LOOKILERA’N 4

1Go nyange’t nè nga ɓaa, m’an tàbit kei karé ke danrán teen. M’oo ndu doo ke ndɔ ke tam se’m tà nga ɓar tite burunju bè. Doo nè nga tam se’m ede nè: «Al ke ram’t nè ade’m tɔji nyange ke à reei kuti go nyange nè nga gar-gar.» 2Ke loon’t nè kuwe, Ndil lá’m mêtch uwe’m ɓaa, m’an kutu-ngar karé ke d’unde kem̂ danran’t. Doo karé ndi dè kutu-ngar’t nè nga. 3Doo ke ndi dè kutu-ngar’t nga ra’n ndoin kein-kein asenan se herge ke ɓal ke ri de nè Jaspe se Sardoine. Munde-ba ke ndul turuk-turuk tite her ke ri’n nè Emeraude bè an-in dè kutu-ngar’t nè nga ulei nan’t wàk. 4Dé tunde kutu-ngarge ke rang kɔr-joo-gidé-sɔ d’an-in’n dè kutu-ngar ke karé nè nga d’ule nan’t wàk. Ngatɔgege kɔr-joo-gidé-sɔ tulei kubuge ke nda káng-káng a, tulei jɔkɔ tête rɔ ke dé ra se nar-ɔr dè de’t ndii dè kutu-ngarge’t nè nga tɔ. 5Ndu doo ɓar beng-beng a, ndi têl a, ndang a tɔ, tu kutu-ngar ke karé ke madege an-in dè’n ulei nan’t nga. Lampege ji sejimute ndogói kotong non kutu-ngar’t nè nga. Lampege ke ji sejimute nga ei Ndilge ke ji sejimute le Nube. 6Ba-bò kate karé ke unju njai-njai tite nyan karé ke ri’n nè Cristal bè tò non kutu-ngar’t nè nga tɔ. Nyankundege sɔ ndai dann kutu-ngar’t danné bɔp a, ndai ngangé-ngangé a tɔ. Nyankundege ke sɔ nè nga kum de bule nan ndari-ndari non de’t a, go de’t a tɔ. 7Nyankunde ke desêin tanan se toboi, njèkon’t joo tanan se ngonn mang, njèkon’t mute ɓaa, kum’n tanan se kum doo, njèkon’t sɔ ɓaa, tanan se kiro ke nel bage’n bè. 8Nyankundege ke sɔ nè nga awi se bage de mute-mute karé-karé malang, kum de bule ndari-ndari dè bage de’t se gir bage de’t a tɔ. Loo taa kebe le de goto sár. Ndɔɔ a, kada a, ɔsi pa ilei riɓar dè è ke ndi dè kutu-ngar’t edi nè: «Njè tò se ninn’n, njè tò se ninn’n, njè tò se ninn’n nga è Kuwe-ɓee Nube ke Njètɔgmong ke dum dè loo, è ke njè ndi tutu kété mari sár ɗarinè a, ndi à ree sei non a tɔ.» 9E ke njè ndi dè kutu-ngar’t se lo’n-lo’n sár se non nga, dange ke sɔ nè ulei ndubra se riɓar dènn’t a, rai nin oiyo a tɔ. 10Ngatɔgege ke kɔr-joo-gidé-sɔ nè nga ɔsi keje de nang non è ke ndi dè kutu-ngar’t. Ngatɔgege nè nga ulei dè de nang ɗɔyi njèndi kumgajer sár se non nga. Dé tɔr jɔkɔ tête rɔ le de d’um nang non kutu-ngar’t d’ede nè: 11«Kuwe-ɓee Nube le jé, i asekum kinge ndubra se riɓar a, se tɔgmong a tɔ. E i kuwe á i njèkunde nyange malang. E se go kem̂ndige lei i kuwe á unde’n nyange malang ade tooi tutu.»

will be added

X\