NJE KE ROME 6

1Ké tà ri á j’à tami le tɔl’n ngang tàge nè nga wa? Ké j’à tami titeke dooge ke nange tami edi nè: Ade jè rai majelé kum jéi ke kété-kété tede kade kêmnoje le Nube in’n dè made’t ke kété-kété. Ḿ-m̀, è bè lé! 2Jèi nga, jèi dooge ke j’ebi ra jéi dè ra majelé’t: à ɓaa, ké j’à teli kulei ra jéi dann majelé’t mbiriri titeke bain taɓai wa? 3Ké sei geri titeke jèi malang ke d’ule jèi manné njonm se ri Jésu nga, ké dé dubu jèi se’n nan’t lé wa? 4Kule ke d’ule jèi manné njonm nga, è titeke dé dubu jèi se’n nan’t tɔ. Titeke ndɔ ke Bɔ’n ade unde’n loo tee’n dann njé ke koo’t se go tɔgmong le’n ke dum dè loo nga, jèi géa j’à j’undei loo teei le teli ndii kumgajer bè tɔ. 5Ke nè á j’umi se’n nan’t bɔk dè kwei’t le’n ɓaa, j’à j’undei loo teei titeke ndɔ ke unde’n loo tee’n dann njé koo’t nga bè tɔ. 6Jè ger titeke danra jéi ke mari nga, dé tɔl’n se Jésu nan’t kade kage-ke-dese’t le kade danra ke majelé ke ur sire tutu nga tel unde nang ndagja. Gir’n ke nè á jèi ɓerge le kaiya gugu lé ta. 7Tede doo ke wei nga tà kaiya ɔr dènn’t ɓá ta. 8Ke nè á j’weii se Krist nan’t ɓaa, j’undei kêm jéi titeke j’à ndii kumgajer se’n nan’t tɔ. 9Krist ke d’ade unde loo tee dann njé koo’t nga, jè geri mbak titeke à tel kwei ndan lé ta, tede yo ase konɓee dènn’t ndan lé a tɔ. 10Jésu-Krist wei nja karé ke gang’n tede le kaiya. Nè ɗarinè, è tel ndi kumgajer tede le Nube. 11Bè ɓaa, sei géa an-in ra si ke ninn dooge ɔje dè kaiya, nè an-in ra si ke dooge ke teli ndii kumgajer tede le Nube takul kum ke umi nan’t bɔk se Jésu-Krist. 12Danra ke ndɔn’t à wei nga adi kaiya tel on ɓee dènn’t ndan lé ta. I teli i turi ra si go ngur nyange’t ke ɔje dè danra si nga ndan lé a tɔ. 13Inyei balkum ra sige adi ei nyan ra kule le nyan ra ke majelé nga lé. Nè tà le kade sei ke i tooi asinan se dooge ke undei loo teei dann njé ke koo’t teli ndii kumgajer bè. Inyei ra si sei kuwe bere mbak adi Nube ke nyan ra kule ke maje. 14Kaiya à on ɓee dè si’t lé ta, tede sei i ndii gir gute-ndu’t lé ta, nè i ndii gir noje’t le Nube. 15Ké ri á j’à rai wa? Ké j’à rai majelé ke kété-kété tede ndi ke jè ndi gir noje’t m gir gute-ndu’t lé nga wa? Ḿ-m̀, è bè lé! 16Sei geri mbak: titeke nè á sei kuwe i rai ra si ɓer le kile koje dè doo karé’t ɓaa, sei ɓerge le doo nè nga kuwe. Doo ke ilei koje dènn’t nga è kuwe si. Ke nè á i rai ra si ɓer le kaiya ɓaa, kaiya à um sei tà yo’t. Ke né á i rai ra si ɓer le Nube ɓaa, Nube à ɔr tà dè si’t tede koje ke ilei dènn’t. 17Ade jè rai Nube oiyo. Sei nga kété kaiya on ɓee dè si’t ade sei ɓerge le’n. Nè ɗarinè sei taai nyan ke dé ndó sei se ngarankêm si, ilei koje dè’t. 18Ɗarinè, d’ɔr sei ɓee ɓer’t le kaiya d’ade i ndii dè si pal le kade sei ɓerge le nyanra ke se dè naje’n ta. 19M’tam tà nè nga se go tà tam dooge tede loo ger gir tàge nè tur se si ngain. Kété sei rai ra si ke ɓerge le nyan ke mine se nyan ra ke pás-pàs le kal’n tà tà Nube’t. Nè ɗarinè, sei rai ra si ke ɓerge le nyanra ke se dè naje’n tede kade sei dooge ke i tooi se ninn si le Nube. 20Loo ke ndɔ ke sei ɓerge le kaiya ɓai nga, usu sei dè nyanra ke se dè najenn’t nga mbêt lé. 21Kété i rai nyange ke majelé, nè ɗarinè ra si sɔl sei dè’t. Nyange nè nga aw se si ile sei tà yo’t. 22Nè ɗarinè d’ɔr sei ɓee ɓer’t le kaiya d’ade i ndii dè si pal le kade i teli ɓerge le Nube. Titeke bè á sei dooge le Nube ke i tooi se ninn si a, loo tɔl tà’n ɓaa a ingei ndikumgajer ke à tò sár se non a tɔ. 23Oiyo nyan kuge dè ji le kaiya è yo, nè nyan kuge noje le Nube ɓaa, è ndikumgajer sár se non takul kum ke j’umi nan’t bɔk se kuwe jéi Jésu-Krist.

will be added

X\