TITE 2

1Nè né è bè géa, i ɓaa, i ndó de nyan ke uwe made nan se ngarankum nyan-ndó ke maje nè nga. 2Ede bɔ-dingemge le kade yibe ule mbe dè de’t lé. Nè maje kade ei dooge ke njé ke rang asikum kilei koje dè de’t a, à ei njé kunde kumkunju dè ra de’t a tɔ. Maje kade kundekem̂ le de è ke maje unju nyang-nyang a, maje kade ei njé tár dooge a, njé korè tà de njakge a tɔ. 3Kon-dinyege géa, maje kade nyanra de uwe made nan se nyanra dinyege ke tooi se ninn de gai. Maje kade ei njé tam tede dooge lé a, njé kinye ra de nyein dann yibe’t lé a tɔ. Nè maje kade ei njé ndó made dege rebe nyan ke maje. 4Titeke bè á à ndói dinyege ke nain-in mande loo tár ngaw dege se ngann dege. 5Maje kade kon-dinyege ndói njé ke nain-in mande loo kunde kumkunju dè ra de’t le kade ra de unju nyang-nyang, le kade geri loo kan-in go kem̂ kei le de, le kade ei dinyege ke maje ke geri rebe kulei dè de kadi ngaw dege. Titeke bè á doo karé bè géa à ile’n rasɔl dè ta’t le Nube nga lé. 6I ndeje basage le kade undei kumkunju dè ra de’t ɔje dè nyan malang. 7I géa, maje kade i nyan-tɔje le de se go nyanraige ke maje. I ndó de nyan ke unju nyang-nyang le kade d’ile koje dè’t. 8I ndó de ngarankum tà ke maje unju nyang-nyang ke doo ase mbate lé. I ra bè le kade ra njé kɔse sei tàge sɔl’n de. Titeke bè á njé kɔse sei tàge à ingei tà ke majelé karé bè ke le kilei dè jéi’t lé. 9Ede ɓerge le kade ilei koje dè kuwe dege’t ɔje dè nyan malang m naji se de tà lé. Titeke bè á à taai kum kuwe dege. 10I ndeje de le kade ei njé meendé nyange lé, nè le kade se ndɔge malang ei njé ra nyange ke maje tá kuwe dege à taai kem̂ de. Ke nè á ɓerge rai titeke bè ɓaa, ei à ilei riɓar dè nyan-ndó’t le Nube ke njèkaje jèi. 11Nube njèkaje jèi ade kem̂noje le’n kile ra’n ke nata tede kade dooge malang ingei kaje. 12Kem̂noje le Nube nè nga ndó jèi loo mbate nyange ke uwe made nan se le Nube lé a, se ngur nyange ke ɔje dè dè nang nè a tɔ. Nè kem̂noje nè nga ndó jèi rebe kunde kumkunju dè ra’t dann dooge ke ndii dè nang nè ɗarinè. Kem̂noje le Nube nga ndó jèi nyanra ke se dè naje’n ke uwe made nan se kile koje dè Nube’t. 13Gar-gar, j’à rai titeke bè le nginei ndɔ tel kunde loo tee pan le Kuwe jéi Jésu-Krist. Ndɔ nè nga, j’undei kem̂ jéi dè’t tchên. Ndɔ nè nga, ndubra le Nube le jéi ke bò, se ndubra le Njèkaje jèi Jésu-Krist à kile ra’n ke nata ndái-ndái. 14Jésu-Krist inye ra’n ade yo uge’n dè jéi, ɔr’n jèi dann majelé’t bere mbak. E ɔr jèi unde jèi se ninn’n le kade jèi kosdooge le’n kuwe deri. Jésu ra titeke bè tede kade jèi kosdooge le’n ke njé ra nyange ke maje se rakɔlé. 15E ke nè á è tàge ke kum kade i ndeje’n de a, in’n se de i ndáng’n de se tɔgmong ke Nube adi deri dè tàge ke se go rebe’n lé. Tite, an tá nè à kade doo karé nedi.

will be added

X\