LOOKILERA’N 20

1Go’t gugu, m’an doo karé in danrán rise nang. E uwe lakêlé kɔr tà be ke son’n goto jinn’t. Doo ke danrán nè nga uwe sul ke mong mêr-mêr jinn’t nda’n. 2E uwe dan-kɔbe ke è li ke mari, ke njè tête tà kunde tà dooge’t a, se njèkɔse tà se dooge a tɔ nga mêtch, tɔɔ’n se sul njanm-njanm ase loge aru dɔg. 3Taɓai, è uwe’n ile’n piring kem̂ be ke son’n goto’t, utu tà’n a, ɔse nyankorji le’n tà be nè nga a tɔ. Doo ke danrán ra titeke bè tede le kade dan-kɔbe inge loo libe kum girkoje dooge ke se dè ɓee-ɓee nga gugu ndan lé sár kade loge ke aru dɔg nga ase’n deĵ. Go’t gugu ɓita, gar-gar d’a tutu’n kinye’n dɔ mbɔr ɓai. 4M’an dooge ndii dè kutu-ngar’t. D’inye loo d’ade de le kade gangi tà dè dooge’t; taɓai, m’an dooge ke ndɔ ke dé jeng kɔbe de se kunge dé tɔl de tede kem̂ de ke ndɔ ke undei dè tà’t le Krist a, dè tà’t le Nube a tɔ. Taɓai, m’an dooge ke ndɔ ke ulei dè de nang non dan’t ɗɔyi nin lé éké ke non nyan ke dé ra dé ndaje’n dan nè nga lé a tɔ. Dé nè nga, dé dooge ke ndɔ d’unde nyankorji le dan nat-non de’t éké da ji de’t lé a tɔ. Dé tel dé ndikumgajer a, d’on ɓee nan’t se Krist loge aru dɔg. 5E ke nè á è kunde loo tee dann njé ke koo’t ke desêin. Gute njé ke koo ke nan-in nga, looge aru dɔg nè à dere pa ɓita à undei loo ke le de le teei dann njé ke koo’t ɓai. 6Njé ke tooi se ninn de ke undei loo teei desêin dann njé ke koo’t nga, ra de à nel de. Yo ke joo à on ɓee dè de’t ndan lé ta. D’a dé njékuje nyan-mesege le Nube a, se le Krist a tɔ. D’a d’on ɓee se Krist nan’t loge aru dɔg. 7Loo ke loge aru dɔg nè nga ase deĵ ɓá ɓaa, d’ɔr njèkɔse tà se dooge dangai’t le’n, dé tutu’n d’inye’n dɔ. 8Njèkɔse tà se dooge à unde loo tee le libe kum girkoje dooge se dè ɓee-ɓee dè kum nang ke sɔ’t. E ɔse nja Gog se Magog nan’t tede kaw rɔ’n. Dooge le’n ke ɔse nja de nan’t le kaw kile’n rɔ nga, kɔr de bule asenan se nyeenger ke tà ba-bò kate’t. 9D’unn laa nang nè lát-lát, d’an-in’n dè loo ndi njérɔge le kosdooge le Nube a, se dè ɓee-bò ke Nube tár’n ngain nga king-king a tɔ. Nè ke loon’t nè kuwe, por in danrán ree ró de rák-rák. 10Njè tête tà kunde tà dooge’t se njè libe kum de nga, d’uwe’n d’ile’n patak dann por nyan ke ker jengleng, ke on se laa’n bilm-bilm nga, ndɔ ke kété d’ile dan se njè ra ra’n ke njèribe-dè-tàge ke tà Nube’t danné. D’a d’ade nyantosowur à ra de kada a, ndɔɔ a, se ɓal-ɓal sár se non. 11Go’t gugu, m’an doo karé bè ndi dè kutu-ngar ke nda ke bòi’t. Nang se danran ɔti an-in nan tà kum’n ta. 12M’an njé ke weii, dooge ke bò se ngann dooge ndai non kutu-ngar’t nè nga. D’uwe tà magtubge dé teen. Magtub karé ke ɔje dè ndikumgajer nga géa, dé teen tà’n tɔ. Go’t gugu, dé gangtà dè njé ke koo’t ɔje’n dè kule ra de, ra de, se go nyange ke dé ndang tà’n kem̂ magtub’t nè nga. 13Njé ke koo ke ndɔ ke rai ɓee dann ba-bò kate’t nga, ba-bò kate ree se de ɓuku de nata. Njé ke koo ke ndii se yo ɓee le yo nga géa, yo se ɓee le yo reei se de ɓuki de nata a tɔ. Nanan géa dé gangtà dènn’t se go kule ra’n, ra’n. 14Yo se ɓee le yo nga, dé tile de patak-patak dann por ke laa tong-tong’t. Yo ke njèkon’t joo nga, è por ke laa tong-tong. 15Doo ke rara ke dé ndang ri’n kem̂ magtub ndikumgajer’t nè nga lé ɓaa, d’a kile’n patak dann por ke on se laa’n bilm-bilm nè nga tɔ.

will be added

X\