MATTHIEU 27

1Loo ke loo ar yerer ɓá ɓaa, maw njékuje nyan-mesege se ngatɔgege malang le kosdooge malang ke Israel ɔri nan tà dè Jésu’t le kade dé tɔl’n. 2Loo ke adi d’uwe’n dé tɔ’n ɓá ɓaa, adi d’aw se’n d’ule’n ji Pilate njèkonɓee’t. 3Judas ke ndɔ ke è njèkule Jésu ji de’t an titeke dé gangtà yo dè Jésu’t ɓá ta. Ndinge ra ase’n nák. E tel se nar-nda ke kɔr-mute nga aw’n ra maw njékuje nyan-mese’t se ngatɔgege le kosdooge ke Israel. 4E ede de ede nè: – M’ra majelé tede m’ule è ke tà uwe dè’n lé ji si’t. Nè njékɔr non Juipge edi Judas edi nè: – Usu jè nyan karé lé ta. E tà kingei i kuwe. 5Judas ɔte se nar-nda nè nga aw um kɔke se ke gile kei’t le Nube. E unde loo tee aw ile kule wei. 6Nè maw njékuje nyan-mesege ɔyi nar nda nè nga ɓaa, ei tami edi nè: – Nar nè nga, gute-ndu le jéi inye loo ade jéi le kade jè teli j’umi dann made ke tò se ninn’n kêm sandu’t gugu lé, tede è nar mese ta. 7Loo ke ɔri nan tà ɓá ɓaa, ei ɔyi nar nè awi ndogoi loo ndɔr ji dingem karé ke njèkube jóge. Maw njékuje nyan-mesege ndogoi loo nè nga tede kade è loo dubu dooge ke dɔge. 8Gir’n ke nè á sár ɓila géa dé ɓar’n loo nè nga «ndɔr mese.» 9Tà ke Jérémie njèribe-dè-tà ke tà Nube’t tam kété nga aw loon’t deĵ. E tam ede nè: «Dé taa nar-nda kɔr-mute, è nar ke ngannkà Israel ɔji le ndogoi nin. 10Nar nda nè nga in-in ke kété awi ndogoi loo ndɔr le dingem karé ke njèkube jóge. E ke nè á è tà ke ndɔ ke Kuwe-ɓee unn’n ndu’n ade’m le kade m’ede de.» 11Jésu nda non Pilate njèkonɓee’t. E deje Jésu ede nè: – Ké i ngar le Juipge wa? Jésu tel ile’n dè’t ede nè: – E nga kuwe á i tam non ɓá. 12Nè tàge ke maw njékuje nyan-mesege se ngatɔgege le kosdooge ke Israel ilei dè Jésu’t nga an mar-mar anje kile de dè’t. 13Taɓai Pilate tel deje Jésu ede nè: – Tàge malang ke dé tête d’unde tài’t nga, ké i oo lé wa? 14Nè Jésu ile’n dè’t karé bè lé sár. Tà ige Pilate njèkonɓee sêl-sêl. 15Se ɓal-ɓal, loo ke d’ade ra nan Paque ɓaa, njèkonɓee ɔr dangai karé ke doobulege ndigii inye’n dɔ ade de. 16Kêm ɓaln’t nè nga, doo karé ke kɔbe’n oso se loo mbit-mbit tò dangai’t. Doo nè nga ri’n nè Barabbas. 17Loo ke Pilate an doobulege ɔsi nja nan nam-nam ɓaa, è deje de ede nè: – Ké nan sei i ndigii kade m’inye’n dɔ m’ade sei wa? Ké sei i ndigi Barabbas éké Jésu ke dé ɓar’n Krist nga wa? 18Pilate ger kété titeke d’uwe Jésu d’ule’n jinn’t se go kêmkein karè. 19Loo ke Pilate ndi nang dè ɗinger loo gangtà’t ɓaa, neen’n ule doo karé rann’t ede nè: – Ile tài tu tà’t le njè ra nyan se dè naje’n nè nga lé. Ndɔɔ laa m’nin se’n tò ɓel ngain. 20Maw njékuje nyan-mesege se ngatɔgege le kosdooge ke Israel umi tà kêm doobulege’t le kade deji Pilate ade inye Barabbas tá dɔ ade de, nè Jésu ɓaa ndigi le kade dé tɔl’n kɔke. 21Pilate njèkonɓee tel unn tà deje de ɓai ede nè: – Dooge ke joo nè nga, ké nan dann de’t á sei i ndigi kade m’inye’n dɔ m’ade sei wa? Dé tel d’ile’n dè’t d’ede nè: – Barabbas á j’è ndige kade inye’n dɔ ade jè. 22Pilate tel deje de kuwe ɓai ede nè: – A ɓaa, ké ri á m’a ra se Jésu ke dé ɓar’n Krist nga wa? Dé malang dé tel d’ile’n dè’t d’ede nè: – Maje kade ade dé ɓer’n kàde kage-ke-dese’t. 23Pilate tel nda deje de kuwe