MATTHIEU 26

1Loo ke Jésu tam tàge nè nga gir gang ɗás ɓá ɓaa, è ede njékuwe-girnge ede nè: 2– Sei geri titeke nain ndɔ joo ɓaa à è ndɔ ra nan Paque. Man ke m’ee Ngonn doo nga, d’a d’uwe’m kule’m ji dooge ke geri Nube lé tede kàde ɓeri man dɔ kàde kage-ke-dese’t. 3Maw njékuje nyan-mesege se dooge ke kum de unju dann kosdooge ke Israel ɔsi nja nan nam-nam kêm geng’t le maw njèkuje nyan-mese ke ri’n nè Caiphe. 4Ei umi tà le de nan’t têrêre^ le kade dé ra gos d’uwe Jésu dé tɔl’n kɔke. 5Nè ei tami edi nè: – E tà le kuwe’n tàkum dooge ndɔ ra nan’t lé, tede kosdooge à in-in se jéi se tà. 6Jésu ndi kêm ɓee ke Béthanie kei le Simon ke kété banje ra’n. 7Loo ke è ndi tà nyankuse’t ɓaa, dinye karé bè ree aw kei goon’t se ku wubu ke dé ra se her ke ri’n nè albatre. Wubu nè nga rusu kêm kuu’n neĵ. E wubu ke nar’n ur kugu, nè dinye nè ɔr tà’n taɓai è tête dè Jésu’t. 8Loo ke njékuwe-gir-Jésuge an-in bè ɓaa, wur de gang mbann ade tami edi nè: – Ké tede ri á dinye nè nga nuju wubu nè se ndáng kɔke bè wa? 9Ke nè á d’ige wubu nè ɓaa, d’a d’inge nar’n ngain le kai njéndooge. 10Jésu oo tà ke dé tam nè nga mbak. E deje de ede nè: – Ké è tede ri á i rai dinye nè nga adi ɔr’n yàl-yàl bè wa? Nyan ke è ra se’m nè nga è nyan ke maje. 11Njéndooge nga ndii se si se ndɔge malang, nè man ɓaa m’a m’ndi se si se ndɔ’m ndɔ’m lé. 12Dinye nè nga ndum’m wubu unde konn ɓita kade d’um’m ngire ɓai. 13Kerɔte kuwe, man m’ede sei ndàt, loo malang ke dè nang nè ke d’a d’ile mber Tà ke Maje nè tutu nga, d’a d’ɔr ser nyanra dinye nè kade kêm dooge à olé’n dènn’t a tɔ. 14Judas Iskariot è njèkuwe-gir-Jésu ke karé dann njé ke dɔg-gidé-joo’t. E aw ra maw njékuje nyan-mesege’t ede de ede nè: 15– Ke nè á m’ule Jésu nga ji si’t ɓaa, ké ri á a adi man wa? Maw njékuje nyan-mesege mbɔji nar-nda kɔr-mute adi Judas. 16Unn gir kêm ndɔn’t nè nga, è sang loo ke kanm le kule’n ji de’t. 17Ndɔ ke desêin le nan Paque ke anje pululu nga, njékuwe-gir-Jésuge reei rann’t deji nin edi nè: – Ké loo ke ra i ndige kade j’uwe dè nja nyan ra nan Paque nga tutu j’adi wa? 18Jésu tel ile de dè’t ede nè: – Ɔti awi kêm ɓee-bò’t kêm kei le doo karé edi nin edi nè: «Njèndó dooge nyan tam ede nè: Ndɔ le’m nain ngɔr. Man se njékuwe-girmge j’à j’use mapa ke ɔje dè nan Paque nga kêm kei lei.» 19Njékuwe-gir-Jésuge rai titeke è ede’n de kété nga. Ei uwei dè nja nyan ra nan Paque adi asenan ɓá. 20Tà ndɔ’t ɓaa, Jésu se njékuwe-girnge ke dɔg-gidé-joo awi ndii tà nyankuse’t. 21Loo ke ndii à usei nyan ɓaa, Jésu ede de ede nè: – Kerɔte kuwe, man m’ede sei ndàt, doo karé dann si’t à ule’m ji dooge’t. 22Kum njékuwe-girnge malang il kororo ade unni gir deje’n tà se gonan-gonan edi nè: – Kuwe-ɓee, ké è man lé láa? 23Jésu tel ile de dè’t ede nè: – E è ke ule ji’n se’m nan’t kêm nyankuse nyan’t kuwe á à ule’m ji dooge’t. 24Man ke m’ee Ngonn doo nga, m’a m’ɔte kaw se go tà ke dé ndang kêm magtub’t d’ɔje’n dè’m. Nè doo ke njèkule’m ji dooge’t nga, à an ɓai! Doo nè nga, ke nè á ndɔ ke d’oje’n lé géa è soo’t. 25Judas ke njèkule’n ji de’t nga deje’n tɔ ede nè: – Njèndó dooge nyan, ké è man wa? Jésu tel ile’n dè’t ede nè: – E kuwe i tam tài’t non. 26Loo ke dé ndi tà nyankuse’t ɓaa, Jésu unn mapa karé deje ndutɔr le Nube ɓita tête danné ade njékuwe-girnge ede nè: – I taai usei, è ke nè è danra’m. 27Go’t gugu è unn nyankain mann nduu deje ndutɔr le Kuwe-ɓee ɓita tel’n ade njékuwe-girnge ede nè: –Umi pêrm-pêrm adi nan gute malang. 28Oiyo, è ke nè nga è mese’m, mese mann-ra ke d’ade an-in dè nang nè kade dooge bule ingei kêm tin mbit dè kaiyage’t le de. 29Man m’ede sei ndàt, m’a tel kain mann nduu nè gugu ndan lé sár kade ndɔ ke m’an-in’n se si njè ke kige kêm Konɓee’t le Baa. 30Go’t gugu, d’ɔse page ɓita d’unde loo dé tee d’aw dè mbal’t ke kage olivierge ndai tutu ɓai. 31Jésu ede njékuwe-girnge ede nè: – Dann ndɔɔ nè kuwe, loo ke a an-in nyan ke à tee dèm’t ɓaa, sei malang a i tusi kundekêm le si kinyei. Dé ndang kêm magtub’t d’ede nè: «M’a m’unde njèkul dange kum yoo’n ɓaa, kos batege à an-in sanréi nan karé-karé.» 32Nè loo ke d’a d’ade m’a m’unde loo tee dann njé ke koo’t ɓaa, m’a m’aw kété non si’t kêm ɓeekon ke Galilée. 33Pierre unn tà tam ede Jésu ede nè: – Ke nè á dooge ke rang malang à tusi kundekêm le de kinyei tede nyan ke à tee dèi’t nè nga géa, man ɓaa, m’a m’tusi kinyei ndan lé. 34Jésu tel ile’n dè’t ede nè: – Man m’edi ndàt, dann ndɔɔ nè kuwe a i naje se rai dèm’t nja mute ɓita kuren kunje à non kɔkerɔ kon ɓai. 35Pierre tel ede Jésu ede nè: – Né è tà le kade m’wei sei géa, gar-gar m’a m’tɔr naje se ra’m dèi’t ndan lé. Gute njékuwe-gir-Jésuge malang géa tami titeke bè kuwe tɔ. 36Jésu ree tee se njékuwe-girnge kêl loo ke dé man kagege tutu. Loo nè nga ri’n nè Gethsémané. E ede de ede nè: – I ndii nang loo ke nè’t sár adi m’aw nú m’ɔje tà se Nube ɓita. 37Jésu ade Pierre se ngann le Zébédéege ke joo awi se’n nan’t. Nyantosowur unn gir taa ra’n pel-pel ade kàde’n gete get-get. 38E ede de ede nè: – Kêm’m ndinge ra’m sár à kase yoo’m. I ndii loo ke nè’t, ɔgi kum si ɓi se’m. 39Jésu aw mbɔr ke kété ɓaa, oso labe tà kêm’n nang ɔje tà se Nube ede nè: – Bɔ’m, i asekum kute nyantosowur nè nga dèm’t mbeng ke rang kuwe. Né è bè géa, i ra nyan ke kêm’m man á ndige lé, nè i ra nyan ke kêmi ndige. 