LOOKILERA’N 21

1Taɓai, m’an loo gerer ɓaa, m’an danran ke kige tede danran ke desêin se nang ke desêin gotoi njêl karè. Ba-bò kate géa goto njêl karè a tɔ. 2M’an Jérusalem ke kige, è ɓee-bò ke tò se ninn’n ke in danrán ra Nube’t rise nang. Ɓee-bò nè nga tò asenan se ngomande ke ra ra’n mande tàkum ngawn’t bè. 3M’oo ndu doo ɓar beng se ke dè kutu-ngar’t ede nè: «An! kei kubu le Nube nga è dann dooge’t! Nube à ra ɓee se dooge a, d’a dé kosdooge le’n a tɔ. E Nube kuwe á nain se de a, à è Nube le de kuwe a tɔ. 4Nube à tise mann non kum de’t ndát-ndát. Yo se kumndoo yo se kem̂kon à gotoi njing se non. Non se wuwi à ɓar gugu bè lé njing ta. Nyange ke mari gotoi njêl karè.» 5E ke ndi kɔte kutu-ngar’t nga tam ndàt ede nè: «An! nyange malang nga, m’tel m’ra de gugu kige.» Taɓai, è ede’m ede nè: «I ndang tàge nè nga tede ei ngarankum tàge ke get ke le taa kum kem̂ dè’t kuwe.» 6Taɓai, è tel ede’m ede nè: «Girtà gang ɓá ta. Man nga, m’ee ke desêin a, m’ee ke ngeinn’t a tɔ. Man nga m’ee loo kunde gir nyan a, loo tɔl ngang nyan a tɔ. Doo ke kunde on’n ɓaa, m’a m’ade’n ngur mann ndikumgajer kade an-in karè m à ndogo lé. 7Doo ke tête rɔ ɓaa, m’a m’ade’n nyan nè nga kuwe. M’a m’ee Nube le’n a, à è ngonn’m ke dingem a tɔ. 8Nè njé ɓelge, njé kunn mbi dè ta’tge, njé ra nyange ke tò yêr, njé tɔl dooge, njé tò se nan ke kaiya’tge, njé ra nyan mbelige, njé polé magege se njé tà lanmge nga, loo le de à è dann por nyan ke ker jengleng ke on se laa’n bilm-bilm tɔ. Por ke on se laa’n bilm-bilm á è yo ke njèkon’t joo.» 9Dooge ke danrán ji sejimute uwei baige ji sejimute ji de’t ndai. Bai wong nè nga, nyantosowurge ji sejimute rusi kem̂ neĵ-neĵ. E karé dann de’t ree tam se’m ede nè: «I ree laa ade m’tɔji njènong ke è dinye le Ngonn bate ke taa’n ke kige nga.» 10Doo ke danrán nè nga unn ndil’m seen aw se’m dè mbal ke bòi ke ngal lêng-lêng. E tɔje’m ɓee-bò ke tò se ninn’n gai. Ɓee-bò nè nga è Jérusalem ke in ra Nube’t danrán á ree. 11Ɓee-bò ke tò se ninn’n nè nga ndubra le Nube ndogó dènn’t kotong. Loo ke kem̂ ɓee-bò’t nè ndolé kein-kein tite her ke ri’n nè Jaspe, ke unju nyang-nyang a, gate’n è ngain a tɔ. 12Ɓee-bò nè d’ile geng-bɔr ke bò a, ngal a, d’an-in’n dè’n. Geng-bɔr nè nga tà rebennge ei dɔg-gidé-joo. Dooge ke danrán dɔg-gidé-joo ndai tà rebe geng-bɔr’t nè nga karé-karé malang. Dé ndang ri girkà le Israel ke dɔg-gidé-joo tà rebe’t karé-karé malang. 13Tà rebe ke loo tee’t le kàde è mute. Tà rebe ke loo kur’t le kàde è mute, dè jikon tà rebe è mute a, dè jigel géa tà rebe è mute a tɔ. 14Geng-bɔr le ɓee-bò nè nga, d’unde gir’n dè mbalge ke dɔg-gidé-joo. Dé ndang ri njékawkulege ke dɔg-gidé-joo le Ngonn bate dè mbalge’t nè nga karé-karé malang. 