MATTHIEU 28

1Ndɔ ke njè kutu go ndɔ taa kebe nga, Marie ke ɓee le’n è Magdala se Marie karé ke rang teei tàgir loo’t karè awi le kan-in dè ɓade. 2An! ke loon’t nè kuwe nang yei ɓuk-ɓuk. Kuwe-ɓee ule doo le’n ade in danrán ree ndubri her ke bòi ke d’utu’n tà be ɓade nè nga ile rang al ndi dè’t. 3Ra’n ndoin tite ndi ke têl a, kubu ke rann’t nda káng-káng tite kew bè a tɔ. 4Ɓel ra njé ngonm looge ngain ade ndebi nginn-nginn teli tooi asinan se ninnge bè. 5Doo ke danrán ke Kuwe-ɓee ule’n nga ede dinyege ede nè: – Sei ɓaa, i ɓeli lé. Ma m’ger titeke sei sangi Jésu ke dé ɓer’n kàde kage-ke-dese’t nga. 6E goto loo ke nè ta, tede è unde loo tee dann njé ke koo’t titeke è tam’n kété nga. I reei an-in loo ke kété tò tutu nga. 7Awi law-law edi njékuwe-girnge edi nè: «Jésu nga unde loo tee dann njé ke koo’t ɓá. An-in! è aw non si’t kété kêm ɓeekon ke Galilée. E á à è loo ke sei a kan-in nin tutu nú.» E ke nè á è tà ke man m’ede sei. 8Ke loon’t nè kuwe ɓel ra dinyege nè ngain ade ɔsi nang in-in dè ɓada se ngɔde awi. Nè ra de nel de ngain. Ei awi se tàge nè edi njékuwe-gir-Jésuge. 9Jésu unde loo tee pan ke ra de’t ede de ede nè: – M’ra sei lapya. Dinyege nè agi ngɔr reei rann’t uwei nja’n, ɗɔyi nin. 10Jésu ede de ede nè: – I ɓeli lé ta. Awi edi ngakonmge ade awi gar-gar kêm ɓeekon ke Galilée. E á è loo ke à an-in man tutu nú. 11Loo ke nja dinyege nè nain rebe ɓai ɓaa, njérɔge ke nange ke njé ngonm dè ɓadege teli awi kêm ɓee-bò’t ɔri ser nyange malang ke teei nga kété adi maw njékuje nyan-mesege ooi. 12Maw njékuje nyan-mesege awi ɔsi nja ngatɔgege le kosdooge ke Israel nan’t ɔri nan tà. Loo ke umi tà le de nan’t ɓá ɓaa, go’t gugu ɔyi nar ɓuk adi njérɔge ɓaa, ei edi de edi nè: 13– Awi i tami edi nè: njékuwe-girnge á reei ndɔɔ ɔri ninn’n se ɓoge loo ke sei i tooi ɓi. 14Ke nè á tà nè nga oso mbi njékonɓee’t ɓaa, jè kuwe j’à ger loo k’ee der gir si kade kêm si too’n lom. 15Njérɔge taai nar nè nga ɓaa, ei rai titeke d’ede’n de kété nga tɔ. Titeke bè á tà nè nga oso’n se loo mbit-mbit dann Juipge’t sár tee kêm ndɔ ke ɓila. 16Njékuwe-gir-Jésu ke dɔg-gidé-karé ɔti awi kêm ɓeekon ke Galilée dè mbal’t ke ndɔ ke Jésu unn ndu’n ade de le kade d’inge’n tutu nga. 17Loo ke d’an’n ɓá ɓaa, d’ule dè de nang dé ɗɔi’n, nè kêm njé ke nange nda geng dènn’t ɓai. 18Jésu aw ngɔr ke ra de’t ede de tàge titeke bè ede nè: – Man nga, d’ade’m tɔgmong dè nyange malang ke danrán se ke dè nang nè. 19Awi, i teli dooge malang ke ei Juipge lé ke njékuwe-girmge. Ulei de manné njonm se ri Bɔ’m a, se ri Ngonn a, se ri Ndil-Kêmnda a tɔ. 20I ndói de loo kile koje dè ndukunnge malang ke kété m’unn m’ade sei nga. An-in! man nga géa m’a m’ee der gir si se ndɔ karé-karé malang sár ndɔ ke ngeinn’t.

will be added

X\