40Loo ke è tel ree ra njékuwe-girnge ke mute’t ɓaa, è inge de dè ɓi’t. E deje Pierre ede nè: – Ké sei asikum kɔge kum si ɓi se’m ase kurloo karé bè lé wa? 41I ndii dè nja si’t ɔji tà se Nube tede le kade osoi dann nyan sú’t lé. Ndil si ndi kum kuwe, nè danra si á yai. 42Jésu ɔte aw heb ɗêk ɔje tà se Nube njékon’t joo ede nè: – Bɔ’m ke nè á loo ke kade ute nyantosowur nè nga dèm’t mbeng ke rang goto ɓaa, i ra nyan ke kêmi ndige. 43Go’t gugu, è tel ree ra njékuwe-girnge’t ɓaa, è inge de dè ɓi’t tede kum de ojo nan’t ngandang-ngandang se ɓi. 44Jésu inye de ɔte aw heb ɗêk ɔje tà se Nube njèkon’t mute. E tam kum tà ke kété nga kuwe ɓai. 45E tel ree ra njékuwe-girnge’t ɓai ede de ede nè: – Ké a ɔdi nan tò ɓi se taa kebe le si nga kuwe ɓai wa? An-in! kàde ke d’ule’m man ke m’ee Ngonn doo ji njé ra majelége’t ase ɓá ta. 46In-in dɔ ade j’awi, tede njékule’m ji dooge’t nga à ree non. 47Loo ke tà nain tà Jésu’t ɓai ɓaa, Judas njèkuwe-gir-Jésu ke karé dann njé ke dɔg-gidé-joo’t ɔr non kos njérɔge mbuu tee’n pan. Kos njérɔge nè nga ei se kuye kaskar, se ɗugur kage ji de’t kêl-kêl. E maw njékuje nyan-mesege se ngatɔgege le kosdooge ke Israel á ulei kos njérɔge nè nga. 48E njèkule Jésu ji de’t ra nyan karé tɔje’n dè loo kuwe’n ede nè: – Doo ke m’a m’ra’n lapya a, m’uwe’n kàdem’t sêm a tɔ ɓaa, è doo’n nga kuwe, uwei nin. 49Ke loon’t nè kuwe, Judas aw ngɔr ke ra Jésu’t ede nè: – Lapya ngar. E ra’n lapya a, uwe’n kàdenn’t sêm a tɔ. 50Jésu tel deje’n ede nè: – Made’m, nyan ke i ree le ra nga, i ra ta. Dooge agi ke ra Jésu’t uwei nin. 51An! doo karé dann njémade-loo-kawge le Jésu ɔr kuye kaskar lêw tuge’n mbi ngonn njèndi le maw njékuje-nyanmese yap. 52Ke loon’t nè kuwe Jésu ede doo nè nga ede nè: – I tel se kuye kaskar lei ule kêm sabann’t gugu jêke^. Kerɔte kuwe, njé ke unni kuye kaskar rɔi nga à weii yo kuye kaskar tɔ. 53Ké i gir kêmi’t titeke ɗarinè m’asekum ɓar Bɔ’m kade din-in’m se kos njérɔge ke asi aru dɔg loo kɔr-mute-mute nga lé wa? 54Tà ke dé ndang kêm magtub ke tò se ninn’n d’ede nè: «Gar-gar nyan nè nga à tee titeke bè» nga, ké à aw loon’t deĵ titeke bain wa? 55Kêm kàdenn’t nè nga, Jésu deje kosdoo-bulege ede nè: – Ké man m’ee ngar le njékɔse tà se njékonɓeege á i reei se kuye kaskarge se ɗugur kagege ji si’t kêl-kêl tá le kuwe’m wa? Ndɔ karé-karé malang m’ndi nang dann si’t m’ndó dooge nyan kêm kei’t le Nube a tɔ. Nè sei uwei man lé. 56Nè nyan nè nga, è titeke bè le kade tà ke njéribe-dè-tàge ke tà Nube’t tami nga aw’n loon’t deĵ. Njékuwe gir-Jésuge malang inyei nin ɔti an-in nan karé-karé. 57Njékɔrgir gute-nduge se ke ngatɔgege ɔsi nja nan kêm kei le Caiphe maw njèkuje nyan-mese ndii ngineii. Njé ke reei uwei Jésu nga, awi se’n ra de’t. 58Pierre ndolè goo’n nè ade dann de heb ɗêk