LOOKILERA’N 12

1Go’t gugu, nyantɔje ke bò unde loo tee kàde danran’t. Dinye karé ule kàde rann’t tite kubu bè. E ube nan gir njann’t a, ule jɔkɔ kɔnyonge dɔg-gidé-joo dènn’t a tɔ. 2Dinye nè nga ndann ngonn kem̂’n tɔge lêng-lêng. Ndo ule’n ndibe ngain ade non kaláng-kaláng a tɔ. 3Nyantɔje karé ke rang unde loo tee kàde danrán’t ɓai. An! nyantɔje nè nga è dan-kɔbe ke ker siw, dè’n è ji sejimute a, gaje’n è dɔg a tɔ. E tule jɔkɔ ke ndoin asenan se kɔnyon gajenn’t ke ji sejimute’t nga karé-karé malang. 4Ɓong’n uwe debe kɔnyonge karé dann è ke mute’t jɔrè’n nang nè. Dan-kɔbe nè nda non dinye ke ayé koje ngonn; è nda um tà’n le kade loo ke à oje ngonn ɓaa, è à unn kuse kɔke. 5Dinye nga oje ngonn ke dingem. Ngonn nè nga à è njèkɔr non girkoje dooge malang se kage-tɔse ke nar. Nè gar-gar, d’uwe ngonn le dinye nè nga wont d’ɔr’n d’aw se’n ra Nube’t a, kɔte kutu-ngar’t le Nube a tɔ. 6Dinye nè nga an-in ranm-ranm aw ɓɔyɔ ra’n kem̂ dile’t. Nube uwe dè nja loo kem̂ dile’t nè tede kade d’ul’n tutu ndɔ aru dɔg-gidé-joo se kɔr-mute-mute. 7Rɔ oso kem̂ danran’t tip. Michael se dooge le’n ke danrán rɔi se dan-kɔbe nè ngain. Dan-kɔbe se dooge le’n géa rɔi se de ngain a tɔ. 8Nè tɔg dan-kɔbe ase tête rɔ lé. E se dooge le’n nga, loo le de goto danrán ta. 9Dan-kɔbe ke bò ke ri’n nè li ke mari, dé ɓar’n sú, njèkɔse tà se dooge a tɔ nga, dé sure’n mbeng d’ile’n nata dè nang nè. Dan-kɔbe ke bò è njè libe kum dooge dè nang nè bere mbak. E se dooge le’n nga, dé sure de mbeng d’ile de nata dè nang nè. 10Go’t gugu ɓai, m’oo ndu doo ɓar danrán beng ede nè: «Kaje se tɔgmong a, se konɓee le Nube le jéi nga, ɗarinè reei ɓá ta. Ɗarinè, tɔgmong è ji Krist’t le Nube nga ta. Njè kile tà dè ngakon jéige’t non Nube’t ndɔɔ a, kada a nga, dé sure’n mbeng d’ile’n nata dè nang nè. 11Ngakon jéige têti rɔ njè kile tà dè de’t nga takul mese Ngonn bate a, takul tà le Krist ke ɔri go edi dooge a tɔ. Ngakon jéige nè nga ndêti ra de adi yo lé. 12Gir’n ke nè sei dooge ke i ndii danrán, i rai ranel. Nè sei dooge malang ke i ndii dè nang nè éké nyange malang ke dann ba-bò kate’t nga, a an-in ɓai! Sú nga wong ra’n ngain ade rise nanga à aw sei non. E ger mbak titeke ndɔ le’n nain ndêin bè karè ta.» 13Loo ke dan-kɔbe an titeke dé sure’n d’ile’n nata dè nang nè ɓaa, è unn gir rɔ go dinye ke ndɔ ke oje ngonn ke dingem nga par-par. 14D’ade dinye nè ndime bage kiro ke bò joo tede kade in nel’n bage tel aw’n dè dile loo ke ndɔ ke è ɓɔyɔ ra’n tutu nga. Dinye nè à ndi kem̂ dile’t ase ndɔ aru dɔg-gidé-joo se ndɔ kɔr-mute-mute kade d’ul’n heb tàkum li’t. 15Li nga ubu mann tà’n go dinye’t pur-pur ade tel tò tite mann ba bè. E ndige le kade mann tà’n ke ubu nga uwe dinye nè aw se’n kɔke. 16Nè nyan ra maje ade nang din-in dinye. Nang teen tà’n njibe mann tà dan-kɔbe ke ubu go dinye’t pur-pur nè nga njab. 17Wong ra dan-kɔbe ngain dè dinye’t. E in aw ile rɔ dè gute ngannkà dinye’t nè nga. Ngannkà dinye nè nga, ei dooge ke ilei koje dè ndukunnge’t le Nube a, dè ngarankum tà ke ndɔ ke Jésu ede de nga a tɔ. 18Go’t gugu, dan-kɔbe nga aw nda dè nyeenger’t tà ba-bò kate’t.

will be added

X\