NJE KE ROME 1

1Man Paul, ɓer kule le Jésu-Krist, Nube ɓar’m unde’m ke njèkawkule. Nube unde’m se ninn’n le kade m’ee njèkile mber Tà ke Maje le’n. 2Tà ke Maje nè nga Nube unn’n ndu’n kété mari ade njéribe-dè-tàge ke tànn’t titeke dé ndang’n tà’n kêm Magtubge ke tooi se ninn de. 3Tà ke Maje nè nga dé ndang d’ɔje dè Kuwe-ɓee le jéi Jésu-Krist, Ngonn Nube. Krist nga d’oje’n girkà’t le ngar David se go danra. 4Dé ger’n ke Ngonn le Nube se go Ndil-Kêmnda. Nube ade’n tɔgmong ade unde’n loo tee’n dann njé ke koo’t. 5Takul Krist á Nube uwe’n se jé noje ade j’ee’n njékawkulege le kade girkoje dooge malang undei kêm de dènn’t a, ilei riɓar dènn’t a tɔ. 6Sei dooge ke kêm ɓee-bò ke Rome nga géa, Nube ɓar sei le kade sei dooge le Jésu-Krist tɔ. 7Sei malang ke kêm ɓee-bò ke Rome nga Nube tár sei á ɓar sei kade sei dooge le’n ke i tooi se ninn si. Maje kade Bɔ jéi Nube se Kuwe-ɓee Jésu-Krist adi sei kêmnoje se kêmlom. 8Nyan ke desêin ɓaa, m’ra Nube le’m oiyo takul Jésu-Krist tede tà le si malang, tede kɔbe kundekêm le si toso se loo mbit-mbit bere mbak dè nang nè. 9Tede Nube ke m’ndi m’ra kule m’ade’n se ngarankêm’m bere mbak loo kile mber Tà ke Maje’t le Ngonn’n nga, ger titeke m’tam ngarankum tà. Loo ke m’ɔje tà se Nube ɓaa, m’ɓar ri si se ndɔge malang nonn’t. 10M’deje Nube se ndɔge le kade m’aw m’an sei se go kêmndige le’n. 11Kerɔte kuwe, ngur kaw kan sei ra’m pênn-pênn tede kaw kaya tà nyan-noje le Ndil-Kêmnda kade sei kade i ndaii dè nja si’t njáng. 12Eké le kade j’ulei dingem kêm nan’t dè kundekêm’t le jéi malang. Kundekêm le si à ra se’m a, kundekêm le’m à ra se si a tɔ. 13Ngakonmge, man m’ndige le kade i geri titeke m’ɔje le kaw ra si’t nja bule, nè sár ɗarinè m’inge loo kaw lé ɓai. M’ndige le kaw ra se si le kade kundekêm le si ɓeɓer titeke ndɔ ke m’ra’n se dooge ke rang ke ei Juipge lé nga tɔ. 14Gar-gar è tà le’m le kaw ra dooge’t malang: Njé nyangerge se njé ger nyan lége, njé gos kumkunjuge se njékumkunju lége a tɔ. 15Gir’n ke nè á, sei ke i ndii kêm ɓee-bò ke Rome nga géa, ngur kaw kile mber Tà ke Maje kade sei ra’m pênn-pênn tɔ. 16Ma m’ra rasɔl dè tà kile mber Tà ke Maje’t nga lé, tede è tɔgmong le Nube le kaje’n nanan ke um kêm’n dè’t, Juipge kuwe kété ɓita njé ke ei Juipge lé ɓai. 17Tà ke Maje nga tɔje jéi titeke Nube ɔr tà dè doo’t takul kundekêm, unn gir ndɔ ke desêin sár ndɔ ke ngeinn’t titeke dé ndang’n kêm magtub’t d’ede nè: «Doo à ndi kumgajer takul kundekêm.» 