1 M taaba, ni daa n ba ya saani wusira ya Naawun yela maa, m daa n bi naa durinye yam yela, koo yatogitintaasi wusira ya. 2 A kpali bo, m daa n bi kpabira m wusi ya yela zaa, ka pa Yeesu Kristu yela, a ni seema ba n daa n kpa u tabi daa la ko. 3 A jemani maa m daa n ka kpeeŋu, ka m sufu damtira ma, a kpali dabeem zu. 4 Ka seema ni daa n wusira ya maa bi niŋi maa seema nisaaldima yi n wusira yam, ama Naawunni daa n naag o sii ni daama wusi ya, 5 ya niŋina Naawun daama yeride, ka da niŋina nisaaldima yam yeride. 6 Ama seesi n dee Naawun yela di nene la, ti wusira ba yam. Yam maa bi niŋi nisaaldima yam, koo nadima yam, a kpali nadima ni kpi, a baasi. 7 Yam maa ti n wusira maa niŋini Naawun yam, ka nisaaldima bi baŋŋi a. A niŋini yaseesi kusu zaa Naawunni n daa n zaali, poin ka o maali durinye la, seema o n di n niŋi n moligi ti, ka tira ti barika. 8 Ka durinye nadima bi baŋŋi a, a koo, ka ba di baŋŋi a, ba di bi naa ti duuma kpeeŋu daana kpa n tabi daa la o kpi. 9 Yela ŋa n na ba daa n sebi n digili Naawun buku puwa, a yeli Nisaala zaa na bi nye, koo, a wumi, koo, a fe o feri o sufu niŋi, seema Naawunni n ya n naa barika ti seesi n kpabira u. 10 Ama pimpariŋa o sii naag a wusi ti. Naawun sii maa ni tee n niŋi n ŋa, a kpali bo, o baŋŋi bunso zaa, halli Naawun yela zaa. 11 Ya nyaasi, so zaa bi baŋŋi o todaana feri, ama o gbagba siya. Lala n na Naawun sii ko baŋŋi Naawun feri, 12 ka Naawunni naag o sii maa ti ti. O bi naa durinye sii ti ti, o naani o gbagba sii ti ti, ti ti baŋŋi yaseesi o n tira ti. 13 Ti n wusira yela maa, ti bi naa nisaaldima yam wusira a, ama Naawun sii wusi ti seema ti ni tee n wusi seesi n mari Naawun siya. 14 Niso n bi mari Naawun sii maa ki tee n dee Naawun sii yela, koo, a baŋŋi a gbina, a kpali bo, Naawun sii ko n wusira a gbina, a zu, a niŋini maa zoltiri yi nira maa saani. 15 Ama niso n mari Naawun sii maa ni tee n baŋŋi yela maa zaa gbina, ka so n bi mari la ki tee n baŋŋi niso n mari la yela, 16 a kpali bo, so zaa ki tee n baŋŋi ti duuma feri, ka ki tee n wusi u, ama ti wune feri feera niŋini maa Yeesu feri.
