MATTHIEU 22

1Jésu tel ede doobulege tà se gostàge ede nè: 2– Konɓee ke danrán nga tò asenan se ngar karé bè ke ade dé koré mur tête tà ɓee le ngonn’n ke dingem. 3E ule ngann njéndige le’n ade awi edi njé ke ndɔ ke è ɓar de loo mur tête tà ɓee’t nè nga. Nè dé ndige ree lé. 4E tel ule ngann njéndige le’n ke rang taɓai ede nè: «Awi edi njé ke m’ɓar de loo mur tête tà ɓee’t nga edi nè: An-in! m’ade dé koré mur tête tà ɓee nga wei ɓá ta. Taɓai m’ade dé tɔl dig mangege se nar-kulge le’m ke der ndɔl-ndɔl ɓá a, d’uwe dè nja nyan malang ɓá a tɔ. I reei loo mur tête tà ɓee’t nè nga ta.» 5Nè use de nyan lé ade d’ɔte ɗák d’aw looge le de. E ke karé ɔte aw ndɔrɔ le’n a, è ke karé ke rang ɔte aw loo ra gate’t le’n a tɔ. 6Gute njé ke rang tuwei ngann njéndige le’n rai se de nyan ke tur a, tɔli de a tɔ. 7Ke loon’t nè kuwe wong ra ngar ade ule kos njérɔge le’n ade awi tɔli dé njé tɔl dooge nè nga kɔke a, tulei por dè ɓee-bò’t le de adi ró rák-rák a tɔ. 8Ngar ede ngann njéndige le’n ede nè: «Mur tête tà ɓee nga, è ke kuwe dè nja ɓá, nè njé ke ndɔ ke m’ɓar de nga, asi ndii loon’t lé kuwe. 9Ɔti awi i ndai tà gaje rebege’t gide ɓee’t nata. Dooge malang ke a ingei de nga i ɓari de i reei se de loo mur tête tà ɓee’t nè nga.» 10Ngann njéndige nè nga ɔti awi se ngann rebege gai-gai kebi njé ke majelé se njé ke majege malang ke ingei de nga reei se de ade rusi loo kêm kei nè nga táp-táp. 11Loo ke ngar aw kêm kei le kan dooge ke è ɓar de nga ɓaa, an dingem karé ke ule kubu ra nan rann’t lé. 12E tel deje doo nè nga ede nè: «Dingem, ké i ra bain á i ree’n loo’t nè anje kule kubu ra nan rai’t wa?» Dingem nè nga an tà ke le tam lé. 13Ke loon’t nè kuwe ngar ede ngann njéndige le’n ede nè: «Uwei n’ee, i tɔi jiyé se njayé ilei n’ee dann loo ke ndul ndin-ndin’t nata. E loo ke dooge à noin jik-jik tutu a, à toin tà de tutu vbat-vbat a tɔ.» 14Jésu tel ede de ede nè: – Kerɔte kuwe, dooge ke dé ɓar de nga bulei kuwe, nè njé ke dé tɔr de d’unde de se ei ngain lé karè. 15Pharisienge ɔri nan tà dè nyan ke kum ra le kile’n tà dè Jésu’t se go tà karé ke à tee tànn’t. 16Pharisienge ɔri pajage le de se njé le Hérode ulei de ra Jésu kade deji nin edi nè: – Njèndó dooge nyan, jè ger titeke i i njè kusu dè tà lé a, rebe nyange ke Nube ɔje ke i ndó dooge nga è ngarankum tà kerɔte kuwe. I i njè ndête kum doo karé bè tede nyankinge’n éké tede girkoje le’n lé a tɔ. 17Ede jè, tà gir lei dè tà’t nè: Kuge tir César nga, è nyan ke kum ra éké kum ra lé wa? 18Nè Jésu ger kêmyêr le de mbak ɓá. E tam se de ede nè: – Sei njékede gosge, ké bain á uyei gum nonm’t wa? 19Ɔji man sile ke d’uge’n tir nga adi m’an. Dé ree se sile nar kule ke ndɔ karé dé tɔje’n. 20Jésu deje de ede nè: – Ké dè nan éké ri nan dé ndang tu sile’t nè nga wa? 21Dé tel d’ile’n dè’t d’ede nè: – Dè doo nè nga, è dè ngar ke bò César a, ri doo nè nga géa è ri César a tɔ. Jésu tel ede de ede nè: – Adi César nyan ke ɔje dè’n a, nyan ke ɔje dè Nube ɓaa, adii a tɔ. 22Loo ke d’oo tà nè nga bè ɓaa, tà ige de sêl ade d’inye Jésu d’in mênênn-mênênn