NJE KE ROME 15

1Jèi ke kundekêm le jéi ɓeɓer ɓá nga, è tà le kade jè geti njé ke kundekêm le de ɓisir lé nga gar-gar. Ade jè sangi nyan ke ɔje dè ranel le jéi se kar jéi lé gar-gar. 2Gar-gar maje kade nanan géa dann jéi’t sang nyan ke à taa kum doo made’n, le kade kundekêm le doo made’n ra’n tɔge in-in’n dè made’t ke kété-kété. 3Kerɔte kuwe, Krist nga ndɔ ke sang nyan ke ɔje dè ranel le’n se kar’n lé. Nè dé ndang kêm Magtub ke tò se ninn’n d’ede nè: «Rasɔl ke d’ile dèi’t nga tel oso dè’m man’t tɔ.» 4Nyange malang ke dé ndang tà’n kêm magtub’t kété mari nga, dé ndang de le ndó’n jèi nyan. Magtub ke tò se ninn’n ndó jèi korè tà njak se sɔlkêm ke j’ingei tà’n kêm Magtub’t le Nube tede kade j’undei kêm jéi tchên ke dènn’t. 5Korè tà njak se sɔlkêm nga in-in ra Nube’t. M’deje Nube le kade ra se si ade umi nan’t titeke Jésu-Krist ndige’n nga. 6Titeke bè á sei a kasi kundei ndu si nan’t le kɔse’n pa kile’n riɓar dè Nube, Bɔ Kuwe-ɓee le jéi Jésu-Krist. 7Gir’n ke nè á uwei nan ke ra si’t titeke Krist uwe’n sei ke rann’t tede riɓar le Nube. 8Man m’ede sei ndàt, Krist tel ra’n ke ngonn njèkule le Juipge tede kade kunn ke ndɔ ke Nube unn ndu’n ade kà dege kété nga, aw’n loon’t deĵ. 9Krist ra titeke bè le kade njé ke ei Juipge lé ilei riɓar dè Nube’t tede kêmkanm ke è ra se de. Dé ndang kêm Magtub’t le Nube d’ede nè: «Gir’n ke nè á m’a m’ɗɔii dann dooge ke ei Juipge lé a, m’a kɔse pa kile’n riɓar dè ri’t a tɔ.» 10Taɓai dé tam kêm Magtub’t le Nube d’ede nè: «Sei ke sei girkoje Juipge lé nga, ali ra si se kosdooge le Kuwe-ɓee!» 11Dé tam loo karé’t ɓai kêm Magtub’t d’ede nè: «Sei malang ke sei girkoje Juipge lé nga, ilei riɓar dè Kuwe-ɓee’t! Sei kosdooge malang géa, ilei riɓar dè Kuwe-ɓee’t tɔ.» 12Esaie njèribe-dè-tà ke tà Nube’t géa tam bè tɔ, ede nè: «Ngar karé ke kige à in girkà’t le Jessé le ree. A ree le kon dooge ke ei Juipge lé. Dooge ke ei Juipge lé à undei kêm de dènn’t.» 13Maje kade Nube ke j’undei kêm jéi tchên dènn’t ade sei ranel se kêmlom ke deri takul kêm si ke undei dènn’t nga. Titeke bè á kundekêm tchên le si à ra’n tɔge ke kété-kété se go tɔgmong le Ndil-Kêmnda. 14Ngakonmge, man m’ger kêm’t mbak titeke sei awi se tàgir ke maje. M’ger kêm’t maje titeke sei awi se gos nyanger ke deri, ade ɗarinè sei kuwe asi ndángi nan dann si sei’t. 15Nè né è bè géa, man m’ede sei tà kum ngonn ke dingem loo bule kêm magtub’t le’m nè. M’ra bè le kolé’n kêm si dè noje ke Nube uwe sem’t nga. 16Nube tel’m ke ngonn njèkule le Jésu-Krist tede le dooge ke ei Juipge lé. Nube ɔr’m unde’m se ninn’n tede kade m’ile mber Tà ke Maje le’n m’ade dooge ke ei Juipge lé. Titeke bè á Ndil-Kêmnda à ɔr’n njé ke ei Juipge lé