LOOKILERA’N 11

1Go’t gugu ɓaa, d’ade’m kage tuwe-mann ke tanan se kage tɔse bè. Ɓaa d’ede’m d’ede nè: «In dɔ ɔje ngal gile kei se là kei ke tò se ninn’n le Nube a, ɔje là ɗinger loo nyankuje-mese se ngal’n a tɔ. Taɓai i mbɔje kɔr njé ke ndii à ɗɔyi Nube kem̂ kei nè nga a tɔ. 2Nè loo ke kem̂ kei’t nata ɓaa, inye ade tò m i mbɔje lé. Loo nè nga d’inye d’ade girkoje dooge ke geri Nube lé. Girkoje dooge ke geri Nube lé à tubei ɓee-bò ke tò se ninn’n nja de’t ase nange kɔr-sɔ-gidé-joo. 3M’a m’ade tɔgmong njékɔrgo tàge le’m ke joo nè nga kade ilei mber se ri Nube ase ndɔge aru dɔg gidé-joo se kɔr-mute-mute. Njékɔrgo tàge le’m ke joo nè à tulei kubu-sile ra de’t.» 4Dé nè nga dé kage Olivierge ke joo a, dé lampege ke joo ke ndai non Kuwe-ɓee ke dè nang nè. 5Ke nè á doo karé ndige ra se de majelé ɓaa, por à tee tà de’t le ró njébange le de rák-rák. Ke nè á doo karé nan le ra se de majelé ɓaa, gar-gar kum’n a udu titeke bè tɔ. 6Njékɔrgo tàge le’m ke joo nè nga awi se tɔgmong le kuti kum danrán kade mann ndi oso nang ɗêin lé kem̂ ndɔge aru dɔg-gidé-joo ke a ilei mber tà le Nube nga. Dé nga d’aw se tɔgmong le kade mannge teli mese a, le kilei nyantosowurge ke se ri de-ri de dè nang nè titeke kem̂ de ndige. 7Loo ke njékɔrgo tàge le’m ke joo nè nga à ɔri son le kule le de njêt ɓá ɓaa, dan-ton à unde loo tee kem̂ bolè ke son’n goto’t, le kile rɔ dè de’t. Dan-ton nè nga à tête de rɔ a, à tɔl de a tɔ. 8Ninn de à tò nang ka-rebe kɔse’t kem̂ ɓee-bò ke dé ɓer Kuwe-ɓee le de kàde kage-ke-dese’t tutu nga. Ɓee-bò nè nga dé ɓar’n se gos d’ede nè: Sodome se Egypte. 9Ninn de à tò dɔ ngɔr se ndɔ sɔ kade dooge ke nange dann kosdooge’t a, girkoje dooge ke dè nang nè ke tà tam de è gai-gai a, dooge ke se dè ɓee-ɓee à an-in. Nè à inyei loo kade dé dubu ninn de nga lé. 10Dooge ke ndii dè nang nè à rai ranel tede kwei le de a, à ali ra de ngain a tɔ. Taɓai à ulei se nyange kuwei noje se nan ke yo ke nè, tede njéribe-dè-tàge ke tà Nube’t ke joo nè nga, ei njé kade kem̂ dooge ke nang nè olé bɔt-bɔt. 11Ninn de tò dɔ ngɔr se ndɔ sɔ. Go’t gugu ɓaa, Nube ule kebe kem̂ njéribe-dè-tàge ke joo nè nga ade teli tɔsi ndeli in-in ndai se nja de dɔ. Dooge malang ke an-in de nga, ɓel ke bòi unde de ndàt gang de. 12Njéribe-dè-tàge le Nube ke joo nè nga ooi ndu doo ɓar danrán beng ede nè: «Ali ke dɔ laa.» Ke loon’t nè kuwe d’in d’al dɔ dann bum’t d’aw danrán. Njébange le de malang an-in de sikm. 13Ke loon’t nè kuwe, nang yei ɓuk-ɓuk. Debe ɓee-bò ke karé dann ke dɔg’t ɔr oso. Loo ke nang yei ɓuk-ɓuk nga, dooge aru dɔg loo ji sejimute weii kabak. Ɓel unde gute dooge ne nan-in ndàt gang de ade teli ulei ndubra dè Nube’t ke ndi danrán. 14Nyantosowur ke njèkon’t joo nga tuge gang ɓá. An-in! è ke njèkon’t mute à ree ngɔr. 15Taɓai doo ke danrán ke njèkon madennge’t ji sejimute kɔl burunju. Ke loon’t nè kuwe, ndu dooge ɓar danrán beng-beng edi nè: «Tɔgmong konɓee ke dè nang nè oso ji Kuwe-ɓee Nube’t le jéi se Krist le’n a tɔ. Kuwe-ɓee à on ɓee sár se non.» 16Ngatɔgege ke kɔr-joo-gidé-sɔ ke ndii kutu-ngar’t le de non Nube’t nga ɔsi keje de nang nonn’t, 17ei ɗɔyi nin edi nè: «I Kuwe-ɓee Nube ke njè tɔgmong ke i ndi tutu kété mari sár tee ɗarinè. Jè rai oiyo ngain tede i kuwe uwe tɔgi ba a, tede kunn ke i unn gir konɓee a tɔ. 18Girkoje dooge ke se dè ɓee-dè ɓee adi wong ra de, nè ɗarinè wong ke lei in sei tɔ ta. Ɓila è ndɔ gangtà dè njé ke koo’t. Ndɔ kuge dè ji ɓer kulege lei ke ei njéribe-dè-tàge lei nga ase ɓila ta. Dooge ke bòi se njé ke ngannge ke ei leige a, ke ilei koje dèi’t a tɔ nga, ndɔ kuge dè ji de ase ɓila ɓá ta. Dooge ke njé nuju dè nang nè nga géa, ndɔ kade i tuju de ase deĵ ɓá a tɔ.» 19Tà gile kei ke danrán ke tò se ninn’n le Nube nga teen. Sanduk mann-ra le Nube ke tò gile kei’t le’n ke tò se ninn’n nga tò nata doi. Go’t ɓaa, ndi têl a, ndang a, nang yei ɓuk-ɓuk a, ndi ede ade kɔtche toso danm-danm a tɔ.

will be added

X\