MATTHIEU 14

1Kêm ɓaln’t nè nga, ngar Hérode Antipas oo kɔbe nyan ra Jésu. Ngar Hérode Antipas è njèkonɓee ke Galilée kêl ɓeekon karé ke kété bɔ’n Hérode on. 2E ede ngann njéndige le’n ede nè: – Doo nè nga, è Jean ke njé kule dooge manné njonm á tɔse ndel in dann njé ke koo’t. Gir’n ke nè á è aw’n se tɔgmong le ra’n nyankɔbege. 3Kété Hérode ade d’uwe Jean, dé tɔ’n d’ile’n dangai’t tede tà le Hérodiade neen ngokon’n Philippe. 4Kerɔte kuwe, Jean ede Hérode nja bule ede nè: «D’inye loo d’adi kade i taa dinye nè nga ke neein lé.» 5Hérode ndige le kade d’ade kum Jean udu. Nè è ɓel kum doobulege tede an-in Jean ke njèribe-dè-tà ke tà Nube’t. 6Ndɔ karé bè, Hérode ra nan koje’n. E ɓar dooge bule ngain. Ngonn le Hérodiade ke mande ɔse nang in ndam tàkum dooge’t nè nga ade taa kum Hérode. 7Gir’n ke nè á è unn’n ndu’n se mann-ra ade ngomande nè ede nè: – Nyan malang ke ayé deje’m nga, né riri géa m’a m’adi kuwe. 8Kon’n sule’n ade aw ede Hérode ede nè: – Ile dè Jean ke njèkule dooge manné njonm kêm tasa’t nè ade’m. 9Tà ige ngar Hérode sêl ade tel ndi tikn. Nè tede mann ke è mann ra’n tàkum dooge ke è ɓar de nga, è unn ndu’n le kade d’ade dè Jean ke njèkule dooge manné njonm ngomande nè nga. 10E ule kule kei dangai’t ade dé tuge dè Jean dé gang. 11Dé ree se dè Jean kêm tasa’t d’ade ngomande nè. E taa aw’n ade kon’n. 12Pajage le Jean unni ninn’n awi dubi pa ɓita go’t gugu awi edi tà’n Jésu adi oo ɓai. 13Loo ke Jésu oo tà nè nga bè ɓaa, è al kêm bato’t ɔr ra’n se kar’n aw kêm dile loo’t se kar’n. Nè loo ke kosdoo-bulege ooi ká’n ɓaa ei in-in se kêm ɓee-bòge gai-gai awi goon’t se nja de. 14Jésu in kêm bato’t rise nang. Doobulege ngain kujei nan rann’t hakl. E an kumndoo le de a, è ɔr ratur ra njératurge’t le de a tɔ. 15Nain ngɔr kade ndɔ il, njékuwe-gir Jésuge reei rann’t edi nin edi nè: – Loo nè nga è kêm dile karè a, loo à ndul a tɔ. Inye kosdoo-bulege ade awi kêm ngann ɓeege’t ndogoi nyankuse de. 16Nè Jésu tel ede de ede nè: – Dé nga d’aw ndoo kɔte bè kaw lé. Sei kuwe adi de nyan d’use. 17Nè dé tel d’ede Jésu d’ede nè: – Mapa mi se tutu kanje joo bere á tò ji jé’t laa. 18Jésu tel ede njékuwe-girnge ede nè: – I reeii laa adi man. 19Taɓai è unn ndu’n ade kosdoo-bulege ade têti ra de ndii nang dè walè’t. E oto mapage ke mi se tutu kanjege ke joo nè nga, an loo ke danrán ra Nube oiyo. Go’t gugu è tête mapa nè nga danné ade njékuwe-girnge, taɓai in-in ke kété noboi kosdoo-bulege tɔ. 20Ei malang usei ade kêm de ndann gɔj-gɔj. Dé tann gute nyon-nyon mapa ke nain nga rusu janga dɔg-gidé-joo. 21Njé ke usei mapa nè nga asi dingemge aru dɔg loo mi anje tute dinyege se ngannge. 22Kété ɓita kade Jésu inye kosdoo-bulege ade awi ɓaa, è ɔse njékuwe-girnge ade ali kêm bato’t gangi ba awi nonn’t kété. 23Loo ke è inye kosdoo-bulege ade awi ɓá ɓaa, è al aw dè mbal’t nú le kɔje tà se Nube. Nain ngɔr ɓaa kàde à ur, nè Jésu nain se kar’n bere dè mbal’t nè. 24Loo ke Jésu nain dè mbal’t ɓai nga, bato aw dann ba’t danné bɔp ɓá ta. Kɔr mann tal tile bato mbàs-mbàs tede nel ule tile kum’n. 25Tà gir loo’t, Jésu njiye dè ba’t kum’n ke ra njékuwe-girnge’t. 26Loo ke d’an’n njiye dè ba’t bè ɓaa, d’aw dè nan’t kutri, ɓel unde de ndàt gang de ade dé ra nyan jiki d’ede nè: – E doo ke koo. 27Ke loon’t né kuwe, Jésu ede de ede ne: – I ndai kêm si káng, i ɓeli lé è man kuwe. 28Pierre tel ede Jésu ede nè: – Kuwe-ɓee, ke nè á è i kerɔte ɓaa, unn ndui ade m’in m’njiye dè mann’t m’aw rai’t. 29Jésu ede Pierre ede nè: – I ree ke laa. Pierre rise kêm bato’t, njiye dè mann’t kum’n ke ra Jésu’t. 30Nè loo ke Pierre an titeke nel ule se tɔg’n ngain ