun zu, a ni pupeelim, o mari tono ga. 7Nyaasi, ti bi mari bunso zaa ta durinye puwa, ka ki lee n naa bunso zaa yi durinye puwa, 8a zu, ka ti mari bindira ni bimpinna, lala sagsi ti. 9Ama seesi n kpabira ba loobi bindaandima tira Sitaana daama o ti ba niŋi yabeeri, a maa takpab n gbaa ba, ka ba kpabira yadamta seesi n bi veela. Ya ŋama ŋa n saamina ba yela zaa. 10Nyaasi, ligiri kpabirisim taasira yabeeri zaa, ka a kpali n ŋa zu, seesi tee n zagsi Yeesu yeride niŋinisim, ka nye nam ga. 11Ama nyi wune Naawun nira, da niŋina yabeeri ŋa, ka moo nufu niŋina yasuma, a petira Naawunni, ka niŋina Yeesu yeride, ka kpabira e taaba, ka mari kenyiti, ka ba boin. 12Moo nufu tumina ti tumsuma n niŋi Yeesu yeride niŋinisim, a ti nye nyevuriso n ka baasigu la, seema Naawunni n daa n ti i noori, a yi jemanso e gba n daa n wusi nivudamta, ni e paara Yeesu zu la. 13M ya n yeli i ni bunso, ka Naawunni so n naa nyevuri tira bunso zaa, a ni Yeesu so n daa n togsi yamonsi yi gomina Ponti Pailati saani la niŋini m dansiyasi, ni m yetira i ni, 14e yi paara seema ba n daa n wusi i la, niriba ba da togsi yabeeri ŋmeŋsira i, ti duuma Yeesu Kristu o pa ti ta, 15a yi jemanso Naawunni n zaali la. O ko n niŋi Naawunni, ka mari daama ga, ka niŋi nadima zaa naaba, a ni zudaandima zaa zudaana, 16ka o koluŋko ki tee n kpi. Niso zaa na bi nye u, ka ki tee n nye u, a kpali bo, o bani seela n mari paaligu ga, ka niriba zaa ki tee n paa nisaaniŋi. Wune n nyaara jilima ga, ka o daama ka baasigu. 17Nyaasi, ka yeli durinye puu bindaandima, ni ba da kpalimina, ka da feera maa, ba bini maa ni tee n moligi ba, ama Naawunni ko, a kpali bo, ba bini maa ni tee n saami, ama Naawunni tira ti bunso zaa, ti ti wumina meesim. 18Yeli ba, ni ba niŋina yasuma ga, ka tira seesi n bi mari. 19N ŋa ba ni di tono ga soosa zu, a nye nyevuriso n ka baasigu. 20Timoti, nyaasira yaseesi Naawunni n ti i la nene, ka da togsira jagajaga, ka da wumina yaseesi n jebi, a kpali bo, niseesi n yetira, ni a niŋini yamtiri bi togsira yamonsi, ka a ti ba seesi loobi n zagsi Yeesu yeride niŋinisim. Naawunni ti ya barika.

will be added

X\