MATTHIEU 19

1Loo ke Jésu ndó de tàge nè gir gang ɓá ɓaa, è in ɓeekon ke Galilée aw gide ba Jourdain kêl ɓeekon ke Judée. 2Kosdoo-bulege ngain unni dè nja’n awi goon’t nú ade ɔr ratur ra de’t. 3Pharisienge reei ra Jésu’t le ndon tà’n se tà. Ei deji nin edi nè: – Ké dingem asekum mbate neen’n tede tà le nyan ke rara géa wa? 4Jésu ile de dè’t ede nè: – Tà ke kêm magtub’t nè nga, ké sei i tutei an-in lé wa? Oiyo, kété ke desêin sàk-sàk nga, Nube Njèkunde nyange malang unde dingem karé se dinye karé a tɔ. 5Taɓai è tam ede nè: «Gir’n ke nè á dingem à inye bɔ’n se kon’n le kum nan’t bɔk se neen’n. Ei joo mbak à teli k’eei danra ke karé bere luk-luk ta.» 6Titeke bè, ei danra ke gai-gai joo lé ta, nè ei danra ke karé bere luk-luk. Dingem se neen’n ke Nube um de nan’t nga, maje kade doo kai de danné lé. 7Pharisienge teli deji Jésu edi nè: – A ɓaa, ké bain á ndɔ ke Moise unn ndu’n le kade loo ke dingem à mbate neen’n ɓaa, maje kade ade’n magtub tin nan jinn’t kété ɓita mbate’n ɓai wa? 8Jésu tel ile de dè’t ede nè: – E tede dum nan le si á ndɔ ke Moise inye’n loo ade sei adi i mbati neen sige. Nè kété ke desêin sàk-sàk nga è titeke bè lé. 9Man m’ede sei ndàt, nanan ke mbate neen’n tede tà le nyan ke rang lé, nè tede tò se nan ke kaiya’t tel taa dinye ke rang ɓaa, tà tò se nan ke kaiya’t uwe dè’n. 10Njékuwe-gir-Jésuge tami edi nè: – Ke nè á taa dinye è nyan ke bè tede dingem ɓaa, taa dinye lé è soo’t ngain. 11Nè Jésu tel ile de dè’t ede nè: – Dooge malang à geri gir tà nè nga lé, nè njé ke Nube ade de nonkar tá asikum taai tà nè nga. 12Gir nyange ke ade dingemge ke nange asikum taai dinye lé tò loo bule. Njé ke nange è kuju ke in-in kêm kon dege’t a, njé ke nange ɓaa è dooge á ɔri de kuju a, dooge ke nange tɔ ɓaa è ei kuwe á teli ra de ke kuju tede Konɓee ke danrán a tɔ. Nanan ke asekum taa tà nè nga ɓaa, maje kade taa. 13Dooge reei se ngannge ra Jésu’t le kade ile ji’n dè de’t a, le kade tɔr ndu’n dè de’t a tɔ. Nè njékuwe-girnge in-in se njé ke reei se ngannge nè nga. 14Nè Jésu ede njékuwe-girnge ede nè: – Inyei ngannge adi reei ram’t m ɔgi de lé. Kerɔte kuwe, Konɓee ke danrán è tede le njé ke tooi asinan se ngannge nè nga bè. 15Loo ke Jésu ile ji’n dè de’t ɓá ɓaa, in loon’t nè aw rang. 16Dingem karé bè ree ra Jésu’t deje’n ede nè: – Njèndó dooge nyan, ké nyan ri ke maje á m’a ra gar-gar tá le kinge’n ndikumgajer se non nga wa? 17Jésu tel deje dingem nè nga ede nè: – Ké bain i deje’m tà ɔje dè nyan ke maje ɔr njêt’t wa? Doo karé ke njè ra nyan ke maje ɔr njêt goto. Nè Nube kuwe karé bere á è njèra maje. Ke nè á i ndige kaw loo ndikumgajer’t ɓaa, an dè ndukunnge sêw-sêw a, i ra nyan’n a tɔ. 18Doo nè nga tel deje Jésu ede nè: – Ké ndukunn ke ra taɓai wa? Jésu tel ilé dè’t ede nè: – I a tɔl doo lé; i a sang dinye le doo lé; i a ɓoge lé; i a tête tà kunde tà doo’t lé; 19i a kile koje dè bɔi se koin; i a tár doo ndul madi titeke i ra’n se rai i kuwe bè tɔ. 20Basa doo nè nga ede Jésu ede nè: – Nyange nè nga malang m’an dè sêw-sêw ɓá, ké ri á nain kade m’ra taɓai wa? 21Jésu ede dingem nè nga ede nè: – Ke nè á i ndige le k’ee doo ke maje ɔr njêt ɓaa, aw ige nyanbawge lei malang inye nar’n i kai njéndooge ɓaa a inge nyanbaw ra Nube’t danrán nú. Aw i ra nyange nè pa ɓita i tel ree unn rebe goom’t ɓai. 22Nè loo ke basa doo nè nga oo tà nè nga bè ɓaa, kêm’n nel’n lé ade ɔte se wong biring aw tede nyankinge’n è ngain. 23Jésu tel ede njékuwe-girnge ede nè: – Kerɔte kuwe, man m’ede sei ndàt, le kade baw um nan’t bɔk se Nube nga è nyan ke loo’n tur ngain. 24Man m’tel m’ede sei ɓai: le kade lugman ur bolè libri’t tee nga è nyan ke tur ngain. Nè le kade baw ile nja’n kêm Konɓee’t le Nube nga, è nyan ke loo’n tur ngain dum le lugman ɓai. 25Loo ke njékuwe-gir-Jésuge ooi tà nè bè ɓaa, tà ige de sêl-sêl ade tami edi nè: – Ke nè á è bè ɓaa, ké nan d’asekum kaje’n ta wa? 26Jésu tel an de gerer ɓaa, è ede de ede nè: – Nyan malang ke dooge asikum rai lé nga, Nube asekum ra. 27Pierre tel ree dè tà’t nè ɓai ede nè: – An! jè nga géa j’ube nyange le jé malang j’inye, j’unn rebe gooi’t. Ké le jé à è bain tɔ wa? 28Jésu tel ede de ede nè: – Kerɔte kuwe, man m’ede sei ndàt, ndɔ ke d’a tel gɔl nyange malang kade tel tò loon’t gugu nga, man ke m’ee Ngonn doo m’a m’al ɗáng ndi dè kutu-ngar ndubra’t le’m ɓaa, sei ke unni dè nja’m têr-têr nga géa a i ndii dè kutu-ngarge’t ke dɔg-gidé-joo le gangtà dè girkà’t le kosdooge ke Israel. 29Nanan ke inye kei le’n éké ngakonnge ke dingem éké njé ke dinye, bɔ’n éké kon’n, ngann’n éké loo ndɔrge le’n tede ri’m man ɓaa, à inge nyan-kunde dè nja’n bule ngain dè made’t. Tá à inge ndikumgajer se non dè’t ɓai. 30Dooge ngain ke ei ngawtà made dege ɗarinè nga, à teli k’ei njékutu go made dege. Dooge ke ei njékutu go made dege ɗarinè à teli k’ei ngawtà made dege a tɔ.

will be added

X\