NJE KE ROME 14

1Doo ke tɔg kundekêm le’n goto nga, uwei nin ke ra si’t m i giri tà dènn’t yo ke nè lé. 2Doo karé gir titeke n’ase kuse nyan malang, nè doo karé ke rang ke tɔg kundekêm le’n ase lé nga use mbi targe karè. 3Doo ke asekum kuse nyan malang nga, maje kade gangtà dè doo ke njèkuse mbi targe karè nga lé. Doo ke use mbi targe karè nga, maje kade gangtà dè è ke use nyan malang’t nga lé tɔ, tede Nube uwe’n ke rann’t tɔ. 4Ké i nga i nan á in se dèi i gangtà dè ngonn njèndi’t le madi ke rang wa? Ke nè á è nda dɔ éké oso géa è tà le kuwe’n. Nè è à nda dɔ tede Kuwe-ɓee aw se tɔgmong le kade in nda’n dɔ njáng. 5Doo karé an titeke ndɔ karé è ndɔ ke bò ngain dum ndɔge ke rang malang. Nè doo karé ke rang an ndɔge ade asinan. Maje kade nanan géa ra nyan se go tàgir ke kêmn’t. 6Doo ke ɔr ndɔ karé ke ndɔ ke bò dum madege nga, è ra tede ɗɔi’n Kuwe-ɓee. Doo ke use nyan malang nga géa ra tede le ɗɔi’n Kuwe-ɓee a tɔ, tede è kuwe géa ra Nube oiyo dè nyankusenn’t tɔ. 7Doo karé dann jéi’t ndi kumgajer éké wei tede le’n è kuwe se kar’n lé. 8Ke nè á jè ndii kumgajer ɓaa, jè ndii kumgajer tede le Kuwe-ɓee. Ke nè á j’weii ɓaa, j’weii tede le Kuwe-ɓee tɔ. Ke nè á jè ndii kumgajer éké j’weii géa, jèi le Kuwe-ɓee. 9Gir’n ke nè á Krist wei’n a, unde’n loo tee’n a, tede le konɓee dè njé ke koo’t se njé ke ndii kumgajer a tɔ. 10Nè i, ké bain á i gangtà dè ngokoin’t wa? Ké bain á i an ngokoin ke nyan lé wa? Kerɔte kuwe, jèi karé-karé malang j’à ndai non kutu-ngar gangtà’t le Nube. 11Dé ndang kêm Magtub ke tò se ninn’n d’ede nè: «Man Kuwe-ɓee ke njèndi kumgajer m’tam ndàt: Girkoje dooge karé-karé malang à ɔsi keje de nang nonm’t a, tà dooge karé-karé malang à ile riɓar dè Nube’t a tɔ.» 12Titeke bè, nanan géa dann jéi’t à ɔrgir nyanra’n è kuwe le kade Nube. 13Gir’n ke nè á adi j’ebi ra jéi gangtà dè nan’t. Nè maje kade jè giri le tel kile kage non ngakon jéige’t le kade jè gendere de kade awi tebel-tebel éké osoi dann majelé’t lé. 14Kuwe-ɓee Jésu ndó’m ade m’ger kêm’t maje titeke nyan karé bè géa mine se dè ra’n lé. Ke nè á doo karé gir kêmn’t titeke nyan karé mine ɓaa, mine tede le’n è kuwe. 15Ke nè á ade ngokoin ke njètaakêm-Krist kêmkon ɔje dè nyan kuse ke kêmi’t ɓaa, i tár’n titeke ndukunn tam’n nga lé. Ngokoin ke Krist wei tede’n nga ade tuju ɔje dè nyankuse ke kêmi’t karè lé. 16Adi dooge teli nedi nyanra si ke maje nga lé. 17Kerɔte kuwe, konɓee le Nube nga tò tede nyankuse éké nyankain lé. Konɓee le Nube nga tò ɔje dè nyanra ke se dè naje’n a, se kêmlom a, se ranel ke Ndil-Kêmnda ade jèi. 18Doo ke ra kule ade Krist titeke bè nga taa kum Nube a, dooge malang d’a taa kêm’n a tɔ. 19Titeke bè, adi jè sangi go nyange ke à reei se kêmlom dann jéi’t. Adi jè sangi go nyange ke à ade kundekêm le jéi à ra’n tɔge ke kété-kété a tɔ. 20I dookunde le Nube nga, an! tá nè à tuju ɔje dè nyankuse ke kêmi’t karè. Kerɔte kuwe, nyankusege malang maje kum kuse, nè ke nè á nyankuse ke kêmi’t à ade ngokoin à ra majelé ɓaa, maje lé. 21Maje kum kuse dan éké kain yibe lé. Nyan ke rara ke ile ngokoin kage nga, maje kade ɔge rai dè’t. 22Tàgir lei ke ɔje dè nyange nè nga, i ngonm ɔje dèi i se Nube. Doo ke ra nyan se kêmnda geng lé nga, ra’n à nel’n. 23Nè doo ke kêm’n nda geng dè nyankuse’t ɓaa, Nube gangtà dènn’t ɓá ta, tede è ra nyan se kundekêm lé. Nyan ke doo ra se kundekêm lé nga è kaiya.

will be added

X\