NJE KE ROME 8

1Njé ke umi nan’t bɔk se Jésu-Krist nga, ɗarinè tà karé bè géa uwe dè de lé ta. 2Ɗarinè jè ndii kumgajer gir gute-ndu’t le Ndil-Kêmnda takul kum ke j’umi nan’t bɔk se Jésu-Krist. Gute-ndu le Ndil-Kêmnda nga ɔr’m ɓee ɓer’t le majelé ke aw se’m ke tà yo’t. 3Gute-ndu le Moise ase ra nyan nè nga lé, tede yai le danra ra gute-ndu Moise ade tɔg’n goto. Nè Nube ra nyan ke gute-ndu ase ra lé nga. E ule Ngonn kêm’n è kuwe ade ree dè nang nè se danra’n ke tò tanan se le njé ra majelége tede kɔr’n de dann majelé’t. 4Nube ra nyan nè nga titeke bè le kade j’asi rai nyange ke gute-ndu ɔje nga. Ɗarinè jè njiyei se go tɔgmong le Ndil-Kêmnda m se go tɔgmong le danra lé ta. 5Njé ke njiyei se go tɔgmong le danra nga, tàgir le de tò ɔje dè nyange le danra kuwe karé. Nè njé ke ke njiyei se go tɔgmong le Ndil-Kêmnda ɓaa, tàgir le de ndolè go nyange ke Ndil ndige. 6Ke nè á danra á è njèkɔr non tàgir le doo ɓaa à aw se’n kile’n tà yo’t. Ke nè á Ndil-Kêmnda á è njèkɔr non tàgir le doo ɓaa à aw se doo loo ndi kumgajer’t se kêmlom. 7Tàgir le danra è njèban le Nube tede ase kile koje dè gute-ndu Nube’t lé. Kerɔte kuwe, dooge ke njiyei se go tàgir le danra nga asi kilei koje dè gute-ndu Nube’t lé. 8Njé ke tàgir le danra on ɓee de’t nga asikum taai kum Nube lé. 9Nè sei ɓaa, i njiyei se go tàgir le danra lé. Sei njiyei se tɔgmong le Ndil-Kêmnda tede Ndil Nube ndi kêm si’t. Ke nè á doo aw se Ndil ke Krist ade jèi nga lé ɓaa, doo nè nga è le Krist lé. 10Danra si á wei tede majelé ke on ɓee dènn’t kerɔte kuwe. Nè ke nè á Krist ndi kêm si’t ɓaa, Ndil à ade a i teli ndii kumgajer tede Krist ɔr tà dè si’t ɓá ta. 11Nube ade Jésu unde loo tee dann njé ke koo’t. Ke nè á Ndil Nube ndi kêm si’t ɓaa, Nube ke ndɔ ke ade Jésu unde loo tee dann njé ke koo’t nga à ade danra si ke njè kwei à tel ndi kumgajer. E Nube ke njè kade Jésu unde loo tee dann njé ke koo’t nga á à ade a i teli ndii kumgajer tɔ, takul Ndil’n ke ndi kêm si’t nga. 12Ngakonmge, jèi nga jè ndii gir tɔgmong’t le danra lé. Bè ɓaa, j’à rai nyange ke danra tá tɔje jèi kade jè rai lé ta. 13Ke nè á sei rai nyange ke kêm danra ndige ɓaa, sei a i tooi kasinan se dooge ke weii tàkum Nube’t. Nè ke nè á Ndil ra se si ade ebi ra si rai nyange le danra ɓaa, sei a i ndii kumgajer kerɔte kuwe. 14Dooge malang ke inyei loo adi Ndil Nube ɔr non de nga, ei ngann Nube kerɔte kuwe. 15Ndil ke sei ingei nga à ra sei ɓer kade i teli osoi dann ɓel’t lé ta, nè à tel sei ke ngann Nube. Takul Ndil nè á jè ɓari Nube j’edi nè: «Abba!» tel se tà koje jé ɓaa è «Ɓɔ jé!» 16Ndil-Kêmnda kuwe tam titeke jèi ngann Nube kerɔte kuwe. 17Ke nè á jèi ngann Nube kerɔte ɓaa, j’ingei nyange ke ndɔ ke Nube unn’n ndu’n le kade dooge le’n se Krist nan’t. Bè ɓaa, ke nè á, j’orèi nan se Krist dè nyantosowurge’t le’n ɓaa, ndɔn’t j’à j’orèi nan se’n dè ndubra’t le’n nga tɔ. 18M’gir kêm’t titeke nyantosowurge ke ndii à rai jèi ɗarinè nga à asinan se riɓar ke bò ke ndɔ ke rang j’à j’ingei nga lé. 19Nyankundege malang ndii kerm nginei ndubra le ngann Nube ke ndɔn’t Nube à ade à kile ra’n ke nata. 20Nyankundege malang nga, nyanra ke pás-pàs on ɓee dè de’t. Nyankundege malang ndii gir tɔgmong’t le nyanra ke pás-pàs se go kêmndige le de lé, nè se go kêmndige le Nube tede kaltà le doo. 21Nyange malang ke Nube unde de nga, d’a d’ɔr de kêm ɓee ɓer’t le nyanra ke bann-bann le kade orèi nan se ngann Nube dè ndii dè pal ke deri. 22Jè geri titeke sár ɗarinè nyankundege le Nube bere mbak ton-in ra de tede nyankêmkon ke ra de asenan se dinye ke ndo tur’n bè. 23E nyankundege le Nube á se kar de á ton-in ra de lé: jèi ke j’ingei Ndil-Kêmnda ke è tàpitem nyan-nojege le Nube nga géa, jè ton-in kêm jéi’t tɔ. Jè ndii jè nginei ndɔ ke Nube à taa’n jèi kinye’n jèi dɔ kade jè teli ngannenge. 