d’aw loo le de. 23Kêm ndɔn’t nè nga Saddusienge ke njé tam kede nè: dooge à undei loo teei koo ndan lé nga reei ra Jésu’t. Ei deji nin tà karé edi nè: 24– Njèndó dooge nyan, ndɔ ke Moise tam ede nè: «Ke nè á dingem se dinye taai nan, nè oji ngonn ke dingem lé ɓai á dingem wei ɓaa, maje kade ngokon’n ke ndêin taa dinye nè unde’n gute ngokon’n ke wei.» 25An! kété ngakon nange ji sejimute ndii dann jé’t laa. Njè ke ngatɔg taa dinye nè wei anje koje ngonn ke dingem. E inye dinye nè nga nang ade ngokon’n ke girn’t. 26Nè ngokon’n ke girn’t nga géa wei nal koje ngonn ke dingem tɔ. Njèkon de’t mute géa, è titeke bè tɔ sár tee’n dè njèkon de’t ji sejimute. 27Loo tɔl tà’n ɓaa, dinye nè nga géa wei utu go de mbak. 28Ndɔ ke dooge à undei loo teei koo nga ɓaa, ké nan á à è ngaw dinye nè ke get dann de’t wa? Kerɔte kuwe, dé ji sejimute mbak dé taa’n ke neen de. 29Jésu tel ile de dè’t ede nè: – Sei ndemi uri walé ɓá ta, tede sei geri magtubge ke tooi se ninn de nga lé a, tɔgmong le Nube géa sei geri lé a mbak. 30Ndɔ ke dooge à undei loo teei koo nga, dingem à taa dinye lé a, d’a d’ade dinye à taa ngaw lé a tɔ. Nè tàgir le de à tò ɔje dè ra kule kade Nube se ɗɔi’n kuwe karé bere tite dooge ke danrán bè tɔ. 31Tà ke Nube tam ede sei ɔje dè dooge ke à undei loo teei koo nga, ké sei tutei an-in lé ɓai wa? Nube tam ede nè: 32« Man m’ee Nube le Abraham se Isaac se Jacob a tɔ.» Nube nga, è Nube le njé ke weii lé, nè è Nube le njé ke ndii kumgajer. 33Loo ke kosdoo-bulege ooi tà nè bè ɓaa, ndil de tee an-in soin-soin dè tà ke Jésu ndó de’t. 34Loo ke Pharisienge ooi titeke Jésu uwe tà Saddusienge se tà ɓaa, ɔsi nan reei ingei nin. 35E ke karé dann de’t è njèndó dooge gute-ndu Nube deje Jésu tà karé le kuye’n gum nonn’t ede nè: 36– Njèndó dooge nyan, ké ndukunn ke ra dum dè madege malang kêm magtub gute-ndu’t nga wa? 37Jésu tel ile’n dè’t ede nè: «Gar-gar i a tár Kuwe-ɓee Nube lei nga dè ɓengrei’t se danrai bere mbak a, se tàgir lei bere mbak a tɔ.» 38E ke nè á è ndukunn ke desêin ke dum dè madege malang. 39Ndukunn ke njékon’t joo nga tò tanan se è ke desêin kuwe ɓai ede nè: «Gar-gar i a tár doo madi titeke i ra’n se rai bè tɔ.» 40Ndukunnge ke joo nè nga ei gir gute-ndu bere mbak ke Moise ndang a, se magtubge le njéribe-dè-tàge ke tà Nube’t a tɔ. 41Loo ke Pharisienge ɔsi nja nan ra Jésu’t ɓaa, è deje de ede nè: 42– Ké tà ri á sei giri ɔje dè Messie nga wa? Ké sei giri kêm si’t edi nè: è ngonnkà nan wa? Dé tel d’ile’n dè’t d’ede nè: – E nga, è ngonnkà David. 43Jésu tel deje de ede nè: – A ɓaa ké bain Ndil-Kêmnda ɔse David ade ɓar’n Kuwe-ɓee le’n wa? Tede David nga ndɔ ke Ndil-Kêmnda ule tà tànn’t ade tam ndàt ede nè: 44«Kuwe-ɓee ede Kuwe-ɓee le’m ede nè: I ndi dè jikonm’t sár kade m’ade njébange lei teli ei nyan-sure-nja kum lei.» 45Ke nè á ndɔ ke David ɓar’n Kuwe-ɓee ɓá ɓaa, ké Messie à tel k’ee ngonnkà’n titeke bain taɓai wa? 46Doo bè karé géa asekum kile Jésu dè tà’t nè nga lé. Unn gir kêm ndɔn’t nè nga, doo karé bè géa ndige tel deje’n tà gugu lé ta.

will be added

X\