LOOKILERA’N 19

1Go nyange’t nè nga, m’oo ndu doo ɓar danrán beng tite ndu kosdoo-bulege bè ede nè: «Alléluia! i piti Kuwe-ɓee le jéi, tede kaje a, se ndubra a, se tɔgmong a tɔ ei le’n è kuwe. 2Gangtàge le’n è se dè naje’n kerɔte kuwe! Nube gangtà dè ɓee-bò’t nè ke ndɔ ke dooge ke kem̂é ei njé tooi se nan ke kaiya’t nga. Nube gangtà dè ɓee-bò’t nè nga tede tɔl ke ndɔ tɔli ɓer kulege le’n ade mese de an-in nang.» 3Kosdoo-bulege nè nga teli tami ke njèkon’t joo edi nè: « Alléluia! I pitii Nube! Sà por ke ró ɓee-bò nè rák-rák nga su tukuk-tukuk se ɓal-ɓal sár se non.» 4Ngatɔgege ke kɔr-joo-gidé-sɔ se nyankundege ke sɔ nga ɔsi keje de nang non Nube ke ndi dè kutu-ngar’t ɗɔyi nin edi nè: «Amen! Maje kade è titeke bè kuwe! I piti Kuwe-ɓee!» 5Ndu doo ɓar se ke dè kutu-ngar’t ede nè: «Sei ɓer kulege le Nube le jéi malang, sei ngannge se dooge ke tɔgege ke i ɓeli ndil’n nga, ɔsi pa i pitii nin!» 6M’oo ndu koosdoo-bulege ɓar asenan se ká mann ba-bòge a, ɓar tite ndi ke ndang se tɔg’n bè a tɔ, ede nè: «I piti Kuwe-ɓee! I piti Kuwe-ɓee Nube le jéi ke njè tɔgmong nga tede taa konɓee jinn’t ɗarinè ɓá ta! 7Jè rai ranel a, j’ali ra jéi a, j’ɔsi pa j’ilei riɓar dè Nube’t a tɔ. An! ndɔ ra nan taa nan le Ngonn Bate nga ase ɓá! Njènong le’n nga géa uwe dè nja ra’n ɓá a tɔ. 8Njènong le Ngonn bate nga d’ade’n kubu ke sɔl lom-lom, ke nda káng-káng a, ke unju nyang-nyang a tɔ, d’ade ule rann’t. Kubu ke nda káng-káng nè nga ei nyanrage ke se dè naje’n le dooge le Nube ke tooi se ninn de.» 9Doo ke danrán ede’m ede nè: «I ndang tà nè nga: Njé ke dé ɓar de loo mur dann ɓee’t le Ngonn bate nga, ra de à nel de.» Taɓai, è ede’m ede nè: «Tàge nè nga ei ngarankum tàge le Nube kuwe.» 10M’oso nang nja doo ke danrán’t nè nga rap, m’ule dè’m m’ade’n. Nè è tel ede’m nè: «Ebe’t ra titeke bè, tede man nga m’ee made-ɓer kule lei a, le ngakoinge ke njékɔrgo tàge le Jésu a tɔ. Gar-gar, i ɗɔi Nube.» Ngarankum tà ke Jésu ɔrgo nga, è tà ke ndɔ ke Ndil ule tà njéribe-dè-tàge ke tà Nube’t ade tami. 11Go’t gugu, m’an danrán teen tà’n. An! ke loon’t nè kuwe, sinde-gaglam unde loo tee pitring se doo gidenn’t. Doo ke al dènn’t nga, dé ɓar’n Ngarankum Maje kule. E gangtà a, rɔ se dè naje’n a tɔ. 12Kum’n on por njoi-njoi asenan se por bilm-bilm bè. Jɔkɔ tête rɔ bule tò dènn’t a tɔ. Dé ndang ri ke doo karé bè géa ger lé dènn’t. Ri nè nga è kuwe se kar’n á ger. 13Kubu ke ule rann’t nga è ke d’ule dann mese’t. Doo nè nga ri’n nè «Tà le Nube.» 14Njérɔge ke danrán ali sinde-gaglam ndolèi goo’n. Njérɔge nè nga tulei kubu ke nda káng-káng, ke unju nyang-nyang ra de’t. 15Kuye kaskar ke bòi bember ke tà’n ate njêt unde loo tee tà doo’t nè nga, tede jeng girkoje dooge ke se dè ɓee-ɓee dè nang nè. E è kuwe á ul de a, ɔr non de se kage-tɔse ke nar a tɔ. E à raje de ráj-ráj ndɔ wong bò’t le Nube ke njè tɔgmong, titeke doo raje’n kul nduu kem̂ nyan mboré mann nduu’t bè tɔ. 16Doo ke danrán ke al dè sinde-gaglam’t nga, dé ndang ri doo tu kubu’t le’n ke bòi yul a, dè bingenn’t a tɔ, d’ede nè: «Ngar dè ngarge a, Kuwe-ɓee le kuwe-ɓeege a tɔ.» 17Taɓai, m’an doo ke danrán karé nda se nja’n dɔ kum kàde’t. E tam tà se ndu’n ke bòi beng ede helge malang ke in-in se bage dann danran’t danné bɔp, ede nè: «Ɔsi nja nan, i reei tà mur dann ɓee ke bò’t le Nube! 18I reei tede kade usei danra ngar-ɓeege se njékan dè njérɔge, njé tɔgmong-ge se sinde-rɔge a, se njé kal dege a tɔ. I reei usei danra dooge malang, njé ndii dè de palge se ɓerge, se ngann dooge a, se dooge ke tɔge a tɔ.» 19M’unn kum’m ɓaa, m’an dan se ngar-ɓeege ke dè nang nè ɔši nja njérɔge le de nan’t káng-káng le kawi kosoi rɔ ra è ke ndi dè sinde-gaglam’t se njérɔge le’n. 20Dan se è ke njè ra ra’n ke njèribe-dè-tàge ke tà Nube’t nga, d’uwe de joo mbak. E ke njè ra ra’n ke njèribe-dè-tàge ke tà Nube’t nga ndɔ ke è ra nyankɔbege gai-gai tàkum dan’t nè libe’n kum dooge ke nyankorji le dan tò ra de’t a, ke ɗɔyi nyan ke dé ra dé ndaje’n dan nè nga a tɔ. Dan se njè ra ra’n ke njèribe-dè-tàge ke tà Nube’t nga, d’uwe de joo mbak d’ile de kumgajer dann por nyan ke ker jengleng ke laa tong-tong a, ke on bilm-bilm a tɔ. 21Gute dooge ke nan-in nga, kuye kaskar unde loo tee tà è ke ndi dè sinde-gaglam’t jeng kɔbe de ɗêng-ɗêng tɔl de. Helge malang usei dan de adi ase de nák-nák.

will be added

X\