kunde’n de se ninn de kade taai kum Nube. 17Takul Jésu-Krist á m’unde’n kàde’m dè kule ke m’ndi m’ra m’ade Nube. 18M’ndige tam tà ke rang karé lé. Nè ke nè á ɗarinè m’tam tà ɓaa, è tà le nyan ke Krist ade m’ra á m’ree’n se dooge ke ei Juipge lé m’ade ilei koje dè Nube’t. Njé ke ei Juipge lé ilei koje dè Nube’t tede nyanra’m se tà tam’mge, 19se go tɔgmong le nyankɔbege se nyange ke dum kum a, se go tɔgmong le Ndil-Kêmnda a tɔ. Titeke bè á m’unn’n gir kile mber Tà ke Maje le Krist kêm ɓee-bò ke Jérusalem se ɓeege malang ke an-in dè’n gêrêr sár m’tee’n kêm ɓeekon ke Illyrie. M’ile mber Tà ke Maje le Krist nga m’ɔr son’n njêt kêm ɓeege’t nè nga. 20Nè ɓeege ke d’ile mber Tà ke Maje le Krist kêmé d’ade dooge lé ɓai á m’ndige kile mber tutu kade è riɓar le’m. M’ra titeke bè tede m’ndige kunde gir kei le’m dè le doo ke rang’t lé. 21M’ra bè titeke Magtub ke tò se ninn’n tam’n ede nè: «Njé ke d’ile mber tà le’n d’ade ooi lé à an-in nin se kum de, njé ke ooi tà le’n lé ɓai à geri nin.» 22E ke nè á è nyan ke ɔge’m kaw kan sei nja bule. 23Nè ɗarinè, m’tɔl ngang kule le’m kêm ɓeege’t nè nga ɓá. Ɓal bule, ngur kaw kan sei ra’m pênn-pênn. 24Loo ke ndɔn’t m’a maw ke kêm ɓeekon ke Espagne ɓaa, m’ɔje kêm’m tchên le gang dè si’t kan sei. Loo ke m’an sei ase’m ɓá ɓaa, m’ɔje kêm’m dè si’t le kade undei man rebe adi m’aw. 25Nè ɗarinè ɓaa, m’ndi m’a m’aw ke kêm ɓee-bò ke Jérusalem se nyan le ra’n se njé ke le Nube ke ndii nú. 26Njétaakêm-Kristge ke kêm ɓeekonge ke Macédoine se Achaie in-in se kêm de rai nyan-noje le ra’n se njétaakêm-Kristge ke Jérusalem ke ndoo oso dè de’t. 27Njé ke Macédoine se Achaie in-in se kêm de ei kuwe rai titeke bè le kɔr’n kure le Juipge dè de’t kɔke. Kerɔte kuwe, ke nè á girkoje dooge malang d’oré nan se Juipge dè nyan ke ɔje dè Ndil nga ɓaa, gar-gar è tà le de le ra se Juipge dè nyan ke ɔje dè danra de’t tɔ. 28Loo ke m’a m’tɔl tà kule nè nga, m’a kum nyan-nojege nè nga ji de’t se loo tò’n bere mbak ɓá ɓaa, m’a gang dè si’t le kaw kêm ɓeekon ke Espagne. 29Kaw ke m’a m’aw ra si’t nga, m’ger mbak; è dann ndutor’t ke maje le Krist á m’a m’aw’n. 30Ngakonmge, m’ndeje sei se ri Kuwe-ɓee le jéi Jésu-Krist a, se ri kunde nan dann kum nan’t ke in ra Ndil-Kêmnda’t le kade i rai ndoo ra Nube’t tede’m. E rɔ ke sei rɔi se’m nan’t. 31I deji Nube le kade ɔr’m ji njétaakêm-Kristge lé ke ndii kêm ɓeekon ke Judée a, le kade nyan-noje ke m’a m’aw’n le ra’n se njétaakêm-Kristge ke ndii Jérusalem nga, taa kum de a tɔ. 32Ke nè á Nube ndige ɓaa, m’a m’aw tee ra si’t se ranel le taa kebe ra si’t nú ndêin ɓita. 33Maje kade Nube ke njè kade dooge kêmlom nain se si malang. Maje kade è titeke bè kuwe.

will be added

X\