18Wong le Nube in danrán nú ree oso dè njé mbatennge a, se njé ra nyan se dè naje’n lége malang a tɔ, tede nyanra de ke majelé utu dè ngarankum tà. 19Nyan ke ase kade dooge geri Nube tò ndá’t ndái-ndái, tede Nube kuwe tee se gir ade de. 20Tɔgmong ke dum dè loo le Nube se danra Nube nga, ei nyange ke doo ase kan ndan lé. Nè unn gir kété mari loo kunde gir nyange ke dè nang nè nga, tɔgmong le’n se danra’n ke doo ase kan lé nga, tooi nata ndái-ndái ade dooge an-in nin se go nyankundege le’n. Bè ɓaa, loo kede gos le dooge goto ɗarinè ta. 21Tede ei geri Nube mbak kuwe, nè ilei riɓar dènn’t lé a, rai nin oiyo lé a tɔ. Nè né è bè géa, kile riɓar dè Nube’t a, ra’n oiyo a tɔ nga, ei nyange ke tuwe’n ɗêw kuwe. Kêm tɔ kuje tà lé urkei kêm ɓengre de’t ade tàgirge le de è ke raikarè. Gir’n ke nè á dé ndem’n d’ur’n dann tilkus’t. 22Dooge nè nga tami edi nè n’ei njékumkunjuge, nè ei mbege karè. 23Nube ke njèndi se non nga d’ile riɓar dènn’t lé, nè dé ɗɔi nyange ke dé ra de d’ade ei kum gute tà doo ke njè kwei tá. Taɓai dé ɗɔi nyange ke dé ra de d’ade ei kum gute tà helge, kum gute tà dange ke nja de è sɔ-sɔ a, kum gute tà nyange ke agi nang se tà kêm de a tɔ. 24Gir’n ke nè á, Nube inye’n de dann ngur nyange ke mine ke uri kei dè ɓengre de’t ade d’ile’n rasɔl dè danra de dé’t kuwe. 25Dooge teli ngarankum tà le Nube ke tà lanm. Ei ɗɔyi nyankundege le Nube a, ei rai ɓer le de titeke ei Nube ke Njèkunde nyange malang nga bè. Nube ke njèkunde nyange malang nga, maje kade dè’n mong káng-káng sár-sár se non. Maje kade è titeke bè kuwe. 26Gir’n ke nè á Nube inye’n de dann ngur nyan rasɔlge ke uri sire kêm de’t. Neen dege teli turi ra de dè nan’t tooi se nan. 27Dingemge géa è titeke bè tɔ. Ngur tò se nan ule por kêm de’t ade teli inyei go tò se dinye ɓaa, ei kuwe turi ra de dè nan’t tooi se nan. Nyan bann-bannge ke uri se de walé titeke bè nga, kure’n à ɔde kum de dé kuwe. 28Ngarakum ger Nube nga, dé ndige kum kêm de dè’t lé. Gir’n ke nè á Nube inye’n de dann tàgir’t ke se go rebe’n lé ade dé ra’n nyange ke kum ra lé. 29Nyanrage ke se dè naje’n lé gai-gai se kêmyêr, se kêmkein, se kêm majelé rusu kêm de njin-njin. Ngur tɔl doo, se tɔl nan, se tà sú kum nan, se nyanra ke majelé rusu kêm de njin-njin. 30Dé njé tam tede nange, njé kɔr Nube njêtge, njé taje nduge, njé kan nan ke nyan lége, njé ti ra dege, njékunde gir nyange ke kige ke majilé-majilé, njékaltà tà njékoje dege’t a tɔ. 31Dé njé tàgirge ke non-non a, se njé kum tà minye’t joo a tɔ. Ndige nan se kan kum ndoo le nan goto ra de’t. 32Dé ger tà ke Nube à gang dè’t mbak: Dooge ke njé ra nyange ke titeke bè nga, d’ase ndi kumgajer lé. Nè né è bè géa, dé ra nyange nè nga kum de ke kété-kété a, dé ndige se dooge ke rang dè nyanrage ke majelé’t a tɔ.

will be added

X\