NJE KE PHILIPPES 2

1Ke nè á nyan gɔl kem̂ jéi ke j’umi nan’t bɔk se Krist tò a, ke nè á nyan ke ade kem̂ jéi oso nang pon dè tár nan’t tò a, ke nè á kum nan’t bɔk se Ndil-Kem̂nda tò a, ke nè á kan kumndoo le nan tò a, ke nè á ra kem̂kanm se nan tò dann si’t a tɔ ɓaa, 2umi nan’t adi dè ranel le’m ɔr’n njêt. I tári nan se kem̂ karé a, umi nan’t bɔk adi tàgir le si è karé a tɔ. 3I rai nyan karé bè géa se go jang éké tede riɓar ke raikarè nga lé. Nè an-in njé ke rang ke dooge ke bòi dumi sei se go kule dè kade nan le si. 4Maje kade doo karé bè dann si’t tɔse kum’n dè nyan ke ɔje dè’n è kuwe se kar’n lé, nè maje kade tɔse kum’n dè nyan ke ɔje dè doo madennge ke rang tɔ. 5Adi tàgir ke ndɔ ke tò kem̂ Jésu-Krist’t kété mari nga ur kei kem̂ si’t ɓila. 6Jésu-Krist nga è kum gute tà Nube kété mari ke desêin sàk-sàk. E uwe ra’n gan-gan ke njè kase nan se Nube lé. 7Nè è kuwe ɔr ngar dè rann’t, tel ra’n ke ɓer bè. E tel ra’n asenan se dooge karè bè a, d’an’n ke doo karè bè a tɔ. 8Nè è kuwe in se kem̂’n ule dè’n ile koje sár aw weii’n kade kage-ke-dese’t. 9Gir’n ke nè á, Nube unn’n unde’n dɔ ɗang ile’n riɓar ke dum dè riɓarge ke rang malang dènn’t. 10Titeke bè á dooge malang ke danrán se njé ke dè nang nè a, se njé ke gir ngaran nang’t a, ɔsi keje de nang non ri Jésu’t le ɗɔi’n. 11Kerɔte kuwe, dooge karé-karé malang à tami ndàt kedi nè Jésu-Krist nga è Kuwe-ɓee le kilei riɓar dè Bɔ’n Nube’t. 12Kotárge le’m, ilei koje dè Nube’t se ndɔge malang titeke ndɔ ke m’ee’n se si. Ɗarinè ke m’goto se si nga, ilei koje dè Nube’t adi dum ke kété. I ɓeli Ndil Nube, i rai kule dè kaje’t le si se ngonn koje. 13Oiyo, è Nube kuwe á ra kule kem̂ si’t ade sei kem̂ndige se tɔge le kade i rai nyan ke maje ke kem̂’n ɔje. 14I rai nyan malang anje murin tà a, anje naje se ra si dè’t a tɔ. 15I rai titeke bè le kade unji nyang-nyang a, d’a kile’n tà dè si’t lé a tɔ. Sei a teli k’ei ngann Nube a, tà karé à uwe dè si lé dann girkoje dooge ke ndi dè nang nè nga lé. Dooge ke ndii dè nang nè nga, ei njé ndɔje lɔk-lɔkge se njé ra nyan majelége a tɔ. Sei a ndon-in dann de’t asenan se nyan-ndogó bè. 16Uwei tà ndikumgajer nga gan-gan le kade dè’m in-in’n tchakm ndɔ tel ree le Krist. Titeke bè á ngɔde kan-in le’m se kule ke m’ra m’ɔr yàl-yàl nga à tel k’ee nyan ke kenon-non karè lé. 17Ké nè á d’ayé kile mese’m nang ke nyankuje-mese dè made’t ɓai tede kundekem̂ le si géa, m’ra ranel se si nan’t malang. 18Sei géa, i rai ranel a, ali ra si se’m nan’t a tɔ. 19M’unde kem̂’m tchên ke dè Kuwe-ɓee Jésu’t le kule Timothée kalang ra si’t le kade ree se tàge ke ɔje dè si ade m’oo. Titeke bè á m’a m’inge’n tɔge’m. 20Kerɔte kuwe, m’inge doo karé bè ke rang ke usu’n éké ke ade kem̂’n tò kekek dè nyange ke ɔje dè si tite’m man bè goto. Nè Timothée kuwe se kar’n bere. 21Dooge malang sangi nyange ke ɔje dè de ei kuwe m sangi nyange ke ɔje dè Jésu-Krist nga lé. 22Sei geri mbak, Timothée nga è doo ke ndɔ ke dé nan’n dé ger hal’n ɓá. Titeke ngonn ra’n se bɔ’n bè nga, è ra se’m kule kile mber Tà ke Maje nga nan’t. 23Loo ke ndɔn’t m’oo gir nyange ke ɔje dè’m nga njai ɓaa, è è á m’ɔje kem̂’t tchên le kule’n ra si’t. 24Man géa, m’unde kem̂’m tchên ke dè Kuwe-ɓee’t titeke nain ngɔr à ade man kuwe m’a m’aw se ra’m le k’an sei. 25Nè né è bè géa, m’an titeke maje kum tel kule se Epaphrodite ra si’t gugu. E njèkawkule le si ke ndɔ ke uleii ram’t adi ra se’m dè nyange ke nal’m. Ngokon jéi Epaphrodite nga è njèmade loo kaw le’m se njè made rɔ le’m a tɔ. 26Ngur tel kaw kan sei malang ra’n pênn-pênn. Kem̂’n tò kekek tede ser ratur le’n ke ndɔ ke ooi. 27Kerɔte kuwe, kété ratur ra’n ngain ade ube tà be tête. Nè Nube an kum ndoo le’n, è á se kar’n lé. Nè an kum ndoo le’m man kuwe tɔ tede le kade nyankem̂kon ra’m ke nja nan’t, nan’t lé ta. 28M’a m’tel se Epaphrodite ra si’t kalang kade i teli an-in nin ɓaa, i rai ranel. Titeke bè á man géa, kem̂kon le’m à tel kwei’n pum-pum a tɔ. 29Uwei Epaphrodite ke ra si’t tite ngokon si ke njètaakem̂-Krist bè se ranel ke deri. Dooge ke titeke bè nga, ilei riɓar dè de’t. 30E tede kule le Krist á ndɔ ke Epaphrodite ube’n tà be tête’n ile’n ra’n kɔke taa’n gute si sei malang loo kule ke sei kuwe asi rai kadi man lé nga.

will be added

X\