1 Ya nye seema ti ba Naawunni n kpabira ti, a boona ti o biisi. Yamonsi n na, ti niŋini o biisi. Ama durinye dima bi baŋŋi ti, a kpali ba n daa n bi baŋŋi u zu. 2 M bikpabiriba, ti pa niŋini Naawun biisi, ka na bi baŋŋi seema ti n di n loobi. Ama ti baŋiya maa, ka Yeesu pa lee n ta, ti ni loobi seema o n be, a kpali ti ni nye seema zaa o n be. 3 Ka so zaa n mari tama maa, Yeesu ni ti o loobi n ŋa, o yi kpabirini yasuma, seema Yeesu gba n kpabira. 4 Ya nyaasi, so zaa n niŋina yabeeri saamina Naawun zaaligusi. A kpali bo, yabeeri zaa niŋini zaaligusi maa saaminisim. 5 Ya baŋiya maa, Yeesu daa n tani, o ti nyisi niriba yabeeri basi, ka ŋu wune bi niŋi yabee zaa. 6 A zu, so zaa n paara o zu bi niŋina yabeeri, ama seesi n niŋina yabeeri na bi nye u, koo, a baŋŋi u. 7 M biisi, ya da ti so zaa yomsi ya. So zaa n niŋina yasuma niŋi nivusuŋŋu, a maa seema Yeesu n niŋi la. 8 Ama so zaa n niŋina yabeeri niŋini Sitaana toori, a kpali bo, a yi bunso zaa piiligu Sitaana daa n niŋina yabeeri. A zu n na Naawun bii Yeesu daa n ta, o ti kari Sitaana yabeeri zaa basi. 9 So zaa n loobi n niŋi Naawun bii bi niŋina yabeeri, a kpali Naawun da ba o niŋi, ka o ki tee n niŋi yabeeri, a kpali o niŋini Naawun bii la zu. 10 N ŋa n na ti baŋŋi Naawun biisi, a ni Sitaana biisi. So zaa n bi niŋina yasuma, koo, a bi kpabira o taaba, o bi niŋi Naawun toori. 11 Ya nyaasi. Seema ya n daa n wumi, a yi piiligu la n ŋa, ni ti kpabira taaba, 12 ka da ba maa Keen, so n daa n ku o sunzo kusu zaa la. O daa n niŋini Sitaana toori, ka niŋina yabeeri, ka o sunzo mi niŋina yasuma. Lala zu n na o daa n ku u la. 13 A zu, m taaba, ka durinye niriba chisira ya yela, ya da ti a ku ya noori. 14 Ya nyaasi, a kpali ti n kpabira taaba, ti baŋiya maa, ti yini kum puwa, a paa nyevuri puwa, ama so n bi kpabira o taaba na bani kum puwa. 15 So zaa n chisira o taaba niŋini kuura, ka ya baŋŋi maa, seesi zaa n kuura la na bi paa nyevuriso n ka baasigu la puwa. 16 Ka ti baŋŋi seema niriba kpabirisim n be, a kpali seema Yeesu n daa n kpi, o ti moligi ti. A zu, o veela ti gba n niŋi siriya kpi, a ti moligi ti taaba. 17 Ama ka so zaa n niŋi bindaana, ka nye o todaana n ba nam puwa, ka bi moligi u, o ki tee n yeli, ni o kpabira Naawunni. 18 A zu, m biisi, ya da naa yetigu ko kpabira niriba, ama ya niŋina yasuma pupeelimtiri, a kpabira ba. 19 N ŋa n na ti ni baŋŋi maa, ti paara yamonsi la zu. Halli ka ti feri feera wusira maa, ti liya, yela ŋa wusira maa, ti niŋini Naawun toori. A kpali bo, Naawunni mari daama gaari ti feri feera maa, ka o baŋŋi bunso zaa. 21 A zu, m bikpabiriba, ka ti feri feera bi damtira ti, ti marini dabilim, a yi Naawun saani, 22 ka o tira ti bunso zaa ti n suusira u, a kpali bo, ti paara o zaaligusi zu, ka ti yaniŋisa petira u. 23 O zaaligu maa n ŋa, ni ti niŋina o bii Yeesu Kristu yeride, ka lee n kpabira taaba, seema o n daa n yeli ti la. 24 Seesi zaa n paara o zaaligusi maa zu paarini o zu, ka o ba ba saani, ka o sii maa o n ti ti la ti ti baŋŋi maa, o ba ti saani.