ɓai ede nè: – Ké majelé ri á è ra wa? Nè dé tel ra nyan wuu se tɔg de d’ede nè: – Maje kade ade dé ɓer’n kàde kage-ke-dese’t ke ɓer kuwe bè. 24Loo ke Pilate an titeke nyan ke soo’t goto nè doobulege rai nyan wuu ke kété-kété ɓaa, è unn mann togo’n ji’n tàkum dooge’t malang ede nè: – Man ɓaa, tà le mese njè ra nyan se dè naje’n nè nga uwe dè’m man lé. E tà le si sei kuwe. 25Kosdooge malang ilei nin dè’t edi nè: – Maje kade tà le mese’n uwe dè jé jè se ngann jége. 26Titeke bè Pilate ɔr Barabbas inye’n dɔ ade de. Nè Jésu ɓaa, ade d’unde’n se ndêin maru dàp-dàp ɓita ule’n ji de’t le kade d’aw se’n dé ɓer’n kàde kage-ke-dese’t ɓai. 27Njérɔge le Pilate njèkonɓee ɔri Jésu awi se’n kei le Pilate. Ei ɔsi nja njérɔge nan’t malang an-in dè Jésu kíng-kíng. 28Loo ke ei tɔri kubuge le’n rann’t ɓá ɓaa, ei ulei nin kubu le de ke bòi yul a, ker perm-perm a tɔ rann’t. 29Dé pete konn ke jɔkɔ-ngar d’ule dènn’t a, dé ra kage ke tà ɗuge d’ule jikonn’t ke kage-tɔse le ngarge a tɔ. D’ɔse keje de nang nonn’t d’ule’n mbe dènn’t d’ede nè: – Ngar le Juipge lapya ta. 30Dé tibe yoro kumn’t a, dé taa kage ke tà ɗuge ke jinn’t dé tunde’n dè’n vbak-vbak a tɔ. 31Loo ke njérɔge ulei mbe dè Jésu’t ase de ɓá ɓaa, ɔri kubu le de ke bòi yul ke ker perm-perm ke kété ulei rann’t kɔke. Go’t gugu ei teli tulei nin kubu le’n pa ɓita awi se’n le tɔl’n kàde kage-ke-dese’t ɓai. 32Loo ke njérɔge à undei loo le teei se Jésu kawi se’n gide ɓee-bò’t nata ɓaa, ei ingei dingem karé ke ɓee le’n è Cyrène deĵ. Ei undei tɔg dènn’t le kade unn kage-ke-dese le Jésu nga oto. Dingem nè nga ri’n nè Simon. 33Dé ree tee loo karé’t bè ke ri’n nè Golgotha, tel ta kɔje jéi ɓaa è «Ngó dè dooge». 34Njérɔge adi Jésu mann nduu ke pɔti nan’t se mann nyan karé ke ate ngain kade an-in. Nè loo ke è nan ndêin ɓaa, è ndige kain lé. 35Loo ke njérɔge ɓeri nin kàde kage-ke-dese’t ɓá ɓaa, ei tɔri kubuge le’n ke rann’t turi jala dè’t le kan ké à ei le nan wa? 36Dé tel dé ndi nang d’ade ngonm Jésu. 37Dé ndang gir tà ke d’ile’n tà dènn’t kade kage-ke-dese’t, dènn’t dɔ d’ede nè: «Doo nè nga è Jésu, ngar le Juipge.» 38Dé ɓer gon-ɓogege joo se’n nan’t. Dé ɓer è ke karé dè jikonn’t a, è ke karé dè jigeln’t a tɔ. 39Dooge ke derri loo’t nè nga taji Jésu a, tugei dè de nêk-nêk a tɔ, edi nè: 40– I ke njè tuju gile kei ke tò se ninn’n le Nube le tel ra’n gugu rang dann ndɔ mute’t nè kuwe, ke nè á i Ngonn Nube kerɔte ɓaa, i taa rai i kuwe tà yo’t, i rise nang kàde kage-ke-dese’t nè nga ade j’an ta. 41Maw njékuje nyan-mesege géa tulei mbe dènn’t titeke njékɔrgir gute-nduge se ngatɔgege tulei mbe dènn’t nga tɔ. 42Njékuje nyan-mesege tami edi nè: – Ndɔ ke n’aje njé ke rang nè n’ase kaje rayé n’ee kuwe lé. Ke nè á n’ee ngar le Israelge kerɔte ɓaa, maje kade n’rise nang kade kage-ke-dese’t ɗarinè n’ade j’an ɓaa, j’à j’um kêm jé dèyé’t. 43N’unde kêmé dè Nube’t tchên. Ke nè á tur’n tedé kerɔte ɓaa, maje kade taayé tà yo’t ɗarinè ade j’an, tede ndɔ ke n’tam n’ede nè: «Man m’ee Ngonn Nube.» 44Gon-ɓogege ke joo ke dé ɓer de se Jésu nan’t kade kage-ke-dese’t nga géa, taji nin tɔ. 45Kàde nda dann ɓee bɔp. Tilkus sebe rip dè nang nè bere mbak sár ade