NJE KE ROME 3

1Bainléa i deje rai tà ede nè: Ke nè á è titeke bè ɓaa, ké ri á Juip inge dum dooge ke rang ke ei Juipge lé nga wa? Ké maje le kuje tà mɔte nga è ri wa? 2Nonkar le doo ke è Juip è ngain ɔje dè nyange bule. E Juipge á Nube ule se tàge le’n ade de kété ke desêin. 3Ké j’à tam kede nè ri wa? Juipge ke nange unni mbi de dè tàge’t le Nube kuwe, nè ké kunn mbi dè tà’t le de à kɔge’n ra nyan ke unn’n ndu’n le ra nga wa? Ḿ-m̀, è bè lé. 4Ke nè á dooge malang ei njé lanmge géa, Nube è njè tam ngarankum tà. Magtub ke tò se ninn’n tam tà ɔje’n dè Nube ede nè: «Maje kade d’an tà tamige ke tà ke se dè naje’n a, loo ke d’ade gangtà dèi’t ɓaa, maje kade uwe de se tà a tɔ.» 5Dooge ke nange tami edi nè: Nyanra ke se dè naje’n lé le jé nga ade nyanra ke se dè naje’n le Nube kile’n ra’n ke nata. A ɓaa, ké ra ke Nube ra wong se jé nga è loon’t wa? M’tam tà nè nga titeke bè se go tà tam dooge. 6Ḿ-m̀! Nube è njè ra nyan ke se dè naje’n lé ndan lé. Ke nè á Nube gangtà dè jéi jèi Juipge’t lé ɓaa, ké à gangtà dè dooge ke rang titeke bain wa? 7Bainléa doo karé tam ede nè: Tà lanm le’m ade ngarankum tà le Nube kile ra’n ke nata ade d’ile’n riɓar dènn’t. A ɓaa, ké tede ri á Nube gangtà dèm’t titeke m’ee njè ra majelé bè taɓai wa? 8Dooge ke nange ulei tà gir jé’t edi nè è jè á jè sule dooge j’ede nè: «Ade jè rai majelé tede kade ra maje tee’n tutu.» Dooge ke titeke bè nga, tà ke dé gang dè de’t è se dè naje’n kuwe. 9Ké j’à tami kedi nè ri wa? Ké jèi Juipge jè maji jè dumi dooge ke rang wa? Ḿ-m̀, è bè lé! M’ɔrgir m’ade sei kété ɓá titeke Juipge se njé ke ei Juipge lé nga, majelé on ɓee dè de’t malang. 10Magtub le Nube tam ede nè: «Doo ke njè ra nyan se dè naje’n goto, doo karé ke luk-luk bè géa goto. 11Doo ke njèkumkunju karé bè géa goto, doo karé ke njè sang Nube kade ra se’n goto. 12Dooge malang ndemi awi dè nan’t ɗɔtɔtɔ. Doo ke njè ra maje goto, doo karé ke luk-luk bè géa goto. 13Kul-kunge de è be-ɓade ke tò wei, ndon de è nyan sú dooge, keng pir tò gir ndon de’t. 14Kubu-yo se wurkate rusi kêm de njin-njin. 15Nja de ɔlé pêl-pêl tede kaw kile mese doo nang. 16Loo malang ke d’aw tutu nga, tuju se kumndoo tooi dè nja de’t. 17Rebe ndi se kêmlom nga, dé ger lé. 18Ɓel ndil Nube nga d’an ke nyan tàkum de’t lé.» 19Tàge malang ke gute-ndu tam nga, jè ger titeke è tam ɔje’n dè njé ke ndii gir gute-ndu’t. Doo karé à teen tà’n le tam’n tà dè rann’t lé. Dooge malang ke dè nang nè nga, tà uwe dè de non Nube’t. 20Doo karé bè géa Nube à ɔr tà dènn’t tede ra ke è ra nyan ke gute-ndu ɔje nga lé. Gute-ndu tò tede tɔje doo kade ger titeke è njè ra majelé. 21Nè ɗarinè Nube tɔje jèi rebe ke è ɔr’n tà dè dooge’t. E ɔr tà dè de’t nal kade dé ra nyan ke gute-ndu ɔje. Magtub gute-ndu le Moise se le njéribe-dè-tàge ke tà Nube’t tami tà nè nga bè tɔ: 22Nube ɔr tà dè dooge’t malang tede kêm de ke undei dè Jésu-Krist’t, m ɔr kum doo karé dann de’t lé. 23Dooge malang rai majelé. Gir’n ke nè á nali kingei riɓar ke Nube ɔje le kile dè de’t nga. 24Nube ɔr tà dè dooge’t karè takul kêmnoje le’n ke ule’n Jésu-Krist ade ree ɔr’n de dann majelége’t le de. 25Jésu-Krist nga, Nube ɔr’n unde’n ke nyan kɔr kaiya. Jésu-Krist wei ade mese’n an-in nang tede majelé le dooge. Njé ke undei kêm de dènn’t nga, Nube ade kêm’n tin mbit dè majelége’t le de. Nube tɔje titeke è njè ra nyan se dè naje’n. Kété mari Nube ile kêm’n pon dè majelége’t le dooge ade kure’n ɔde kum de lé. 26Nè ɗarinè è tɔje jèi rebe ke è ɔr’n tà dè dooge’t. Nube è njè ra nyan se dè naje’n. Dooge ke undei kêm de dè Jésu’t nga, è ɔr tà dè de’t kɔke. 27A ɓaa, ké loo kade dè jéi in tchakm tò non ɓai wa? Ḿ-m̀, loo kade dè jéi in tchakm goto tà! Ké loo kade dè jéi in tchakm goto tede ri wa? Kundekêm á dè doo à kin’n tchakm m dè doo à in tchakm ɔje dè ra nyan ke gute-ndu ɔje nga lé ta. 28Jè ger kêm jé’t titeke Nube ɔr tà dè doo’t takul kundekêm le’n m takul ra ke è ra nyan malang ke gute-ndu ɔje nga lé. 29Ké Nube nga è Nube le Juipge kuwe se kar de wa? Ké è Nube le njé ke ei Juipge lé nga tɔ lé wa? Loo naje’n goto, Nube nga è Nube le dooge ke ei Juipge lé nga tɔ. 30Kerɔte kuwe, Nube nga è kuwe se kar’n bere luk-luk á è Nube. E ke karé nè kuwe á à ɔr tà dè Juipge’t a, à ɔr tà dè njé ke ei Juipge lé a tɔ, takul kundekêm. 31A ɓaa, ké kundekêm dè Krist’t le jéi nga à tuju maje le gute-ndu wa? Ḿ-m̀, è bè lé! Takul kundekêm á j’unn’n gute-ndu j’unde’n dɔ ɗang j’ade tò loon’t ke kété.

will be added

X\