NJE KE ROME 11

1A ɓaa, ké m’a tam kede nè: Ndɔ ke Nube mbate kosdooge le’n njing wa? Ḿ-m̀, è bè lé! Man Paul géa m’ee gir ɓee ke Israel a, m’ee ke girkà’t le Abraham a, m’ee girkoje’t le Benjamin a tɔ. 2Dooge ke Nube tɔr de kété mari ke desêin nga à mbate de ndan lé. Tà ke Magtub ke tò se ninn’n tam ɔje’n dè Elie nga, sei i geri mbak. Eli, njèribe-dè-tà ke tà Nube’t nga, ndɔ ke ile tà dè kosdooge ke Israel, non’n ra’n non Nube’t ede nè: 3«Kuwe-ɓee, Dé tɔl njéribe-dè-tàge lei a, dé tête ɗinger loo nyankuje-mese lei nang a tɔ. Man kuwe se kar’m á m’nain; dé sang le tɔl’m tɔ.» 4Nè ké tà ri á Nube ile’n de’t wa? Nube ile’n dè’t ede nè: «I se kari lé, nè m’ngonm kosdooge le’m aru ji sejimute loo dɔg. Dé nè nga d’ɔse keje de nang non mage le girkoje dooge ke rang ke ri’n nè Baal nga lé.» 5Ɗarinè géa, è titeke bè tɔ. Nube tɔr kalè dooge le’n se go kêmnoje le’n. 6E tɔr de se go kêmnoje le’n m se go kule ra de lé. Ke nè á né Nube tɔr de se go kule ra dege ɓaa, kêmnoje le’n nga è kêmnoje ke get lé. 7Ké tà nè nga gir’n è ri wa? Kosdooge ke Israel sangi le kade tà ɔr dè de’t non Nube’t, nè loo’n dum de. Nè né è bè géa, kalè dege ke ndêin bè ke Nube tɔr de á tà ɔr dè de’t. Gute kosdooge ke rang malang ɓaa unni mbi de dè tà’t le Nube, 8titeke dé ndang’n kêm Magtub’t ke tò se ninn’n d’ede nè: «Sár tee ɓila, Nube ade tàgir le de wɔi darr a, ade dé njé kum libege a, njé mbi beige a tɔ.» 9Ngar David géa, ndɔ ke tam tà nè ede nè : «Maje kade loo nyankuse le de tel è gum kuwe de a, tel è mbanran kunde de kade dé tuju’n a, tel è jig kade dé toso’n a, kade kure nyanra de ɔde’n kum de a tɔ. 10Maje kade kum de ndul ndáng-ndáng ade d’an loo lé. Ade dé ɗugu gide de nang se ndɔge malang a tɔ.» 11A ɓaa, ké m’a tam kede nè: Juipge ke jig tuge de ade awi tebel-tebel nga, ké à osoi njing nal kin-in ta wa? Ḿ-m̀, à osoi njing nal kin-in lé. Nè takul kaltà le Juipge á njé ke ei Juipge lé ingei kaje. Gir’n ke nè á Juipge rai jang se njé ke ei Juipge lé ke ingei kaje nga. 12Kaltà le Juipge tel è nonkar le dooge ke dè nang nè a, tel è nyanbaw le njé ke rang ke ei Juipge lé a tɔ. Bè ɓaa, kɔse ke ndɔn’t Nube à ade d’a d’ɔse nang kin dè koso’t le de nga, maje’n à è ngain dum le njé ke ei Juipge lé nè ɓai lé wa? 13E sei ke sei Juipge lé á ɗarinè m’a m’ade sei tà nè: Man m’ee njèkawkule le dooge ke ei Juipge lé. M’unn tà kule nè ngain tede è kule ke bò ke Nube ade’m. 14M’unn tà kule le’m titeke bè tá bainléa jang à ra’n ngakonmge ke ei Juipge kade maje’n njé ke nange dann de’t. 15Nube tur gide’n ade kos Juipge tede le kum’n nan’t bɔk se gute dooge ke rang ke dè nang nè. Juipge tooi asinan se dooge ke weii ɓá tàkum Nube’t. Kuwe ke ndɔn’t Nube à tel kuwe de ke rann’t nga, è titeke Nube ade d’unde loo dé tee dann njé ke koo’t bè. 16Ke nè á d’ugu dè mur ke desêin d’ade Nube ɓaa, gute mur bere mbak è ke tò se ninn’n. Ke nè á ngire kage è le Nube ɓaa, balkumnge ei le’n tɔ. 17Kos Juipge tooi asinan se kage olivier ke kêm ndɔr’t ke doo jeng balkum’n ke nange um kɔke. I ke i Juip lé nga, i tite kage olivier ke kêm kɔr’t ke doo tugei rɔti gute balkum olivier ke kêm ndɔr’t. I ite ɗarinè takul boté ngire kage ke kêm ndɔr’t. Kage ke kêm ndɔr’t nga, è Juipge. 