ndêin sár aw’n kêm geng’t le maw njèkuje nyan-mese. E tête ra’n ndi nang se ngann njéndige le Caiphe tede le kan girson nyan ke d’ayé ra se Jésu. 59Nè maw njékuje nyan-mesege se njégangtàge sangi dooge kade têti tà undei tà Jésu’t le kade adi dé tɔl’n. 60Njékɔrgotàge ke lanmge bulei reei loon’t, nè ingei tà karé bè ke le tête kunde tànn’t lé. Go’t gugu ɓaa, dooge joo reei tami edi nè: 61– Doo nè nga ndɔ ke tam ede nè: n’asekum tuju gile kei ke tò se ninn’n le Nube nga kɔke le tel ra rang dann ndɔ mute ke mute nè. 62Maw njèkuje nyan-mese ɔse nang in dɔ deje Jésu ede nè: – Tà ge ke dooge nè ilei dèi’t nga, ké a tel kile de dè’t lé wa? 63Nè Jésu an’n mar-mar anje kile de dè’t. Maw njèkuje nyan-mese tel deje Jésu ede nè: – Man m’deji se ri Nube ke njèndi kumgajer le kade ede jè ndàt: ké i nga i Krist Ngonn Nube kuwe wa? 64Jésu tel ilé dè’t ede nè: – E nga kuwe i tam non ɓá. Nè man m’ede sei ndàt, unn gir ɗarinè, sei a an-in man ke m’ee Ngonn doo m’a m’ndi dè jikon Nube ke Njètɔgmong’t. Sei a kan-in man loo ree’t le’m dann bum’t dɔ danrán. 65Ke loon’t nè kuwe maw njèkuje nyan-mese tuwe kubuge ke rann’t til parang-parang ede nè: – N’ee nga n’taje Nube ɓá ta. Ké j’awi ndoo njékɔrgotàge ke rang tede ri ɓai wa? Ɗarinè n’taje Nube ade ooi se mbi si ɓá. 66Ké tà ri sei giri wa? Njékɔrgir gute-nduge se ngatɔgege ilei maw njèkuje nyan-mese dè’t edi nè: – Doo nè nga tà yo uwe dè’n kerɔte kuwe. 67Ke loon’t nè kuwe d’unn gir tibe yoro kumn’t a, dé tunde mbɔr’n njanm-njanm a, njé ke nange ɓiri ji de tɔsi nin tɔlɔk-tɔlɔk a tɔ edi nè: 68– Krist, ede jè, ké nan undei non wa? 69Pierre ndi nang nata kêm geng’t. Ngonn njèndi ke dinye karé bè ree ngɔr rann’t tam se’n ede nè: – I géa ndɔ ke i njiye nan’t se Jésu, doo ke ɓeekon ke Galilée nga tɔ. 70Nè Pierre naje se ra’n dè Jésu’t tàkum dooge’t malang ede nè: – Tà ke i tam nga, m’ger suu’n lé. 71Pierre ɔse nang in aw kum’n ke tà rebe geng’t nata. Ngonn njèndi ke dinye karé ke rang an’n ɓaa, ede dooge ke ndai kêm geng’t ede nè: – Doo nè nga, ndɔ ke è nan’t se Jésu, doo ke ɓeekon ke Nazareth nga tɔ. 72Pierre tel naje se ra’n dè Jésu’t njáng ede nè: – M’ger doo nè nga lé njing kerɔte kuwe. 73Mbɔr go’t gugu ɓaa, njé ke ndai kêm geng’t reei ra Pierre’t edi nin edi nè: – Loo naje’n goto, i nga géa ndɔ ke i dann de’t tɔ. Tà tami kuwe ɔr giri. 74E á Pierre unn gir mann ra’n dap-dap ede nè: – Naje, doo le si non nga m’ger’n lé njing. Ke loon’t nè kuwe kuren kunje non kɔkerɔ kon. 75Kêm Pierre olé dè tà ke ndɔ ke Jésu ede’n kété ede nè: «Kété ɓita kade kuren kunje non kɔkerɔ kon nga, a i naje se rai dèm’t ase nja mute.» Pierre unde loo tee nata non ɓɔkl-ɓɔkl.

will be added

X\