24Kerɔte kuwe, j’ingei kaje nga ɓá; nè è se go kundekêm tchên karè ɓai. Ke nè á doo an nyan pa ɓita unde kêm’n tchên dè’t ɓaa, è kundekêm tchên ke get lé. Nyan ke doo an se kum’n ɓaa nga, ké à unde kêm’n tchên dè’t titeke bain taɓai wa? 25Kundekêm tchên dè nyan ke j’an-in se kum jéi lé ɓai nga, è korè tà njak ngine’n nyan nè se kêmkile. 26Jèi nga, jèi njéyaige, nè Ndil-Kêmnda ree din-in jèi dè yaige’t le jéi. Jè geri nyan ke get ke kum deje Nube lé. Kebe ke j’ilei puun anje kade tà tee tà jéi’t ɓai géa, Ndil ɔje tà se Nube tede è ke nè ɓá. 27Nube è ke njè ter ɓengre dooge nga ger nyan ke Ndil ndige kɔ. Ndil-Kêmnda ndi ra rebe tà le njétaakêm-Kristge se go kêmndige le Nube. 28Jè ger mbak titeke njé ke tári Nube nga, nyan malang ke ra de ɗarinè à tel maje dè de’t ndɔ ke rang ɓai. E Nube á ɓar de se go nyan ke è kuwe ɔje kété mari. 29Njé ke Nube ger de kété ɓita unde nang nè ɓai nga, è ɔje kêmn’t kété mari ke desêin le tel de ke ngann’n le kade tooi asinan se Ngonn kêm’n Jésu. Nube ra titeke bè le kade Ngonn’n ee’n doo ke desêin ke inge riɓar le Nube dann kosdooge’t le Nube. 30Njé ke Nube ɔje kade ei ngannenge kété mari ke desêin nga, è ɓar de tɔ. Njé ke è ɓar de nga, è tel de ke njé ra nyan se dè najennge a, è ile riɓar dè de’t a tɔ. 31Ké tà ri j’à tami dè nyange’t nè nga ɓai wa? Ke nè á Nube è le jéi ɓaa, ké nan à ɔse se jéi tà wa? 32Ngonn kêm’n géa, Nube ngonm’n rann’t lé, nè è inye’n ade dé tɔl’n tede tà le jéi malang. Nube à ade jèi nyan malang takul Jésu kerɔte kuwe. 33Dooge ke Nube kuwe tɔr de nga, ké nan ase kile tà dè de’t wa? Doo karé bè ke ase kile tà dè de’t goto tede è è Nube kuwe á ɔr tà dè de’t ɓá. 34Dooge ke Nube kuwe tɔr de a, ɔr tà dè de’t a tɔ nga, ké nan ase gangtà dè de’t wa? Doo karé bè ke ase gangtà dè de’t goto, tede Jésu-Krist wei tede tà le de. Jésu-Krist ke wei tede tà le de nga, è unde loo tee dann njé ke koo’t. Taɓai è aw ndi dè jikon Núbe’t à ra rebe tà le jéi. 35Ké nan asekum gang dann jéi se Krist ke njè tár jèi nga wa? Nyantosowur éké ndoo, nyan kumndoo éké ɓo, kaw mbur sutur, nyan ke asekum ree se yo dè jéi’t éké yo ke njè tɔl danra jéi asi gangi dann jéi se Krist ke njè tár jèi nga ndan lé. 36Dé ndang tà nè kêm Magtub’t le Nube d’ede nè: «E tede k’ee ke jè leige á dé tɔl’n jè se ndɔge sár d’ade kàde ur’n nang bàj. D’an jè tite batege ke d’aw se de loo tɔl dange’t bè.» 37Nè jè têti rɔ nyange nè nga malang takul tɔgmong le Nube ke njè tár jèi nga kum jéi ke kété. 38Kerɔte kuwe, m’ger kêm’t mbak: nyan karé bè ke ase gang dann jéi se Nube ke njè tár jèi takul kum ke j’umi nan’t bɔk se kuwe jéi Jésu-Krist nga goto. Yo éké ndikumgajer, dooge ke danrán éké njékon dè looge, nyange ke ɗarinè éké nyange ke à reei, 39njétɔgmong-ge ke dɔ éké njé ke dè nang nè éké nyankunde ke rang karé bè géa ase gang dann jèi se Nube ke njè tár jèi nga ndan lé.

will be added

X\