Korinti piiligu daana 14

1Ya niŋi aniya kpabira taaba, ka mi niŋi aniya kpabi daamaso n ti niriba wusira maa Naawun chaamesi, a ni daamaseesi zaa Naawun sii n tira maa. 2Ama so zaa n togsira yatogseesi o n bi wumina la, o bi togsi n tira nisaaldima, Naawunni n na o togsi n tira. A kpali bo, o sii yetira yaseesi o n bi baŋŋi, ka so zaa bi wumina. 3Ama so n wusira maa Naawun chaame, nisaaldima n na o togsi n tira, a ti moligira ba, ka duusira ba zuuri, ka dibira ba. 4Lala n na, so n togsira yatogseesi o n bi wumina la moligira o ko, ka so n wusira maa Naawun chaame la moligira o taaba chaachi dima. 5M kpabira ya zaa ya togsira yatogseesi ya n bi wumina la, ama ka ya wusira maa Naawun chaamesi, lala n so. A kpali bo, so n wusira maa Naawun chaamesi la mari tono gaari so n togsira yatogseesi o n bi wumina la, ama o nyeni niso n wusira a gbina, a ti moligira chaachi dima maa. 6M taaba, ka m pa ta ya saani, ka togsira yatogseesi ni bi wumina la, ka bi wusi ya maa Naawun chaamesi, koo, a wusi ya baŋinisim, m ni moligi ya je. 7Ya nyaasi, ka so n ŋmeera jirigoo, koo bunso, ka o bi kumina nene, wula n na ba ni niŋi n baŋŋi yiimso o n ŋmeera maa? 8Koo, ka sooja bi pemsira kabilli nene, wula n na soojisi maa zaa ya n niŋi n baŋŋi maa, toowa jemani paaya? 9Lala n na, ka ya bi togsira nene, wula n na ba ni niŋi n baŋŋi bunso ya n yetira maa? Ya togsirini putoom. 10A yi durinye ŋa puwa, yatogasi zooya, ka a zaa mari gbina. 11Ama ka m bi wumina yatogso niso n togsira, m ni nu ni niŋi maa saamba, a yi taaba saani. 12M baŋiya ya n kpabira daamaseesi Naawun sii n tira la ga. A zu, ya niŋi aniya moligira ya taaba chaachi dima nene. 13A la zu, ka niso togsira yatogseesi o n bi wumina la, cheli o suusi Naawunni o mi ti u daama o wusi o yetigu maa gbina. 14A kpali bo, ka m togsira Naawun saani, ka togsira yatogseesi ni bi wumina, m sii ko n togsira maa, ka m sufu bi niŋina seŋ. 15A zu, m ni naa m sii togsira Naawun saani, ka lee n naa m sufu togsira o saani. Koo, a naa m sii yiimi yiima tira u, ka lee n naa m sufu yiimi yiima tira u. 16A kpali bo, ka e kpeesira Naawunni, a ni e sii ko, ka yindaana bi baŋŋi e kpeesigu maa gbinni, wula n na o ya n niŋi n sagi, Aami? 17Halli ka e kpeesira Naawunni nene, e bi moligira nira maa. 18Ya nyaasi, m kpeesira Naawunni, ni m togsira yatogseesi ni bi wumina la gaari ya zaa. 19Ama, a yi chaachi puwa, ka m togsi yatoga biisi anu, a wusi ba, ba wumi, o so ni togsi yatoga biisi tusa piiya, ka nivu zaa bi wumina m yatoga maa gbina. 20M taaba, ya da feera feri maa biisi, ya feera maa nivukara. Ka ya da niŋina yabeeri, a maa bileesi n bi niŋina yabeeri la. 21Ya nyaasi, kusu zaa ba daa n sebi n digili yi Naawun buku puwa, ni ti duuma yeli, ni halli ka o tumi niseesi n togsira saamba yatogasi, ba ti wusira niriba ŋa, ba ki deeg o yela. 22A zu ti baŋŋi maa, yatogseesi niriba n bi wumina la bi wusira niseesi n niŋina Yeesu yeride, ama niseesi n ka yeride la. Lala n na, Naawun chaame yatoga la gba bi wusira niseesi n ka yeride la, ama niseesi n niŋina la. 23A zu, ka ya chaachi dima zaa laŋsi, ka ya zaa togsira yatogseesi ya n bi wumina la, ka seesi n bi baŋŋi ya yela, koo, seesi n bi niŋina Yeesu yeride ta niŋi, ba ni yeli, ni ya kpeerini yinyaari. 24Ama ka ya zaa togsira maa Naawun chaamesi, ka ba ti kpe, ya zaa ni wusi ba yamonsi, ka ba sufusi saami, a kpali ba yabeeri maa zu. 25Ba feriseesi ba n feera maa ni yi paaligu, ka ba gba tiŋŋa, a kpeesira Naawunni, ni yamonsi n na, Naawunni ba ya puwa. 26A zu, m taaba, ya yi ti laŋsi, o daga niso o yiimi yiimini, yindaana o wusira wusigu, yindaana o togsira maa Naawun chaame, yindaana o togsira yatogso o n bi wumina la, yindaana o wusira yatoga maa gbina. Ya cheli ba niŋina a zaa, a ti moligira taaba. 27A zu, ya cheli niseesi n kpabira ba togsira yatogseesi ba n bi wumina a gbina la, ba niŋi bayi, koo bata ko, a togsira, ka tira taaba, ka yindaana o wusira a gbina. 28Ama ka niso zaa ka niŋi di n tee n wusi a gbina maa, ba da togsira n ŋa, a yi chaachi maa puwa, ama ba sufusi niŋi, a tira Naawunni. 29Niseesi n togsira maa Naawun chaamesi la, ba niriba bayi, koo bata, ba nyisigi n togsira, ka ya seesi n che maa ya feera a gbina. 30Ama ka so n togsira n ŋa, ka Naawunni ti niso n zi n wumina maa bunso o n di n yeli, so n togsira maa o cheli. 31Lala n na, ya zaa ni nye daama togsi n wusira maa Naawun chaamesi liŋaliŋa, ya zaa ya bamsira, ka nyaara zuuri duusigu. 32A kpali bo, ka niso togsira maa Naawun chaame, o gbagba mari daama o cheli togsigu maa, 33a kpali Naawunni bi kpabira vu duubu, ama boin. Ya lee n nyaasi pogiba yela. Ya yi ti laŋsi chaachi puwa, ya ti ba zi surim, a tira jilima, seema ba n niŋina, a yi chaachisi zaa puwa, a ni seema Juusi dima zaaligusi la n yeli. 35Ama ka ba kpabira ba boosi bunso zaa, ba boosira ba siriba yiri puwa. A kpali bo, ka pogiba togsira chaachi puwa, o marini vi. 36Ya lee n nyaasi. Pa yarima n daa n piili n wusira Naawun yela. Koo, pa ya ko n na a paa. 37Ama ka ya so zaa feera maa, o niŋini Naawun chaame, koo, o marini Naawun sii daamasi, o baŋŋi maa, ti duuma n ti ma sebi yaseesi ni sebi n ŋa. 38Ama ka niso zaa bi deeg a, ya gba ya da wumina o saani. 39A la zu, m taaba, ya niŋi aniya kpabira daamaso n ti niriba wusira maa Naawun chaamesi, ka da kari niriba yi yatogseesi ba n bi wumina maa togsigu. 40Ka yaso zaa ya n niŋina maa, ya niŋina a nene, a ni a soori.

will be added

X\