Piita piiligu daana 2

1A zu, ya da lee n niŋina yabeeri zaa, halli taaba yomsigu, koo jiri ŋmaabu, koo pubeerim, koo tuubu. 2Ama a maa seema bileesi yi n kpabira bisiri nyisiminisim, ya gba ya kpabira Naawun yela, ya ti loobi n niŋi siriya nye moligirisim. 3A kpali bo, ya baŋŋi maa, ti duuma Kristu n veela. 4Halli Naawunni daa n nyisi u, ka tira u jilima, ba zagsi u, so n mari nyevuri la. Ama ya wune ya paara o zu, 5a ni ya nyevuripaali, ya loobi n niŋi maa diso Naawunni n be, Yeesu Kristu o ti ya tumina Naawunni nene, 6a maa seema ba n daa n sebi n digili, a yi Naawun buku puwa, a yeli, Ya nyaasi. Mani Naawunni nyisini kugitintaa, so n mari jilima ga, ka ya n naag u digili, a yi Jiruusilim tiŋŋa puwa. Ka so zaa n niŋina u yeride ki niŋi u yeride putoom. 7A zu, ya seesi n niŋina wune Yeesu Kristu yeride la tira u jilima. Ama seesi n bi niŋina u yeride, o niŋini maa, Kugso dimeeriba n nyisi n basi la pa loobini kuga maa zaa zudaana. 8Koo, O niŋini maa kugitintaa, so niriba n ŋmeera ba noba, ka liira. Bunso zu ba n ŋmeera ba noba maa n ŋa, ba bi paara Naawun yela zu, seema Naawunni n daa n zaali ba. 9Ama ya wune, Naawunni daa n nyisi ya, ya ti tumina u, ka niŋi o niriba, a wusira so zaa o yela, seema a n veela, a ni seema o n daa n mari ya yi ligu niŋi, a gaari paaliguso o n tira nene ga la. 10Saŋa la ya daa n bi niŋi Naawun niriba, ama pimpariŋa ya pa niŋini. Saŋa la Naawunni daa n na bi zo ya nimbaa, ama pimpariŋa o pa zo ya nimbaa. 11M taaba, ti niŋini maa saamba, a yi durinye ŋa puwa, a zu, m suusira ya ni, ya da niŋina yabeseesi nisaaldima n kpabira, a kpali bo, yela maa tira niriba siisi, a da nye moligirisim. 12Ka ya ba baligusi puwa, o tiriya ya yi niŋina yasuma ko, a kpali bo, halli ka ba togsi yabeeri ŋmeŋsi ya yaniŋisa, ba n di n loobi n baŋŋi maa, ya yaniŋisa maa n veela, ka kpeesi Naawunni, a yi jemanso o n di n di so zaa seriya. 13Ya nyaasi, a kpali ti duuma zu, ya wumina durinye nadima noya, halli Aroom naaba, so n niŋi durinye nadima zaa kpeema, 14koo gomina dima, seesi naaba maa yi n tumina ba ti darigi yabeniŋiniba tuba, koo, a kpeesi seesi n niŋina yasuma. 15A kpali bo, Naawunni kpabira ya yi niŋina yasuma, zolisi ba da nye daama naa ba zolim togsi yabeeri ŋmeŋsi ya. 16Ya niŋi aniya bani maa seesi n bi niŋi girunsi, ka da naa ya daama maa sogi n niŋina yabeeri, ama ya tumina Naawunni, a maa ya niŋini o girunsi, 17ka tira niriba zaa jilima, ka kpabira ya taaba Yeesu nyaaŋpaariba, ka zora Naawunni dabeem, ka tira Aroom naaba jilima. 18Tumtuminiba, ya yi wumina ya yidaandima noya, ka tira ba jilima ga, halli ka ba ba boin, ka tira ya jilima, koo, a namsira ya. 19A kpali bo, ka nira kpabira Naawunni, ka ba namsira u putoom, ka o mari kenyiti niŋina yasuma, lala petira Naawunni. 20Ya nyaasi. Ka nira niŋi yabeeri, ka ba feebira u, ka o mari kenyiti, a yi o feebirisim maa niŋi, o bi niŋi yuuri duubu. Ama ka nira niŋina yasuma, ka ba namsira u, ka o mari kenyiti, a yi o nam maa niŋi, lala petira Naawunni. 21Ka Naawunni nyisi ya ni, ya ti niŋina n ŋa, a kpali bo, Kristu daa n nye nam, a ti moligi ya, ka o yaniŋisa maa wusira ya seema n veela ya niŋina. 22Kristu n daa n ba durinye ŋa puwa, o daa n bi niŋi yabee zaa, koo, a ŋma jiri zaa. 23Ba n daa n tuura u, o bi yeli seŋ. Ba n daa n namsira u, o bi dee ba dintiri, ama o daa n mari tama Naawunni so n dira seriya nene la saani. 24Ba n daa n kpa u tabi daa, o kpi la, ti yabeeri tubiri darigirisim n na, ti da lee n niŋina yabeeri, ama yasuma ko. O gbinni n ŋa, o nam maa zu, ti nyeni moligirisim. 25Ya daa n niŋini maa peseesi n borigi, ama pimpariŋa ya pa pori n ti paara so n nyaasira ya, ka guuna ya siisi la zu.

will be added

X\