LOOKILERA’N 18

1Go nyange’t nè ɓaa, m’an doo karé ke rang in danrán rise nang. E aw se tɔgmong ke bò. Ndubra le’n ndogó ade loo ke dè nang nè bere mbak unju njai-njai. 2Doo ke danrán nè nga tam tà se ndu’n ke bòi beng ede nè: «Ɓee-bò ke Babylone nga tuju! ɓee-bò ke Babylone nga tuju! Ɓee-bò nè nga tel è kei ndi ndilge ke majelé a, kei ɓɔyɔ ra le ndilge ke yêr a tɔ. Ɓee-bò nè nga tel è kei ndi helge ke yêr a, dange ke yêr ke kum kan lé a tɔ. 3E ade girkoje dooge se dè ɓee-dè ɓee an-in yibe nduu wong tò se nan ke kaiya’t le’n. Ngar-ɓeege ke dè nang nè géa tooi se ɓee-bò nè nga ke kaiya’t. Njé ra gatege ke dè nang nè nga géa ubei maje nyankinge takul nyan maje le’n ke mbirin-mbin.» 4Go’t gugu, m’oo ndu doo karé ke rang ɓar beng ede nè: «Sei kosdooge le’m, undei loo i teei kɔke kem̂ ɓee-bò’t nè nga. Undei loo i teei tede kade oréi se’n nan dè majelége le’n nga lé a, tede kade ingei nyantosowurge le’n nga lé a tɔ. 5Kaiyage le ɓee-bò nè nga ndur nan sár ɔde kàde danran. Gir’n ke nè á kem̂ Nube olé’n dè nyanrage ke pás-pàs le ɓee-bò nè nga. 6I rai n’ee titeke ndɔ ke n’rai sei bè tɔ. Nyan ke ndɔ ke ɓee-bò nè ra se si nga i rai se’n guté nja joo. Nyankain mann ke ndɔ ke n’nim yibe nduu kem̂é n’ade an-in nga, i nimi yibe nduu ke ate karar tutu nja joo adi n’an-in tɔ. 7Ɓee-bò nè nga ndɔ ke unde kàde’n ngain a, ndi deŝ dann maje’t a tɔ. Titeke ndɔ ke unde kàde’n a, ndi deŝ dann maje’t a tɔ nga, sei géa, i rai se’n nyantosowur adi ndii’n se kubu ndoo. Ɓee-bò nè nga tam kem̂n’t ede nè: N’ndi tite dinye le ngar bè, n’ee dinye ke njèkei-kinge lé a, kumndoo yo à ra’n ndan lé a tɔ. 8Gir’n ke nè á ndɔ karé bere kuwe, nyantosowurge malang ke d’uwe dè nja d’ɔje’n dè’n nga, à teei dènn’t kuwe. Eige nè á tooi nè: yo-kos, kumndoo yo a, ɓo-bò a tɔ. D’ade ró ɓee-bò nè nga se por rák-rák. Tede Kuwe-ɓee Nube ke Njètɔgmong á gangtà dè ɓee-bò’t nè nga.» 9Ngar-ɓeege ke dè nang nè malang ke njé tooi se’n ke kaiya’t a, ke njé korè se’n nan dè ndi deŝ dann maje’t le’n nga, loo ke à an-in sà por ke à ró ɓee-bò ɓaa, ei à non-in kundei kàde de dai-dai. 10D’ade ɓel nyantosowur ke à ra ɓee-bò nè nga ɓaa, d’a nda heb se’n tá d’a tam kede nè: «Habi! nyantosowur ke bain á tanan bè! ké nyantosowur ke bain á tee dè ɓee-bò ke Babylone, ke njètɔg nga, titeke bè wa! Ké i nga kuwe á Nube gangtà dèi’t kum kàde karé bere nè wa?» 11Njé ra gatege ke dè nang nè géa, non-in tede ɓee-bò nè a, rai ndoo’n a tɔ, tede doo karé bè ke njè ndogo se de nyan gatege le de goto ta. 12Nyan gatege ke uri kugu dè nan’t bing-bing: nar-ɔr, nar-nda, herge ke gate de è ngain se mede-ngarge, kubu ke ker perm-perm, kage ke rara ke ɓus’n ete maje, jó-bai ke ra se gɔge kede se kage ke rara ke gate’n è ngain se ninge-kase, nar ke mong, her ke ndang mbin, 13kàde kage ke ete ke ri’n nè Canelle, non-kage, wubuge ke dé ra se putu nyange ke ete sununu se yibe nduu a, wubu a, nduju