Korinti piiligu daana 9

1Ya nyaasi, m marini daama m niŋi bunso ni kpabira, ka m niŋini ti duuma Yeesu tumu, ka mi daa n nye u, ka tumso ni daa n tumina ti duuma maa daa n ti ya gba loobi n tumina u. 2Halli ka seesi n yetira, ni m bi niŋi tumusi maa yindaana, a yi ya wune saani m niŋiya, ka seema ya n niŋina maa n ti niriba baŋŋi maa, m niŋini ti duuma maa tumu. 3Ka seesi n kpabira ba dira ma seriya, m yeli ba, 4M mari daama m dira, ka ŋuura. 5M mari daama m di n naa poga, o paa ma chaŋina, seema tumuseesi n che maa n niŋina, a ni ti duuma Yeesu sunzoba, a ni Piita. 6Ka seema ba n niŋina, m ni Baanaba mi mari daama ti n di n zagsi ti tuma, a kpali Naawun tuma maa zu. 7Ya nyaasi, soojisi zaa bi tumina putoom, ba yi yoora ba ni ligiri. Koo, seesi n butira bini yi dirini a wala. Koo, seesi n kpagira buŋkobiri ŋuura a bisim. 8M yelini n ŋa, pa a kpali nisaaldima daama zu, ama ti Naawun zaaligusi daama zu. 9O niŋini seema kusu zaa Musa n daa n sebi n digili Naawun buku niŋi, ni ka nagidaasi n buura chi, ba da le a noya. O bi niŋi maa Naawun baga ba nagidaasi ko niŋi, 10ama ti zu n na, Naawunni daa n yeli n ŋa, ni niso n koora, a ni niso n cheesira, ba zaa mari tama ba n di n nye bindira maa. 11Tirima n daa n wusira ya Naawun yela, a zu, ka ti daa n di dee bini yi ya saani, lala veela. 12Ya tee n tira seesi, a kpali ba tuma zu, o veela ya mi niŋi siriya, a naa n ti ti gaari ba, a kpali ti tuma maa zu. Halli ka ti yeli n ŋa, ti na bi yeli ya, ni ya naa n tira ti, ka ki yeli, a kpali bo, ka ti nyaara nam ga n so ti n deegira ligiri, ka niso o zagsi Yeesu baarusuma la. 13Ama niseesi n tumina Naawun dii maa puwa yi nyaara ba bindira yi dii maa puwa, ka buŋkobkuuriba maa mi yi nyaara ba buŋkobiri torim. 14Lala n na ti duuma daa n yeli, ni o veela seesi n wusira o baarusuma nyaara ba bini yi ba wusigu maa niŋi. 15Halli ka m di n tee n nyaara bini, a yi m wusigu maa niŋi, m na bi yeli ba niŋi ma lala, ka bi sebi n yetira ya, ni ya naa n tira ma. M sufu niŋi, ka m pa ti kpi, ka so zaa na bi ti m da lee n mari daama yeli n ŋa, lala veela. 16Ya nyaasi, ka m di zagsi Yeesu baarusuma wusigu maa, m di n nye nam ga. A zu, m wusira a maa, m ki tee n yeli, ni a kpali ni niŋi nivusuŋŋu zu ma wusira a. 17Koo, ka wusigu maa di niŋi m gbagba tuma, m di n di a tono, ama a niŋini ti duuma tuma, o ti ma tumina. 18Ama m tono n ŋa, m wusira Yeesu baarusuma, ka bi deegira a ligiri, ama m mari daama m di n deegira a ligiri. 19Halli m bi niŋi niso zaa giruŋŋu, m kpabira m tumina niriba zaa maa giruŋŋu, a ti ba nivudamta ba deegira Yeesu yela. 20A zu, ni ba Juusi dima saani, m yi niŋini maa Juusi dima n niŋina, a ti ba loobi n deegira Yeesu yela. Lala n na, ka m ba niseesi yi n paara zaaligudamta zu la saani, halli ka zaaligusi maa bi mari tono yi ma wune saani, m paara ba zaaligusi maa zu, a ti ba loobi n deegira Yeesu yela. 21Koo, ka ma ba niseesi n bi paara Juusi dima zaaligusi maa zu la saani, m yi loobi ba ni, a ti ba loobi n deegira Yeesu yela. ?ama bi niŋi maa m bi paara Naawun zaaligusi zu, ama m paarini Yeesu zaaligusi zu. 22Koo, ka m ba niseesi na n bi dee Yeesu yela nene la saani, m yi loobi ba ni, a ti ba dee Yeesu yela nene ga. Lala n na, seesi zaa saani ni be, m yi loobi ba ni, a ti nye daama zaa ti ba seesi nye moligirisim. 23Ya nyaasi, Yeesu baarusuma la zu ma niŋina yela ŋa, m ni ba zaa ti wumi a meesim. 24Ya lee n nyaasi, ka niriba n cheegira, a kpabira ba ti di taaba, nivuluŋko ko ni tee n di. Ya gba ya cheegira lala, a ti di. 25Niso zaa n kpabira o chee n di o taaba la yi moo nufu bamsira nene, a ni nam, o ti di ba zaa, a nye o laada n niŋi vaari zupiligu maa. O laada vaari zupiligu maa ki yuu, ama ti laada ti n ya n nye maa ka baasigu. 26Lala n na, m bi cheegira jagajaga, koo, m bi moora jagajaga. 27Halli ka m tumina Naawunni, a wusira nivudamta, m yi namsira m niŋa, o da zagsira bunso ni kpabira, m da koŋŋi m laada.

will be added

X\