LOOKILERA’N 16

1Taɓai, m’oo ndu doo in gile kei ke tò se ninn’n le Nube ɓar beng ede dooge ke danrán ke ji sejimute ede nè: «Otoi nyantosowurge ke kem̂ bai wong-ge ke ji sejimute le Nube nga awi ɓênglei dè nang nè.» 2Doo ke danrán karé ke desêin ɔte aw unn nyantosowurge ke kem̂ bai wong-ge le Nube ke ji sejimute ɓêngle dè nang nè. Ke loon’t nè kuwe, dò-ngakɔige ke majelé age lêw oso ra dooge’t. Dooge nè nga, ei njé ke dé tɔse nyankorji le dan ra de’t a, ulei dè de nang non nyan ke dé tɔl dé ndaje’n dan nga. 3Doo ke danrán ke njèkon’t joo unn nyantosowurge ke kem̂ bai wong’t le’n ɓêngle dann ba-bò kate’t. Tajinan’t nè kuwe, mann ba-kate tel mese tite mese doo ke dé tɔl’n bè. Nyange malang ke awi kumgajer dann ba-kate’t nè nga weii kabak. 4Doo ke danrán ke njèkon’t mute unn nyantosowurge ke kem̂ bai wong’t le’n aw ɓêngle dann mann bage’t se ngur mannge ade teli mese. 5Go’t gugu, m’oo ndu doo ke danrán ke njèkan dè mannge tam ede nè: «Gangtà lei ke titeke bè nga, è se dè naje’n kuwe, i kuwe se kari bere luk-luk á i tò se ninni gai, i nga i ndi tutu kété mari ke desêin sár tee ɗarinè. 6Ndɔ ke dooge umi mese njétaakem̂-Kristge se njéribe-dè-tàge lei nang. Ɗarinè, i ade de mese kade d’an-in tɔ ta. Mese ke ade de ade d’an-in nga, è kure nyanra de kuwe á unde’n nja de.» 7Taɓai, m’oo ndu doo in se ke dè ɗinger loo nyankuje-mese’t ede nè: «Oiyo, Kuwe-ɓee Nube ke njètɔgmong, tàge ke i gang nga è se dè naje’n kerɔte kuwe, loo naje’n goto.» 8Doo ke danrán ke njèkon’t sɔ unn nyantosowur ke kem̂ bai wong’t le’n ɓêngle dè kàde’t gangang. D’inye loo d’ade’n le kade ró dooge se por rák-rák. 9Loo tunge ke tò ɓel ngain tunge dooge ade taji ri Nube ke njèkule nyantosowurge se go tɔgmong le’n. Nè né è bè géa, dé mbate tel tur hal de tede kule’n ndubra dè Nube’t. 10Doo ke danrán ke njèkon’t mi uwe nyantosowur ke kem̂ bai wong’t le’n ɓêngle dè kutu-ngar’t le dan. Tilkus sebe ràp-ràp dè ɓeekon’t le dan nè nga. Nyantosowur ra dooge ade ton-in tà de vbat-vbat. 11Dé taje Nube ke danrán dap-dap tede nyantosowurge ke ra de a, se dò ke ngakɔige ke gebi nan dè de’t. Nè né è bè géa, dooge nè turi hal de dè nyanra de ke majelé’t nga lé. 12Doo ke danrán ke njèkon’t mute-mute uwe nyantosowur ke kem̂ bai wong’t le’n ɓêngle dann mann ba ke rin nè Euphrate. Tajinan’t nè kuwe, mann ba nè nga ii san-san inye rebe ade ngarge ke in-in loo tee’t le kàde. 13M’an ndilge ke majelé ke majelé mute undei loo teei taai nan se kanran bange bè. E ke karé tee tà dan-kɔbe’t, è ke karé tee tà dan’t a, è ke karé unde loo tee tà doo ke ra ra’n ke njèribe-dè-tà ke tà Nube’t a tɔ. 14Ndilge ke majelé nè nga ei ngann njékulege le ndilge ke yêr ke njé ra nyankɔbege gai-gai. Taɓai ei awi ra ngar-ɓeege ke dè nang nè bere mbak, ɔsi nja de nan’t tede ngine’n ndɔ rɔ ke bò le Nube ke njètɔgmong. 15Kuwe-ɓee tam ede nè: «An! man m’ree titeke njèɓog bè. Doo ke ndi dè njann’t a, ngonm kubuge le’n kɔtenn’t a tɔ ɓaa, ra’n à nel’n. Titeke bè á è à njiye’n mbur’n suturu lé a, ra’n à sɔl’n tàkum dooge’t lé a tɔ.» 16Ndilge ke majelé nè nga ɔsi nja ngar-ɓeege nan’t loo karé ke dé ɓar’n se tà Hébreu d’ede nè: «Harmagédon.» 17Doo ke danrán ke njèkon madennge’t ji sejimute uwe nyantosowurge ke kem̂ bai wong’t le’n sanrin ke dɔ. Ndu doo in se ke dè kutu-ngar’t ɓar beng gile kei ke tò se ninn’n le Nube ede nè: «Girtà gang ɓá ta.» 18Ke loon’t nè kuwe, ndi têl a, ndu doo ɓar beng-beng a, nang unn gir yei ɓuk-ɓuk a tɔ. Unn gir mari ke doo ndii’n dè nang nè nga, nang yei ɓuk-ɓuk tite è ke nè nja karé lé ɓai! 19Ɓee-bò nga kai ra’n danné loo mute. Ɓee-bòge ke dè ɓeege ke rang malang nga géa, tosoi tuji a tɔ. Kem̂ Nube olé dè kaiyage’t le ɓee-bò ke Babylone. Nube ade’n nyantosowur ke kem̂ bai yibe nduu wong’t le’n an-in. 20Dè goré-looge malang an-in gotoi kɔke a, mbalge géa gotoi njêl karè a tɔ. 21Kɔtchege ke bò-bò ke ɔyi tite nar-nda bè in-in danrán tilei dè dooge vbang-vbang. Dooge taji Nube dap-dap tede nyantosowur ke kɔtchege rai se de. Nyantosowur ke ra de nè nga, è nyantosowur ke tò ɓel ngain dum madege ke rang malang.

will be added

X\