LOOKILERA’N 9

1Loo ke doo ke danrán ke njèkon madennge’t mi kɔl burunju ɓaa, m’an kɔnyon karé ke ndɔ ke in danrán oso nang nè. D’ade’n lakêlé nyan kɔr tà bolè ke son’n goto. 2Kɔnyon nè nga teen tà bolè ke son’n goto. Ke loon’t nè kuwe, sà tee kem̂é tukuk-tukuk tite sà por mbo-bò bè. Sa tee utu kum loo ke dɔ lêt ade kàde tel tuge ndul bigm. 3Bêteĝe undei loo teei dann sà’t nè taai loo pel-pel dè nang nè. D’ade de tɔgmong ke tò asenan se tɔgmong le kuju-nang-ge ke dè nang nè. 4D’unn ndu de d’ade de le kade on-in walè se nyan ke tebe karé éké kage karé bè géa dè nang nè lé. Nè d’inye loo d’ade de le kade rai kum dooge ke nyankorji le Nube goto nat-non de’t ndoo. 5Taɓai, d’unn ndu de d’ade bêteĝe nè le kade tɔli dooge lé, nè le kade rai se de nyantosowur karè ase nan mi. Nyantosowur ke d’ade ra se dooge nga è tite tur le kuju-nang ke tuge doo bè. 6Kem̂ nange ke mi nè nga, dooge à sangi yo nè à ingei nin ndan lé. Dooge à ndingei yo, nè à an-in de le nda heb. 7Bêteĝe nè nga taai nan se sinde rɔge ke d’uwe dè nja le kaw’n rɔ’t bè. Dé tule jɔkɔ tête rɔ ke tò tite ɔr bè dè de’t a, tàkum de tanan se tàkum dooge bè a tɔ. 8Bin dè de tanan se bin dè dinyege bè a, gɔge de tanan se gɔge toboige bè a tɔ. 9Sɔl-kàde de tò tanan se der-rɔ ke nar bè. Ká bage de ɓar asenan se ká wotro rɔ ke sindege bule ndɔri se ngɔde-ngɔde awi ke loo rɔ’t bè. 10Tà ɓong de ate njêt tite ɓong kuju-nang-ge bè. Tɔgmong le de ke le ra’n se dooge nyantosowur ase nange mi nga, tò ɓong de’t. 11Ngar le bêteĝe nè nga è doo karé ke ndi kem̂ bolè ke son’n goto. Ngar le de nga, ri’n tà Hébreu nè «Abaddon», ke se tà grec ɓaa è «Apollyon», tel se tà koje jéi è «Njè tɔ ko dooge.» 12Nyankem̂kon ke desêin nga dere ɓá. An! nyankem̂konge ke rang joo à reei kuti go è ke nè ɓai. 13Doo ke danrán ke njèkon’t mute-mute kɔl burunju. M’oo ndu doo ɓar sɔbe dè kil ɗinger loo nyankuje-mese ke sɔ ke dé ra se nar-ɔr. Loo nyankuje-mese nè nga tò non Nube’t. 14Ndu doo ke m’oo nga tam se doo ke danrán ke njèkon madennge’t mute-mute ke uwe burunju jinn’t ede nè: «I tutu dooge ke danrán ke sɔ ke dé tɔ de dè ba ke bò ke ri’n nè Euphrate inye de dɔ.» 15Dooge ke danrán ke sɔ ke dé tutu de d’inye de dɔ nga ndii dè nja de’t tchên nginei kàde’n, ndɔ’n, nan’n se ɓal’n a tɔ, le kin-in kawi tɔli debe dooge ke karé dann ke mute’t. 16Kɔr njérɔge ke awi se sindege nga d’ede’m d’ade m’oo. Kɔr de malang nga dum mbɔje. 17Dé tɔje’m sindege nè nga d’ade m’an de se go nyanpinde. Njé kal dege otoi der ke ker tite por a, ke ndul tite hel ban-an a, se ke ker jengleng ji de’t a tɔ. Dè sindege nè nga tò tite dè toboige bè. Por se sa a, nyan ker jengleng tite ndon por bè ube tà de’t ngɔk-ngɔk. 18Nyange ke gir mute ke teei tà sindege’t nga tɔli debe dooge ke karé dann ke mute’t kɔke. 19Tɔgmong le sindege nè nga è tà de’t a, ɓong de’t a tɔ. Ɓong de tò asenan se lige bè. Ɓong de nga dè’n tò tutu. Tɔgmong ke dé ra’n kum dooge ndoo nga, è ɓong de’t. 20Gute dooge malang ke por se sà por a, se nyan karé ke ker jengleng tɔl de lé nga mbati turi hal de. Ei ɗɔyi ndilge ke majelé a, se mage polége ke asi kan-in loo éké kooi tà éké njiyei lé a tɔ. Mage polége nè nga, è dé dooge nè kuwe á dé leen de se nar-ɔr, se nar-nda, se ninge-kase éké se mbal éké se kagege ke dé tɔl a tɔ. 21Dooge nè nga mbati kinyei go tɔl dooge se ra nyan mbelige, se tò se nan ke kaiya’t, ei mbati kinyei go ɓoge le de a tɔ.

will be added

X\