LOOKILERA’N 10

1Taɓai m’an doo ke danrán karé ke rang ke njètɔg in danrán rise nang. Doo nè nga bum utu dè’n lêt-lêt a, an-in dè’n king-king a tɔ. Tàkum’n ndoin tite kàde bè a, nja’n tò tite por ke suri nan ɗêng-ɗêng bè a tɔ. 2Doo nè nga teen tà ngonn magtub karé bè uwe jinn’t. E ile nja’n ke kon dè ba-bò kate’t a, ile nja’n ke gel dè nang’t a tɔ. 3E ra nyan se ndu’n ke bòi beng asenan se toboi ke uje rɔ bè. Loo ke doo nè ra nyan se ndu’n ke bòi beng ɓaa, ndi ndang pain-pain nja ji sejimute. 4Loo ke ndi ndang titeke bè ɓaa, m’ayé kunn gir ndang nyan. Nè loon’t nè kuwe, m’oo ndu doo ɓar danrán ede nè: «Ndi ke ndang nja ji sejimute nè nga, ade tà’n tò loo ɓɔyɔn’t jêke^ m i ndang kem̂ magtub’t lé ɓanm.» 5Doo ke danrán ke kété m’an’n nda se nja’n dɔ dè ba-bò kate’t se dè nang nè nga ule jikon’n njung ke danrán. 6E mann ra’n se ri ke njèndi kumgajer se non, ke njèkunde danran se nang, se ba-bò kate a, se nyange malang ke tooi tutu a tɔ. Doo ke danrán nè nga tam ndàt ede nè: «Ase nan’t lé ta. 7Nè ndɔ ke doo ke danrán ke njèkon madennge’t ji sejimute à unn gir kɔl burunju ɓaa, Nube à ra nyan le’n ke ɔje ke tò loo ɓoyɔn’t le kɔr son’n njêt. Nyan ke ɔje le ra ke tò loo ɓɔyɔn’t ɓai nga, ndɔ ke è ade ɓer kulege le’n ke ei njéribe-dè-tàge ke tànn’t ilei mber’n kété mari bere.» 8Ndu doo ke ɓar danrán ke kété m’oo nga tel ede’m ede nè: «Aw, i taa ngonn magtub ke doo ke danrán karé ke nda se nja’n dɔ dè ba-bò kate’t se dè nang’t nè teen uwe jinn’t nda’n non.» 9M’ɔte maw kum’m ke ra doo ke danrán’t nè m’deje’n le kade ade’m ngonn magtub nè nga. E tel ede’m nè: «I taa ngonn magtub nè nga ur kem̂i’t. A linde tài’t nata laa tite wubu tuju bè, nè kate’n à toso wuri karar-karar.» 10M’taa ngonn magtub nè ji doo ke danrán’t m’ur lang ɓaa, linde tàm’t asenan se tuju bè nè kate’n toso wur’m karar-karar. 11Doo ke danrán tel ede’m ede nè: «Gar-gar, i tel i ribe dè tàge ke tà Nube’t nè ade kosdooge se girkoje dooge ke dè nang nè ke tà tam de è gai-gai nè nja karé ɓai. I ribe dè tàge nè nga ade ngar-ɓeege bule a tɔ.»

will be added

X\