15Doo ke danrán ke tam se’m tà kété nga, uwe kage mbɔje nyan jinn’t. Kage mbɔje nyan ke uwe jinn’t tede le mbɔje’n ɓee-bò se tà rebege le ɓee-bò a, se geng-bɔr le’n a tɔ. Kage mbɔje nyan ke jinn’t nga, dé ra se nar-ɔr. 16Ɓee-bò nga d’unde kil’n loo sɔ d’ade ngal’n a, laa’n a, asi nan deĵ. Doo ke danrán mbɔje ɓee-bò nè se kage mbɔje nyan ke jinn’t nga ɓaa, ngal’n ke nang se laa’n, se ngal’n ke dɔ a tɔ nga, ase kurloo aru dɔg loo joo se gide ke aru joo se kɔr-joo-gidé mige bè. 17Doo ke danrán mbɔje geng-bɔr ke d’unde d’an-in’n dè ɓee-bò nè nga. Ngal’n ke dɔ è kil ji doo aru se kɔr-sɔ-gidé-sɔ se nyan mbɔje nyan ke tò ji doo ke danrán’t nè nga. 18Geng-bɔr le ɓee-bò nè nga, d’unde se her Jaspe ke ɓal ke ker se ke ndul turuk-turuk a, ker ke yede mann sinde a tɔ. Loo ke kem̂ ɓee-bò nè nga ndolé kein-kein tite nar-ɔr ke deri a, ndolé kein-kein tite mede-kɔtche bè a tɔ. 19Gir geng-bɔr le ɓee-bò nè nga, d’unde se herge ke se ri de, ri de ke gate de è ngain. Her ke desêin ke tɔr ɓál nga ri’n nè Jaspe, è ke njèkon’t joo ri’n nè Saphir, è ke njèkon’t mute ri’n nè Calcédoine, njèkon’t sɔ ri’n nè Eméraude, 20Njèkon’t mi è Sardoniks, njèkon’t mute-mute è Sardoine, njèkon’t ji sejimute ri’n nè Chrysolite, njèkon’t sɔsɔ ri’n nè Béryl, njèkon’t jisɔ-jimi è Topaze, njèkon’t dɔg ri’n nè Chrysoprase, njèkon’t dɔg-gidé-karé è Hyacinthe, njèkon’t dɔg-gidé-joo ri’n Améthyste. 21Tà rebe geng-bɔr ke dɔg-gidé-joo nga è mede-ngar ke dɔg-gidé-joo. Tà rebe karé tò ɔje dè mede-ngar karé tɔ. Ndá-loo ke kem̂ ɓee-bò’t nè nga dé ra se nar-ɔr ke deri ke ndolé kein-kein tite mede kɔtche bè. 22M’an kei ke tò se ninn’n le Nube kem̂ ɓee-bò’t nè nga lé, tede Nube ke njè tɔgmong a, Ngonn Bate a tɔ nga kuwe á ei kei ke tò se ninn’n le Nube. 23Ɓee-bò nè nga aw ndoo kàde éké nan ke nyan-ndogó le’n lé. Nè Nube kuwe è nyan-ndogó le’n a, Ngonn bate á è lampe le’n a tɔ. 24Girkoje kosdooge se dè ɓee-dè ɓee à njiyei takul lookar le’n. Ngar-ɓeege ke dè nang nè à reei se nyanbawge le de kadi ɓee-bò nè nga. 25Tà rebege le geng-bɔr nè nga doo à utu kada ndan lé, tede ndɔ à tel kil tutu gugu ndan lé. 26Gir kosdooge se dè ɓee-dè ɓee à reei se nyankingege se nyanbawge le de kadi ɓee-bò nè nga. 27Nyan ke mine ke rara karé bè géa à aw kem̂ ɓee-bò’t nè nga ndan lé. Doo ke njé ra nyan ke yêr éké njè tam tà lanm se ndɔ’n-ndɔ’n nga à ile nja’n kem̂ ɓee-bò’t nè nga ndan lé a tɔ. Nè njé ke dé ndang ri de kem̂ magtub ndikumgajer’t le Ngonn Bate kuwe karé á à ilei nja de kem̂ ɓee-bò’t nè nga.

will be added

X\