NJE KE PHILIPPES 3

1Gute tàge ke nain ɓaa, ngakonmge, i rai ranel dè kum nan’t le si bɔk se Kuwe-ɓee. Tel ndang magtub kade sei ɔje dè nyange ke kété m’ede sei ɓá nga, m’a m’ɔr go’t lé tede è gir ndi lom le si. 2Undei kum si go bisege’t lé a, undei kum si go njékulege ke majelé lé a, undei kum si go njé sule sei kade ujei tà mɔte sige lé a tɔ. 3Kerɔte kuwe, è jèi á jèi njékuje tà mɔtege ke get tede jè ɗɔyi Nube se go Ndil’n. Jè ti ra jé se ri Jésu-Krist m j’unde kem̂ jé dè danra’t lé. 4Man ɓaa, nyange ke ɔje dè danra ke kade m’unde kem̂’m dè’t tò. Ke nè á doo karé ke rang gir kem̂n’t titeke è asekum kunde kem̂’n dè danrann’t ɓaa, man m’dum’n è ɓai. 5D’oje’m m’ra ndɔ sɔsɔ ɓaa, d’uje tà mɔte’m. Man m’ee girkoje Israel ke kon’m ɓéee, man m’ee girkà le Benjamin. Man m’ee Hébreu ke koje kei se go gute-ndu le Pharisien. 6Ra’m ɔlé pêl-pêl dè kɔr njékebe nange le Nube kororoi. Nyanra ke se dè naje’n ke gute-ndu ɔje nga, doo karé bè asekum kile’n tà dèm’t lé sár. 7Nè nyange nè ke kété m’an de ke nyankinge’m nga, ɗarinè m’an dè ke nyange ke tuji tede tà le Krist. 8Taɓai, man m’an nyange nè malang ke nyange ke tuji tede ger ke m’ger gel Jésu-Krist, Kuwe-ɓee le’m. Ger gel Jésu-Krist Kuwe-ɓee le’m nga è nyankinge ke dum dè nyange malang. E tede tà le’n á m’inye’n go nyange malang ke kété m’an de ke nyankinge’m man kuwe deri nga. M’an nyange malang tooi asinan se nyange ke doo saa um dè ɓirɓite’t tede kade m’inge’n Krist, 9kum’n se’n nan’t bɔk. Ɗarinè, Nube ɔr tà dèm’t tede kan ke m’an dè gute-ndu sêw-sêw lé, nè tede kum ke m’um nan’t bɔk se Krist. Nube ɔr tà dè doo’t takul kundekem̂ dè Krist’t. 10Man m’ndinge ra’m le ger gel Krist, le ger tɔgmong kunde loo tee dann njé ke koo’t le’n. M’ndinge ra’m le korè se’n nan dè kem̂kon’t le’n a, se le tel tanan se’n dè kwei’t le’n a tɔ. 11Titeke bè á, man kuwe géa m’a m’ase’n kunde’n loo tee’n dann njé ke koo’t. 12Nyan ke m’an-in ngɔde’n nga, m’uwe se ji’m mêtch lé ɓai a, m’maje m’ɔr njêt lé ɓai a tɔ. Nè m’an-in ngɔde kum’m ke kété-kété le kuwe nyan ke m’an-in ngɔde’n nga se ji’m mêtch, titeke Jésu-Krist géa uwe’m se ji’n mêtch tɔ. 13Ngakonmge, man ɓaa, m’gir titeke m’uwe’n se ji’m mêtch lé ɓai, nè m’ndi m’ra nyan karé: m’ade kem̂ wei nal sêl dè nyange ke m’inye goom’t gugu, m’uwe ra’m mong m’tò peke se ngɔde ɔje dè nyan ke tò nonm’t kété. 14M’an-in ngɔde m’ɔje’n dè nyankuge dè ji’m. Nube ɓar’m le kade m’inge nyankuge dè ji’m danrán takul kum ke m’um nan’t bɔk se Jésu-Krist. 15Jèi malang ke tàgir le jéi ɓisir ɓaa nga adi tàgir le jéi è karé. Ke nè á tàgir le njé ke nange dann si’t tò gai dè nyan karé’t ɓai géa, Nube à ribe dè ke nata kade sei ndɔ ke rang. 16Nè né è bè géa, adi jè njiyei kum jéi ke kété dè rebe ke jè njiyei tutu sár ɗarinè nga. 17Ngakonmge, sei malang i ndaji kum’m. Oréi kum si dè njé ke njiyei se go nyan ke ndɔ ke jè tɔje sei nga. 18Tede doo ke nange bule awi ke njébange le kage-ke-dese le Krist. Titeke dɔ-dɔ m’ede’n sei nga, ɗarinè m’tel m’ede sei se mann non kuwe ɓai. 19Dooge nè nga loo tɔl tà’n ɓaa, d’a tuju. Nyankuse ke kem̂ de’t á d’oré kum de dè’t asenan se Nube le de bè a, nyan rasɔl á d’an ke riɓar le de a tɔ. Nyange le nang nè á dé gir dè’t se ndɔge malang. 20Nè jéi ɓaa, ɓee ndi jéi ke get è danrán, loo ke njèkaje dooge Kuwe-ɓee le jéi Jésu-Krist ke jè ndii jèi nginei nin nga, à in tutu le tel ree. 21Ra jéi ke dang’t ra’n ade uwe ndoo mɔngong nga, Jésu-Krist à tel’n le kade tò tanan se le’n ke ndoin kein-kein. E aw se tɔgmong le dum’n dè nyange malang, ule’n de wɔr-wɔr.

will be added

X\