MATTHIEU 4

1Ndil ɔr non Jésu aw se’n kêm dile’t le kade njè sú dooge nan’n. 2Ɓo ra Jésu tede ɔge ra’n dè nyankuse’t ase dann kàde kɔr-sɔ se dann ndɔ kɔr-sɔ a tɔ. 3E á njèkule kêm dooge age meen-meen ke rann’t ede nè: – Ke nè á i Ngonn le Nube kerɔte ɓaa, ade kuberi herge nè nga teli mapa ade use. 4Nè Jésu tel ilé dè’t ede nè: – Dé ndang kêm magtub’t d’ede nè: «Doo à ndi kumgajer takul mapa á go karé lé. Nè doo à ndi kumgajer takul tà malang ke tee tà Nube’t.» 5Taɓai sú ɔr Jésu aw se’n Jérusalem, ɓee-bò ke tò se ninn’n, aw unde’n sêm Kei’t le Nube, ede’n ede nè: 6– Ke nè á i Ngonn Nube kerɔte ɓaa, inye jii dɔ oso nang ade j’an tede dé ndang kêm Magtub’t d’ede nè: «Nube à unn ndu’n kade dooge le’n ke danrán kɔje’n dèi. Dooge ke danrán nè nga, d’a geti se ji de nè bainléa a kunde njai dè kuberi her’t.» 7Jésu tel ile sú dè’t ede nè: – Dé ndang kêm Magtub’t d’ede nè: «Kuwe-ɓee Nube lei nga, i a nan’n lé.» 8Go’t gugu sú ɔr’n aw se’n dè mbal ke ngal lêng-lêng tɔje’n ɓeekonge malang ke dè nang nè se nyan-majege le de ke mbirin-mbin, 9ede nè: – Ke nè á i ɔse keji nang nonm’t, ule dèi ade’m ɓaa, m’a m’adi nyan-majege nè nga malang. 10Jésu tel ede sú ede nè: – Ɔte tam’t kɔke tede dé ndang kêm magtub’t d’ede nè: «Kuwe-ɓee Nube lei nga, i a kɔse keji nang nonn’t a, è kuwe karé bere luk-luk á i a ra ɓer le’n a tɔ.» 11Sú ɔr ra’n ra Jésu’t kɔke ɔte aw. An! ke loon’t nè kuwe, dooge ke danran reei rann’t rai nyan adi nin. 12Loo ke Jésu oo titeke d’uwe Jean d’ile’n dangai ɓaa, è ɔr ra’n aw kêm ɓeekon ke Galilée. 13Jésu inye ɓee ke Nazareth aw ndi kêm ɓee-bò ke Capernaum kɔte ba ke dè ninn ɓeekon le Zabulon se Nephtali. 14E ra titeke bè le kade tà ke Esaie njèribe-dè-tà ke tà Nube’t tam kété aw’n loon’t deĵ. Esaie tam kété ede nè: 15«Ɓeekon le Zabulon, ɓeekon le Nephtali, ke tooi gide ba ke Jourdain, I Galilée ɓeekon le dooge ke ei Juipge lé. 16Kosdooge ke ndii dann tilkus’t, An-in! lookar ke bò, Njé ke ndii gir tɔgmong’t le yo géa, loo unn gir kar dè de’t a tɔ. 17Unn gir kêm ndɔn’t nè, Jésu ile mber ede nè: – I turi hal si tede konɓee ke danrán nain ngɔr ta. 18Ndɔ karé bè, Jésu njiye se tà ba ke Galilée. E an ngakon nange joo: Simon ke dé ɓar’n Pierre se André ndai ilei bure dann ba’t tede ei mbawge ke njékɔse kanjege. 19E ede de ede nè: – Unni rebe goom’t ɗarinè, m’a tel sei ke njé ndon dooge ta. 20Ke loon’t nè kuwe dé sure burege le de d’inye d’unn rebe goon’t. 21Loo ke Jésu aw mbɔr ke kété ɓai ɓaa, è an ngakon nange ke rang joo Jacques se Jean ngann le Zébédée ndii se bɔ de kêm ngonn bato’t à tilei kum burege le de. Jésu ɓar de tɔ. 22Ke loon’t nè kuwe ei surei bɔ de se bato bere inyei unni rebe go Jésu’t. 23Jésu aw se loo-loo kêm ɓeekon ke Galilée bere mbak ndó dooge nyan kêm kei kebe nange’t le de ile mber Tà ke Maje ɔje dè konɓee le Nube a, ɔr ratur ke rara ra njératurge dann kosdooge’t a, se njè ke kêl ra de wei tonrin a tɔ. 24Kɔbe nyan ke Jésu ra nga, oso se loo mbit-mbit kêm ɓeekon ke Syrie bere mbak. Dé ree se njératurge ke raturge gai-gai rai kum de ndoo ra Jésu’t. E ɔr ratur dè de’t malang: Njé ke ndilge ke majelé tooi kêm de’t se njé ke kɔnon tɔte de a, njé ke kêl ra de wei tonrin a tɔ. 25Kosdoo-bulege ngain in-in kêm ɓeekon ke Galilée se ɓeekon ke Décapole se ɓee-bò ke Jérusalem se ɓeekon ke Judée a, se ɓeekon ke gide ba ke Jourdain’t reei ndolèi go Jésu.

will be added

X\