1 Timoti, mani Pool puusira i. E niŋini maa m bii gbagba, a kpali ti yeride niŋinisim puwa. Naawunni, so n moligira ti, a ni Yeesu Kristu n niŋi ti tama niŋina la ti ma loobi n niŋi Yeesu Kristu tumu. Ti ba Naawunni ni ti duuma Yeesu Kristu ti i barika, a ni niŋgbirimaasim, ka zora i nimbaa. 3 Seema ni daa n wara Masidoona paaligu la, ka yeli i, e zi Afesu tiŋŋa puu la, na zi nisaaniŋi, a yetira niseesi n cherigi ti wusigu maa, ba da wusira n ŋa, 4 ka da lee n paara sulima zu, a ni ba yaadima dogim yadamta zu. Yela ŋa marini amore diibu, ka bi ti niriba niŋina Naawunni yeride. 5 Ama yaseesi ti n wusira maa ti niriba mari ferisuma, a kpabira taaba, ka niŋina Naawunni yeride. 6 Ama seesi n cherigi ti wusigu maa bi niŋina yasuma ŋa, ka togsira jagajaga. 7 Halli ka ba kpabira ba wusira Naawun zaaligusi, ba bi baŋŋi yaseesi ba n yetira daamatiri maa gba gbina. 8 Ti baŋiya maa, ka niso n paara Naawun zaaligusi maa, a mari tono, a yi o saani. 9 Ama jemanso Naawunni n daa n naa zaaligusi maa wusi niriba, pa nivusuma zu n na, ama zaaligusaaminiba, koo seesi n bi kpabira Naawun yela, koo nivubeeri, koo tuuriba, koo niseesi n kuura ba badima a ni ba madima, a ni nivu zaa, 10 koo disaaminiba, koo seesi n kpabira ba taaba pogiba, koo niseesi n zu n gbaagira niriba, koo jiri ŋmaariba, koo yomsiriba, koo niso zaa n bi paara wusiguso n veela. 11 Lala n na ti duuma Naawunni baarusuma yetira ka o ti ma wusira a. 12 M kpeesira ti duuma Yeesu Kristu, so n tira ma daama, a kpali bo, o daa n niŋi ma yeride, a nyisi ma m tumina u. 13 Halli ka m daa n togsi yabeeri ŋmeŋsira u, ka daa n namsira o nyaaŋpaariba ga, ka tuura u, o zo ma nimbaa. A kpali bo, a yi jemanso ni daa n niŋina yabeeri maa, m daa n bi baŋŋi yamonsi, ka bi niŋina u yeride. 14 Ka o ti ma barika ga, ma pa ti niŋina u yeride, ka kpabira Naawunni ni m taaba, seema seesi n paara Yeesu Kristu zu n niŋina. 15 Nyaasi, a niŋini yamonsi, ka o veela niriba ba deegira a nene, ni Yeesu Kristu daa n tani durinye ŋa puwa, o ti moligi yabeniŋiniba. Halli ka mani n daa n niŋina yabeeri gaari niriba zaa, 16 Naawunni daa n zo ma nimbaa, a kpali bo, m niŋi n na, Yeesu Kristu, so n mari kenyiti ga la nye daama naag o kenyiti maa wusira niseesi n ya n niŋi u yeride, a nye nyevuriso n ka baasigu la. 17 Cheli ba kpeesira Naawunni, ka tira u jilima, saŋa ni saŋa zaa. O ko n niŋi Naawunni, ka ki tee n kpi. Nivu zaa ki tee n nye u, ka o naalim maa mi ka baasigu. Yamonsi n na. 18 M bii Timoti, seema Naawun chaamesi n daa n togsira e yela, m gba ya n yeli i, e paara ba yela maa zu, a yi tumina yasuma, 19 ka da zagsira yeride niŋinisim, ka da niŋi yaseesi di n tiri i. Niseesi daa n niŋina yabeseesi n tiri ba, ka a niŋinisim maa ti ba zagsira yeride niŋinisim. 20 Ba bayi n niŋi Hameniya ni Alisaanda, ka ma naa ba ti Sitaana, o darigi ba tuba, ba ti bamsi yam, a da tuura Naawunni.