kàde ke mute ke loo sɔlé ase’n. 46Loo ke nain ngɔr kade kàde ke mute ase ɓaa, Jésu tam tà se ndu’n ke bòi beng ede nè: – Eli, Eli, lema Sabachthani, gir’n è: «Nube le’m, Nube le’m, ké tede ri á i sure’m inye’m wa?» 47Loo ke doo ke nange ke ndai loon’t nè ooi tà ke Jésu tam nè nga ɓaa, ei tami edi nè: – Ooi, doo nga ɓar Elie. 48Ke loon’t nè kuwe, doo karé dann de’t an-in ngɔde aw unn nyan karé ke tanan se kann njan bè ule dann mann nduu ke mase’t. Taɓai è ule tà káde nyan’t ule ade Jésu le kade njibe. 49Nè njé ke rang tami edi nè: – Inye ade j’an-in ké Elie nga à ree le kajé wa? 50Jésu tel tam tà se ndu’n ke bòi beng, ke loon’t nè kuwe tà’n tête nyonk. 51An! tà kubu ke dé gang’n gile kei ke tò se ninn’n ribe danné loo joo, unn gir dɔ sár oso’n nang banjang. Ke loon’t nè kuwe, nang yei ɓuk-ɓuk a, herge njanrein danné ngangang-ngangang a tɔ. 52Tà be-ɓadege teein ade danra njétaakêm-Kristge bule ke ndɔ ke weii undei loo teei dann njé ke koo’t a tɔ. 53Loo ke Jésu unde loo tee dann njé ke koo’t ɓá ɓaa, njétaakêm-Kristge ke ndɔ ke weii undei loo teei pan awi kêm ɓee-bò ke tò se ninn’n adi dooge bule ngain an-in de. 54Loo ke njèkan dè njérɔge ke aru karé se njérɔge ke ngonmi Jésu se’n, ei an-in nang ke yei ɓuk-ɓuk se nyange ke teei nè nga ɓaa, ɓel unde ndàt gang dè ade tami edi nè: – Loo naje’n goto, doo nè nga è Ngonn Nube kerɔte kuwe. 55Dinyege bule ke unni gir danni Jésu ɓeekon ke Galilée nga ndai heb, ei an-in nyange ke teei nè nga. Dinyege nè nga, ndɔ ke ei njé ra se Jésu dè nyange ke è aw ndoo’n. 56Marie ke ɓee le’n è Magdala se Marie ke kon Jacques se Joseph se kon ngannge le Zébédée géa ei dann dinyege’t nè nga tɔ. 57Loo ke loo sɔl ɓá ɓaa, dingem karé ke è baw ree. Doo nè nga géa è njèkuwe-gir-Jésu tɔ. Ri’n nè Joseph. Ɓee le’n è Arimathée. 58Dingem nè nga aw ra Pilate’t deje’n ninn Jésu. Pilate unn ndu’n le kade d’ade Joseph ninn Jésu. 59Joseph unn ninn Jésu aw’n um’n ngire se tà kubu ke kige ke ra lênd-lênd. 60E unn ninn Jésu aw unde ndeĵ kêm bolè mbal ke ade dé son kige ɔje’n dè’n è Joseph kuwe. Go’t gugu, è ndubri kuberi her ke bòi utu’n tà be-ɓade nè nga ɓita ɔte aw ɓai. 61Marie ke ɓee le’n è Magdala se Marie ke karé ke rang ndii nang turi kum de ke tà ɓade’t. 62Barè lookar’n à è ndɔ ke njè kutu go ndɔ kuwe dè nja nyange. Maw njékuje nyan-mese se Pharisienge ɔsi nja nan awi se ra de ra Pilate’t edi nin edi nè: 63– Ngar ke maje, kêm jé olé dè tà’t le njè libe kum dooge nè. Kété ke ndii’n se dè’n dɔ ɓai nga, è tam ede nè: «Ndɔ ke njékon’t mute ɓaa, m’a m’unde loo tee dann njé ke koo’t.» 64Unn ndui ade njérɔge ngonmi dè ɓade nè nga tchên sár ndɔ ke njékon mute, nè bainléa njékuwe-girége à reei kɔri ninné se ɓoge ɓaa, à teli kawi kedi kosdooge kedi nè: «Jésu nga unde loo tee dann njé ke koo’t ɓá.» E ke nè á è tà libe kum dooge ke à majelé ngain dum ke kété nga ɓai. 65Pilate ede de ede nè: – An-in! njérɔge á ndai nè. Awi ɓaa i ngonmi dè ɓade nè nga tchên titeke sei ooi se mbi si. 66Maw njékuje nyan-mesege se Pharisienge ɔti awi ndubri kuberi her ilei tà be ɓade’t, taɓai, lon-in tà langt-langt ɓita undei njérɔge tà’t kade ngonmi ɓai.

will be added

X\