NJE KE ROME 7

1Ngakonmge, sei malang i geri gute-ndu le Moise nga ɓá. Gute-ndu on ɓee dè doo’t loo ke doo ndii’n kumgajer ɓai. Sei i geri tà nè nga maje kerɔte kuwe. 2E titeke bè se dinye ke taa ngaw. Loo ke ngaw’n ndi kumgajer ɓai nga, gute-ndu tɔ de nan’t se ngaw’n. Nè loo ke ngaw’n wei ɓá ɓaa, è ndi dè’n pal m gute-ndu tɔ’n nan’t se ngaw’n lé ta. 3Loo ke ngaw’n ndi se dè’n dɔ ɓai nga, ke nè á taa ngaw ke rang ɓaa, d’a ɓar’n kaiya-dinye. Nè loo ke ngaw’n wei ɓá ɓaa, è ndi dè’n pal m gute-ndu on ɓee dènn’t lé ta. Ke nè á taa ngaw ke rang ɓai géa, d’a ɓar’n kaiya-dinye lé. 4Ngakonmge, sei géa le si è titeke bè tɔ. Loo ke sei umi nan’t bɔk se Krist ke wei tede jéi kade kage-ke-dese’t nga, sei ɔri ra si ji gute-ndu’t sei teli sei dooge le doo karé ke rang ta. Doo karé ke rang nè nga, è Krist ke ndɔ ke Bɔ’n Nube ke njètɔgmong ade unde loo tee dann njé ke koo’t. Gir’n ke nè á j’asikum rai nyange ke maje tede le Nube. 5Loo ke ndɔ ke jè nain-in gir danra’t ɓai nga, ngur ra nyange ke majelé ke gute-ndu le Moise ɔge jèi dè’t taa ra jéi pel-pel. Ngur nyanrage nè nga aw se jéi ile jèi tà yo’t. 6Kété gute-ndu uwe jèi ɓer. Nè ɗarinè, dé taa jèi ji gute-ndu’t d’ade jè ndii dè jéi pal. Bè ɓaa, ɗarinè j’asikum rai kule kade Nube se go rebe ke kige le Ndil-Kêmnda m se go rebe ke mari ke gute-ndu ke Moise ndang ɔje nga lé ta. 7Ké j’à tami kedi nè ri wa? Bainléa a i geri titeke m’tam m’ede nè gute-ndu se kaiya ei nyan ke karé kuwe mbak. Ḿ-m̀ è bè lé! Kum’m gang dè majelé’t takul gute-ndu kuwe karé bere. Gute-ndu tam ede nè: «I a ra kêmkein dè nyan’t le doo lé.» Ke nè á ndɔ ke gute-ndu tam tà nè nga bè lé ɓaa, m’ayé ger titeke kêmkein è nyan ke majelé lé. 8Majelé ade kêmkeinge gai-gai oji nan ram’t se rebe ke ra ndukunn’t. Ke nè á gute-ndu goto ɓaa, kaiya è nyan ke ninn tede tɔgmong le’n goto. 9Kété mari ke gute-ndu goto ɓai nga, m’ndi kumgajer ɓai. Nè loo ke ndukunn unde loo tee ɓaa, kaiya tɔse ndel in ade man tá m’wei. 10Ndukunn ke tò tede kɔr non doo kaw se’n tu ndikumgajer’t nga tel è njèkɔr non’m kaw se’m kile’m tà yo’t. 11Se rebe ke ra ndukunn’t á kaiya inge’n loo sú’m ade m’inge’n yo. 12Titeke bè ɓaa, gute-ndu è nyan ke tò se ninn’n, ndukunn géa è nyan ke tò se ninn’n a, è nyan ke se dè naje’n a, è nyan ke maje a tɔ. 13A ɓaa, ké nyan ke maje à tel k’ee gir yoo’m taɓai wa? Ḿ-m̀, è bè lé! Doo ke njètɔl’m ke get è kaiya. E kaiya á unn nyan ke maje ade tel è gir yoo’m. E ra titeke bè le tɔje’n majelé le’n ke bò ngain ke nata se rebe ke ra ndukunn’t. 14Jè geri titeke gute-ndu è nyan le Ndil. Nè man ɓaa, m’ee nyan le danra. Danra ige’m ade majelé on ɓee dèm’t. 15Nyan ke m’ndi m’ra nga, m’ger kuju’n lé. Nyan ke m’ndige le ra nga m’ra lé, nè nyan ke m’ɔr’n njêt tá m’ra. 16Ke nè á m’ra nyan ke m’ndige ra lé nga ɓaa, man m’ndige se gute-ndu titeke gute-ndu nga è nyan ke maje kuwe. 17Bè ɓaa, è man á m’in se dè’m m’ra nyange nè nga lé, nè è majelé ke ndi kêm’t á ade m’ra nyange nè nga. 18M’ger titeke man se dè ra’m nga, nyan ke maje urkei kêm’t mbêt lé. M’uwe ra nyan ke maje se ji’m mêtch kuwe, nè tɔge ra’n kɔr son á goto. 19Nyan ke maje ke m’ndige le ra nga m’ra lé, nè nyan ke majelé ke m’ndige le ra lé tá m’ra. 20Ke nè á m’ra nyan ke m’ndige ra lé nga ɓaa, è man á m’in se dè’m m’ra nyan nè nga lé. Nè è majelé ke ndi kêm’t á ade m’ra nyan nè nga. 21M’ndige le ra nyan ke maje, nè nyanra ke majelé tá ji’m ase tutu deĵ ade m’ra se ndɔge malang titeke bè. 22Kêm’m ke kei ra ranel dè gute-ndu Nube’t. 23Nè m’an titeke gute-ndu karé ke rang ndi ra kule ram’t. Gute-ndu nè nga ndi à rɔ se gute-ndu ke ɓengre’m ke kei um nan’t se’n. Gute-ndu karé ke rang ke ndi à rɔ se’m nga on ɓee dèm’t ade m’ee ɓer le majelé ke ndi kêm’t nga. 24Man nga m’ée doo ke dang’t! Ké nan à taa’m ji danra ke ndi aw se’m le kile’m tà yo’t nè nga wa? 25M’ra Nube oiyo tede taa ke taa’m ji danra’t takul kuwe jéi Jésu-Krist. Tàgir ke kêm’t kei ndi ra ɓer le gute-ndu Nube, nè danra’m ndi ra ɓer le gute-ndu ke sɔbe dè majelé ke on ɓee dèm’t.

will be added

X\