LOOKILERA’N 17

1Taɓai, doo ke danrán karé dann madennge ke ji sejimute ke ndai se bai nyantosowurge ke ji sejimute ji de’t nga ree ede’m ede nè: «I ree ade m’edi tà ke d’ade gang dè ɓee-bò ke tò tà ba-bòge’t. Ɓee-bò nè ra ra’n ke kaiya-dinye. 2Ngar-ɓeege ke dè nang nè tooi se’n ke kaiya’t a, dooge ke ndii dè nang nè nga géa, tò se nan ke kaiya’t le’n tɔl de singling tite yibe nduu ke tɔl dooge bè.» 3Doo ke danrán nè nga unn ndil’m seen aw se’n kem̂ dile’t. Ke loon’t nè kuwe, m’an dinye karé ndi dè dan ke ker mbon. Ri ke ɔje dè taje Nube taa ra dan nè nga pel-pel. Dan ke dinye ndi dènn’t nga, dènnge ei ji sejimute a, gajennge ei dɔg a tɔ. 4Dinye nè nga tule kubu ke ker piriri se ke ker perm-perm rann’t. E dolè ra’n se nar-ɔr, se her ke gate’n è ngain a, se mede-ngarge a tɔ. E uwe nyankain mann ke dé ra se nar-ɔr jinn’t. Nyange ke yêr se nyange ke mine ke ɔje dè tò se nan ke kaiya’t le’n rusu kem̂ bai le’n ke jinn’t neĵ. 5Dé ndang ri ke tò loo ɓɔyɔn’t nat-non dinye’t nè nga d’ede nè: «Ɓee-bò ke Babylone, è ke njèkunde gir tò se nan ke kaiya’t a, kunde gir nyange ke yêr dè nang nè a tɔ.» 6Mese dooge le Nube ke tooi se ninn de se mese njé ke dé tɔl de tede kem̂ de ke undei dè Jésu’t ra dinye nè nga tite yibe bè. Loo ke m’an’n bè ɓaa, ndil’m tee an-in soin-soin. 7Doo ke danrán ede’m ede nè: «Ké bain á ade ndili tee an-in soin-soin bè wa? M’a m’ɔrgir nyan ke tò loo ɓɔyɔn’t ɔje dè dinye se dan ke unn’n gidenn’t nga, kade oo. Dan nè nga dènnge ei ji sejimute a, gajennge ei dɔg a tɔ.» 8Doo ke danrán nga tel ede’m ede nè: «Dan ke i an’n nga tò tutu kété mari, nè ɗarinè goto ta. A unde loo tee kem̂ be ke son’n goto le kaw ke loo tuju’t. Dooge ke ndii dè nang nè, ke dé ndang ri de kem̂ magtub ndikumgajer’t lé mari loo kunde gir nang’t nga, loo ke à an-in dan nè nga bè ɓaa, tà à ige de sêl. Tà à ige de sêl tede dan nè nga tò tutu kété mari, nè go’t gugu goto njêl. Dan nè nga, ndɔn’t à tel kunde loo tee ɓai. 9Doo ke njègos nyanger se kumkunju ɓaa à ter gir nyan nè nga. Dan ke dènnge ei ji sejimute nga, ei mbalge ke ji sejimute ke dinye nè ndi dè’t. Mbalge ke ji sejimute nga ei ngar-ɓeege ke ji sejimute tɔ. 10Ngar-ɓeege ke ji sejimute nga, dé sure njé ke mige d’ile de ɓá ta. Nè è ke karé ke njèkon de’t mute-mute ndi on ɓee a, è karé ke rang ndi à ree ɓai a tɔ. 11Dan ke tò tutu kété mari á ɗarinè goto njêl nga, è kuwe è ngar-ɓee ke njèkon’t sɔ-sɔ. E géa è dann dange ke ji sejimute’t nè nga tɔ. E ɔte aw loo tuju’t nga. 12Gaje dan ke dɔg ke i an nga, ei ngar-ɓeege ke dɔg. Dé nè nga d’on ɓee lé ɓai, nè d’ade de tɔgmong asenan se ngar-ɓeege bè, tede kade d’on’n ɓee nan’t kum kàde karé se dan. 13Ngar-ɓeege ke dɔg nè nga, tel se tɔgmong se dèmong le de kade dan kuwe karé bere á è tàgir le de. 14D’a d’um nan’t bɔk le rɔ se Ngonn bate, nè è à tête de rɔ; tede Ngonn bate nga è Kuwe-ɓee ke on kuwe-ɓeege a, è Ngar ke on ngarge a tɔ. Ngonn bate se njé ke le’n ke è ɓar de, tɔr de a, ke undei kem̂ de dènn’t a tɔ nga, à têti de rɔ.» 15Doo ke danrán nè nga tel ede’m ede nè: «Mann bage ke kaiya-dinye ndi dè’t ke i an de kété nga, è kosdoo-bulege se girkoje dooge malang ke dè nè ke tà tam de è gai-gai a, dooge ke se dè ɓee-dè ɓee a tɔ. 16Gaje dan ke dɔg se dan ke i an de kété nga, à ɔri kaiya-dinye nè nga njêt a, à uwei nin le tɔri kubuge rann’t ndát-ndát kinyei nin mbur’n suturu karè. D’a d’use dan’n a, d’a ró’n se por rák-rák a tɔ. 17Nube kuwe à ule tàgir le’n dè ɓengre de’t tede kade dé ra’n nyan se go kem̂ndige le’n. E ade d’um tà le de nan’t karé, dé tel se konɓee le de kade dan sár kade tàge le Nube aw’n loon’t deĵ. 18Dinye ke kété án’n nga, è ɓee-bò ke njèkonɓee dè ngar-ɓeege ke dè nang nè.»

will be added

X\