koge a, se mangege a, se batege a, se sindege a, se wotro rɔge ke nja sɔ a, se ɓerge a, se dooge ke karè a tɔ. 14Njé ra gatege à tami kedi nè: «Nyange ke maje-maje ke ngur ndogo’n ra dooge ke kem̂ ɓee-bò ke Babylone nga, gotoi. Nyanbawge le’n ke ndolé mbeble a, se ke ndoin-in kein-kein nga géa, gotoi rann’t njêl a tɔ. Doo à tel kinge de gugu ndan lé ta.» 15Njé ra gatege ke teli ei baw nyankingege kem̂ ɓee-bò’t nè, takul nyan gatege le de nga, à ndai heb ngain tede ɓeli nyantosowur ke à ra ɓee-bò ke Babylone nè nga. Njé ra gatege à non-in a, à ndingei ndoo tede le’n a, à non-in kaláng-kaláng kedi nè: 16«Habi! nyantosowur ri á tanan bè wa! Nyantosowur ri á tee dè ɓee-bò’t nè nga bè wa! Dooge ke kem̂ ɓee-bò’t nè nga tulei kubu ke sɔl lom-lom se kubu ke ker perm-perm se kubu ke ker jengleng se kubu ke ndoin kein-kein tite ɔr a, tulei her ke gate’n è ngain a, se mede-ngar ra de’t a tɔ. 17Nè kum ke tuge jip kuwe ɓaa, nyanbawge le ɓee-bò ke Babylone ke tooi ɓel nè nga, dé tuju de ndát-ndát kɔke.» Njé kunn batoge se njé kaw mba se bato a, se njé ra kule kem̂ batoge’t a, se njé ra kule dann ba-bò kate’t a tɔ nga, ndai mbeng. 18Loo ke an-in sà por ke ndi à ró ɓee-bò nè nga ɓaa, tami tà se ndu de ke bòi beng edi nè: «Ɓee-bò ke tanan se ɓee-bò nè nga goto.» 19D’ɔi bubur d’um ke dè de’t, dè de’t dé non’n kaláng-kaláng a, dé ndinge’n ndoo a tɔ, d’ede nè: «Nyantosowur ri á tanan bè wa! Nyantosowur ke bain á tee dè ɓee-bò’t titeke bè wa! Kuwe-batoge ke dann ba-bò kate’t teli ei baw nyankingege takul nyankingege le ɓee-bò ke Babylone ke tooi ndàj-ndàj. Nè kum ke tuge jip kuwe, ɓee-bò nè nga tel è ndube-ɓee se non.» 20Sei ke i ndii danran, i rai ranel! Sei kosdooge le Nube ke i tooi se ninn si, njékawkulege a, se njéribe-dè-tàge ke tà Nube’t a tɔ nga, ali ra si ɔje dè tuju ke Nube tuju ɓee-bò nè nga! E è Nube kuwe á gangtà se dè naje’n dè ɓee-bò’t nè ɔje’n dè majelége ke ndɔ ke ra se si. 21Doo ke danrán karé ke njètɔg unn her ke tò titeke mbal kusu ko ke bòi bè lɔke piring ile dann ba-bò kate’t, ede nè: «Ɓee-bò ke Babylone nga, d’a d’ile’n piring kɔke titeke bè kuwe tɔ. Doo à tel kan’n gugu ndan lé sár. 22Doo à koo ká kundu-jêng-ge se ká njékunde nyan kɔse’n page, ká têbege se ká burunju à ɓar kem̂i i ɓee-bò’t nè nga gugu ndan lé ta. Doo à tel kinge kɔde ke njé ra kule ke rara éké doo à koo ká bir ɓar kem̂i i ɓee-bò’t nè nga gugu ndan lé ta. 23Por lampe à ndoin ndên kem̂i i ɓee-bò’t nè nga gugu ndan lé a, doo à koo ndu njé taa dinye kige se njé ngaw kige kem̂i i ɓee-bò’t nè nga gugu ndan lé ta. Oiyo, njé ra gatege ke ndii kem̂i i ɓee-bò’t nè nga géa, ndɔ ke ei baw nyankingege dè nang nè: tede i libe kum girkoje dooge malang se dè ɓee-dè ɓee ade ndemi a tɔ.» 24I Ɓee-bò ke Babylone nga, tà mese njéribe-dè-tàge ke tà Nube’t se dooge le’n se njé ke ndɔ ke dé tɔl de nga, tà’n uwe dèi ɗarinè ɓá ta.

will be added

X\