18Bè ɓaa, i tuge kàdi dè balkum kage ke kêm ndɔr’t ke doo jeng um kɔke nga lé. Ke nè á i tuge kàdi ɓaa, ade kêmi olé titeke è i á ul ngire kage lé, nè è ngire kage á uli se boté’n. 19Bainléa a tam kede nè: «Balkum kagege nè nga, dé njeng de le rɔte’m man gute de’t.» 20E kum kuwe. Dé jeng de kɔke tede kunn mbi dè tà’t le de. I taa gute de takul kundekêm lei. I ti rai lé, nè unde kumkunju dè rai’t. 21Ke nè á Nube ngonm balkum kagege ke kêm ndɔr’t lé ɓaa, i géa ke nè á kundekêm lei goto ɓaa, bainléa Nube à inyei kade i nda lé tɔ. 22An! Nube è njè ra kêm-maje a, è njè ra ngang a tɔ. E ra ngang ngain se njé ke osoi. Nè i ɓaa, è ra sei kêm-maje. I géa, ke nè á unde kêmi dè kêm-maje’t le Nube lé ɓaa, d’ade tugei gangi tite balkum kage ke kêm ndɔr’t nè nga bè tɔ. 23Ke nè á Juipge inyei go kunn mbi dè tà’t le de ɓaa, d’a tel rɔte de gute de’t gugu ɓai. Nube aw se tɔgmong le tel rɔte de gugu karè. 24I ke i Juip lé nga, i i balkum kage ke dann kɔr’t. Dé tugei, dé rɔti dè kage olivier ke kêm ndɔr’t. Juipge ei balkum kagege ke kêm ndɔr’t; Nube à tel rɔte de dè jig de’t gugu kalang karè m loo’n à tur se’n lé. 25Ngakonmge, man m’ndige le kade i geri nyan ke tò loo ɓɔyɔn’t nè nga maje, nè bainléa a kin-in kan-in ra si ke njékumkunjuge. Kunn mbi dè tà’t le Juipge ke nange nga à tò bè sár kade dooge malang ke ei Juipge lé ingei kaje pa ɓita. 26Kêm ndɔn’t nè ɓita kosdooge malang ke Israel à ingei kaje titeke dé ndang’n kêm Magtub’t d’ede nè: «Njè taa dè dooge à in kêm ɓee-bò ke Sion le ree. A ade ngannkà Jacob à teli kilei koje dè Nube’t. 27E á è ndu’m ke m’a m’unn kade de loo ke ndɔn’t m’a m’ɔr’n kaiyage le de kɔke.» 28Juipge mbati Tà ke Maje teli ei njébange le Nube. Mbate Tà ke Maje le de nga tel è nonkar le si sei ke sei Juipge lé nga. Nè né è bè géa, dé kotárge le Nube tede ndu’n ke ndɔ ke unn ade kà dege kété mari nga. 29Dooge ke Nube ɓar de nga, è tel girtà ke rang dè de’t ndan lé a, nyan ke è ade de nga à tel taa ji de’t gugu ndan lé a tɔ. 30Sei nga kété sei njékaltà tà Nube’t. Nè ɗarinè, è ra se si kêmkanm ade ingei kêm tin mbit tede kaltà le Juipge. 31Darinè, Juipge ali tà tà Nube’t le kade ingei kêm tin mbit le Nube. Dé géa d’a d’inge kêm tin mbit le Nube titeke sei ingei nga tɔ. 32Kerɔte kuwe, Nube an dooge malang ke njékaltàge tede le kade dooge malang ingei kêm tin mbit le’n. 33Hai! nyanbaw le Nube nga bò ngain! Kumkunju se nyanger le’n nga ngei de goto! Tà gang le Nube nga dum kɔrgir a, nyange ke è ɔje nga doo ase ger gir lé a tɔ. 34Magtub ke tò se ninn’n tam ede nè: «Ké nan á ger tàgir le Kuwe-ɓee wa? Ké nan á è njèkede’n gostà wa? 35Ké nan á unn nyan ade Nube kété ɓita Nube ade’n made taa’n gute wa?» 36Oiyo, Kuwe-ɓee Nube kuwe á nyan malang in rann’t a, tò takul’n a, tò tede le’n a tɔ. Maje kade riɓar è le’n sár se non! Maje kade è titeke bè kuwe.

will be added

X\