LOOKILERA’N 22

1Doo ke danrán tɔje’m ba karé ke an-in mann’n ɓaa, a i ndi kumgajer; mann ba nè nga unju njai-njai tite nyan karé ke dé ɓar’n Cristal bè. Ba nè nga in gir kutu-ngar’t le Nube se le Ngonn bate. 2Mann ba nè ule dann ndá-loo ke kem̂ ɓee-bò’t nè nga. Kage karé ke d’use dé ndii’n kumgajer nda dè kong ba’t ke nú’t a, ke nè’t a tɔ. Kage nè nga ann nja dɔg-gidé-joo kem̂ ɓal karé, nan karé ɓaa ann nja karé tɔ. Mbi kage nè nga è kuge kɔr ratur ra girkoje kosdooge se dè ɓee-dè ɓee. 3Nyan karé bè ke à ade Nube à gangtà dè dooge ke kem̂ ɓee-bò’t nè nga goto ta. Kutu-ngar le Nube se le Ngonn bate à tò kem̂ ɓee-bò’t nè nga. Ɓer kulege le Nube à ɗɔyi nin. 4Ɓer kulege le Nube à an-in nin se kum de a, ri’n à tò nat-non de’t a tɔ. 5Ndɔ à tel kil kem̂ ɓee-bò’t nè nga ndan lé ta. Ɓer kulege le Nube à awi ndoo ndogó le lampe éké le kàde nga lé ta. E Kuwe-ɓee Nube kuwe á è lookar le de a, d’a d’on ɓee sár se non. 6Doo ke danrán ede’m ede nè: «Tàge nè nga ei ngarankum tàge ke get ke le taa kum kem̂ de’t kuwe. Kuwe-ɓee Nube ade Ndil-kem̂nda ule tà tà njéribe-dè-tàge le’n. E ule doo le’n ke danrán le kade tɔje ɓer kulege le’n titeke ngɔr ɓaa, nyange nè nga gar-gar à teei kuwe.» 7Jésu ede nè: «Ooi maje, m’a m’tel ree ngɔr. Doo ke ngonm tà ke tà Nube’t ke dé ndang kem̂ magtub’t nè nga sêw-sêw ɓaa, ra’n à nel’n kuwe!» 8E man Jean kuwe á m’oo tà nè se mbi’m a, m’an nyange nè se kum’m a tɔ. Loo ke m’oo tà nè a, m’an nyange nè bè ɓaa, m’oso nang nja doo ke danrán ke kété tɔje’m nyange nè nga le ɗɔi’n. 9Nè è ede’m ede nè: «Ebe rai ra nyan titeke bè! Man m’ee ngonn njèkule madi a, m’ee njè made kule le ngakoin ke njéribe-dè-tàge ke tà Nube’t. Man m’ee njèmade kule le njé ke ngonmi tàge ke dé ndang kem̂ magtub’t nè sêw-sêw. Nube á maje kade i ɗɔi’n gar-gar!» 10Doo ke danrán nè nga tel ede’m ede nè: «Tàge ke tà Nube’t ke dé ndang kem̂ magtub’t nè nga, maje kade i ɓɔyɔ dè lé, tede ndɔ ke kade nyange nè teei nain ngɔr ta. 11Doo ke è njè ra nyan ke se dè naje’n lé ɓaa, maje kade aw kum’n ke kété dè nyanra ke nal najenn’t le’n nga ɓaa, ndɔn’t à an ɓai. Doo ke ndi se ra’n ke mine ɓaa, maje kade aw kum’n ke kété dè nyan ke mine’t le’n nga ɓaa, ndɔn’t à an ɓai. Doo ke è njè ra nyan ke se naje’n nga, maje kade aw kum’n ke kété dè nyanra ke se dè najenn’t le’n nga. Doo ke ndi tede le Nube nga, maje kade aw kum’n ke kété dè ndi tede le Nube’t le’n nga a tɔ.» 12Jésu ede nè: «Oo maje, man m’tel ree ngɔr. M’a m’aw se nyankuge dè ji le’m jim’t tede kuge’n dè ji dooge karé-karé malang se go kule ra de, ra de. 13Man nga m’ee ke desêin a, ke ngeinn’t a tɔ. Man m’ee loo kunde gir nyan a, loo tɔl ngang nyan a tɔ. 14Njé ke togoi kubu le de ke bòi yul-yul nga, ra de à nel de kuwe. Ei asikum kuse kann kage ke doo à ndii’n kumgajer nga a, à asi kingei tà rebe kaw kem̂ ɓee-bò’t nè nga a tɔ. 15Nè njé ra nyan rasɔlge se njé ra nyan mbelige se njé tò se nan ke kaiya’tge se njé tɔl dooge se njé polé magege a, se njé ndige tà lanm éké tami tà lanm se ndɔ de, ndɔ de a tɔ nga, à nain-in gide ɓee-bò’t nata. 16Man Jésu kuwe á m’ule doo le’m ke danrán kade aw ɔrgo tà nyange nè ade sei njétaakem̂-Kristge malang loo kebe nange’t le si. Man m’ee ngonnkà David a, m’ee mbonron lookar a tɔ.» 17Ndil Nube se dinye ke njè ngaw kige nga tami edi nè: «I ree.» Doo ke oo tà nè ɓaa, maje kade tam ede nè: «I ree.» Doo ke kunde mann on’n ɓaa, maje kade ree taa mann an-in. Doo ke ndige taa mann kan-in ndii’n kumgajer ɓaa, à inge karé m à ndogo lé. 18Dooge malang ke ooi tàge ke tà Nube’t ke dé ndang kem̂ magtub’t nè nga, man Jean m’ede de ndàt: Ke nè á doo ile tà karé ke rang dann tàge nè ɓaa, Nube à ra se’n nyantosowur ke dé ndang tà’n kem̂ magtub’t nè nga ɓai. 19Ke nè á doo ɔr nyan karé dann tàge ke tà Nube’t ke tò kem̂ magtub’t nè ile ngang karé ɓaa, Nube à ɔge’n kuse kann kage ndikumgajer nè éké à ɔge’n kile nja’n kem̂ ɓee-bò ke tò se ninn’n ke dé ndang tà’n kem̂ magtub’t nè nga. 20Jésu ke njèkɔrgo tà nyange nè nga tam ede nè: «Oiyo, m’a tel ree ngɔr.» Maje kade è titeke bè kuwe, Kuwe-ɓee Jésu, i ree. 21Maje kade kem̂noje le Kuwe-ɓee Jésu nain se si malang.

will be added

X\