LOOKILERA’N 8

1Loo ke Ngonn bate tutu tà nyankorji ke njèkon’t ji sejimute nga ɓaa, ká loo ke danrán tel pa keng ase ngann kàde kɔr-mute. 2Go’t gugu ɓaa, m’an dooge ke danrán ji sejimute ndai non Nube’t. D’ade de burunju ji sejimute ji de’t karé-karé. 3Doo ke danrán karé ke rang ree nda ngɔr se ke dè ɗinger loo nyankuje-mese. E uwe bai ró katchatcha jinn’t. Doo ke danrán nè nga d’ade’n katchatcha ngain kade unn ade nan’t se kɔje-tà se Nube le dooge malang ke ɔji se’n dè ɗinger loo nyankuje-mese’t. Ɗinger loo ke ra se nar-ɔr nè nga tò ngɔr se kutu-ngar. 4Sà katchatchage ke ró tee tukuk-tukuk ji doo ke danrán’t nè nga aw non Nube’t nan’t se tà kɔje ke dooge le’n malang ɔji se’n nga. 5Doo ke danrán nè nga uge yal por ke dè ɗinger loo nyankuje-mese’t kem̂ bai ró katchatchage’t ade rusu neĵ ɓaa, è lɔke ile piring dè nang nè. Ke loon’t nè kuwe, ndi ndang a, têl a, ndu dooge ɓar wuu-wuu a, nang unn gir yei ɓuk-ɓuk a tɔ. 6Dooge ke danrán ke ji sejimute ke d’ade de burunjuge ji sejimute ji de’t karé-karé nga, uwei dè nja ra de le kɔli burunju. 7Doo ke danrán ke desêin dann njé ke ji sejimute’t nè nga kɔl burunju ɓaa, ke loon’t nè kuwe, ndi kɔtche ede se por a, se mese a tɔ, nan’t dè nang nè. Debe nang ke karé dann madege ke mute’t nga, por ró rák-rák. Walè ke tebe bere mbak géa por ró’n rák-rák a tɔ. Debe kagege karé dann madege ke mute nga géa, por ró de rák-rák a tɔ. 8Loo ke doo ke danrán ke njèkon’t joo kɔl burunju ɓaa, d’ade nyan karé ke tanan se mbal ke bòi ke taa por bilm-bilm ɔr ɓarak oso dann ba-bò kate’t. Debe ba-bò kate karé dann madege ke mute’t tel mese. 9Debe nyankundege karé dann madege ke mute’t ke awi kumgajer dann ba-bò kate’t weii kabak. Debe batoge ke karé dann madege ke mute’t tuju kɔke. 10Doo ke danrán ke njèkon’t mute kɔl burunju. Ke loon’t nè kuwe, kɔnyon ke bòi ke on por njoi-njoi tite lampe bè in danrán oso nang. Kɔnyon nè nga oso dè debe ba karé’t dann madege ke mute’t se dè ngur mannge’t a tɔ. 11Ri kɔnyon nè nga è Absinthe, ate karar. Debe mann ke karé dann madege mute’t tel ate karar. Dooge ngain weii tede kate ke mannge nè teli ati karar. 12Loo ke doo ke danrán ke njèkon’t sɔ kɔl burunju ɓaa, debe kàde se nan se kɔnyonge ke karé dann madege ke mute’t ingei dò ade ndogó le de ke debe karé dann ke mute’t tel tuge ndul bigm. Ndogó le lookar se dann ndɔ ke karé dann madege ke mute’t teli tugei ndul bigm. 13M’an loo gerer ɓaa, m’oo ká kiro ke nel bage aw dann danran’t danné bɔp. Kiro nè nga tam tà se ndu’n ke bòi bèng ede nè: «Sei dooge malang ke i ndii dè nang nè nga, a an-in ɓai! a an-in ɓai! loo ke dooge ke danrán ke mute ke nan-in à unni gir kɔli burunjuge le de!»

will be added

X\