NJE KE ROME 5

1Oiyo, Nube ɔr tà dè jéi’t se go kundekêm le jéi. Gir’n ke nè á jè ndii se’n se kêmlom ɗarinè takul Kuwe-ɓee le jéi Jésu-Krist. 2Takul kêm jéi ke j’undei dè Kuwe-ɓee Jésu’t á j’ingei rebe nonkar nè nga. Nonkar nè nga ade jè ndaii tutu njáng. J’undei kêm jéi tchên tede korè ke j’orèi nan se Nube dè riɓar’t le’n. E ke nè á è nyan ke ade dè jéi in’n tchakm. 3E ke nè á go karé lé, nè dè jé in tchakm dann nyantosowurge ke ra jèi, tede jè geri titeke nyantosowur oje korè tà njak. 4Korè tà njak oje kilekêm, kilekêm oje kundekêm tchên, 5kundekêm tchên nga á ile rasɔl dè jéi’t lé, tede Nube tár jéi ade Ndil-Kêmnda ree urkei kêm ɓengre jéi’t. 6Oiyo, loo ke ndɔ ke tɔg jéi ase tee ji ɓer’t le kaiya lé ɓai nga, Krist wei tede njékute Nube mbeng-ge dann kurloo ke è Nube kuwe ɔje. 7Le kade doo karé wei tede le njè ra nyan se dè naje’n nga géa, è nyan ke loo ra’n tur ngain. Bainléa doo karé tò tutu asekum korè tà’n njak le kwei tede doo ke maje. 8Nè Nube tɔje jéi ngarankêm’n titeke n’tár jéi takul kwei le Krist: Loo ke ndɔ ke jè nain ke njé ra majelége ɓai nga, Krist wei tede tà le jéi. 9Ɗarinè tà ɔr dè jéi’t ɓá takul mese’n. Taɓai Krist á ɔr jèi tà wong’t le Nube. 10Kerɔte kuwe, kété jéi njébange le Nube. Nè ɗarinè, Nube um jéi nan’t se’n takul kwei le Ngonn’n. Ke nè á j’um nan’t se Nube ɓá ɓaa, Nube à aje jéi takul ndikumgajer le Ngonn’n nga tɔ. 11Taɓai è ke nè á go karé lé, nè dè jéi in tchakm non Nube’t takul Kuwe-ɓee le jéi Jésu-Krist. Takul’n è á ɗarinè j’umi nan’t se Nube. 12Majelé ree dè nang se go rebe ke ra doo karé’t. Doo nè nga è Adam. Yo ree dè nang nè se go rebe ke ra majelé’t. Titeke bè á yo ree on’n ɓee dè dooge’t malang tede dooge malang ei njé ra majelége. 13Majelé ree dè nang nè kété ɓita kade Nube ade gute-ndu Moise ɓai. Nè loo ke ndɔ ke gute-ndu goto ɓai nga, Nube unn kum’n dè majelé’t le dooge. 14Yo unn gir konɓee dè dooge’t kêm ndɔn’t le Adam sár tee’n kêm ndɔn’t le Moise. Njé ke ali tà tà gute-ndu’t tite Adam lé géa, yo on ɓee dè dé’t a tɔ. Adam è kum gute tà Krist ke à ree. 15Kêmnoje le Nube dum dè kaltà le Adam ɓai. Kerɔte kuwe, dooge ngain weii yo kaltà le Adam ke se kar’n. Nè né è bè géa, noje ke Nube uwe se dooge bule takul doo karé bere ke è Jésu-Krist nga, dum dè kaltà le Adam. 16Kann nyan-noje le Nube nga tò gai se kure majelé le Adam. Nube gangtà dè dooge’t malang tede majelé ke ndɔ ke doo karé luk-luk ke è Adam ra. Nè Jésu-Krist ke è nyan-noje le Nube nga ɔr tà dè dooge’t ɔje dè majelége ngain ke ei rai. 17Kerɔte kuwe, yo on ɓee dè dooge’t se go rebe ke ra Adam’t a, tede kaltà le Adam ke se kar’n bere a tɔ. Nè ɗarinè, dooge ingei noje le Nube adi taa ra de pel-pel takul doo karé bere luk-luk ke è Jésu-Krist. Takul Jésu-Krist á Nube ɔr’n tà dè dooge’t a, dooge à ndii kumgajer sár se non a tɔ. Takul Jésu-Krist á ndɔ ke rang dooge à on-in ɓee se Nube. 18Tà uwe dè dooge malang tede kaltà le Adam ke se kar’n bere. Takul nyanra ke se dè naje’n le Jésu-Krist se kar’n bere á tà ɔr’n dè dooge’t a, taɓai ndii kumgajer a tɔ. 19Kaltà le doo karé bere á ndɔ ke kosdooge ei njé ra majelége. Takul kile koje le doo karé bere á tà à ɔr’n dè kosdooge’t tɔ. 20Gute-ndu unde loo tee ade majelé in dè made’t ke kété-kété. Nè loo ke majelé in dè made’t ke kété-kété tutu nga, kêm-noje le Nube in dè made’t ke kété-kété tutu dum dè majelé. 21Kété yo on ɓee dè dooge’t tede majelé ke taa loo ɔge. Ɗarinè kêmnoje le Nube ɔr tà dè dooge’t ade ingei ndikumgajer se non le Nube takul Jésu-Krist, Kuwe-ɓee le jéi nga.


Copyright
Learn More

will be added

X\