NJE KE ROME 13

1Maje kade nanan géa ile koje dè ndukunnge’t le njékonɓeege ke d’unde de, tede gir konɓee ke nal kin ra Nube’t goto. Njékonɓeege ke d’unde de nga, è Nube kuwe á unde de. 2Gir’n ke nè á nanan ke ute ndukunnge le njèkonɓee mbeng ɓaa, è ndukunn le Nube kuwe á è ute mbeng. Dooge ke mbati kilei koje dè ndukunnge’t le njékonɓeege nga, Nube à gangtà dè de’t. 3Njé ke rai nyan maje nga à ɓeli njékonɓeege lé, nè njé ke rai majelé kuwe karé á à ɓeli njékonɓeege. Ke nè á i ndige ɓel njèkonɓee lé ɓaa, i ra nyan maje ɓaa njèkonɓee à unn tài. 4Njèkonɓee è ngonn njèkule le Nube tede ndeji kade i ra’n nyan maje. Ke nè á i ra majelé ɓaa, i ɓel njèkonɓee. Njèkonɓee aw se tɔgmong le gangtà dè dooge’t. E ngonn njèkule le Nube le gangtà dè njé ra nyan se dè naje’n lége. 5Gir’n ke nè á, maje kade ulei dè si adi njékonɓeege tede tà ke Nube à gang dè si’t kuwe go karé lé, nè tede tàgir le si ke kêm si’t ɔje dè nyan ke se dè naje’n nga kuwe. 6Gir’n ke nè tɔ á sei ugei tirge. Njétaa tirge nga, è Nube kuwe um kule nè nga ji de’t kade rai se ngang’n lêr-lêr. 7Nanan géa adii nyan ke ɔje dè’n-dè’n: Adi tir njètaa tir; adi njè dè nang, nyan dè nang; ilei koje dè doo ke asekum kade ilei koje dènn’t; ilei riɓar dè doo ke asekum kade ilei riɓar dènn’t a tɔ. 8Adi kure le doo karé bè tò dè si’t lé. Nè adi kure tár nan tá tò dè si’t. Doo ke tár doo made’n ɓaa, è ra nyan ke gute-ndu ɔje nga tɔl mbas ɓá. 9Ndukunnge ke sei i geri ɓá nga tami edi nè: «I a sang dinye éké dingem ke rang lé, i a tɔl doo lé, i a ɓoge lé, i a ra kêmkein dè nyan’t le doo lé.» Ndukunnge nè se gutege ke nain-in nga, d’oré de nan’t loo karé d’ede nè: «I a tár doo madi titeke i tár’n danrai i kuwe bè tɔ.» 10Doo ke tár doo made’n nga à tel ra se’n majelé lé. Tár nan nga, è ra nyan ke gute-ndu ɔje kade ɔr njêt. 11I rai titeke bè tede sei geri kêm ndɔ ke jè ndii tutu ɗarinè nga mbak. Kàde kade i ndeli dè ɓi’t ase ɓá. Kété ke ndɔ ke j’undei kêm jéi dè Krist’t nga, kaje è se jéi heb ɓai, nè ɗarinè kaje è se jéi ngɔr ta. 12Nain ngɔr ɓaa, loo à ar kade kàde à tee. Bè ɓaa, ade j’inyei go kule rage ke majelé ke jè rai dann ndɔɔ ɓaa, jè tulei nyankatege le lookar ra jéi’t. 13Ade jè njiyei danné sêw tite doo ke njiye dann kada bè. Ebi ra si dè k’ee doo nyankuse se doo nyankain. Ebi ra si dè tò se nan ke kaiya’t se dè nyanrage ke pás-pàs a, dè kɔl nan’t se dè ra jang’t a tɔ. 14Nè i teli i ndaji kum Kuwe-ɓee Jésu-Krist. Inyei ra si adi ngur nyange le danra ndɔr sei aw se si loo nyanra ke majelé’t lé ta.

will be added

X\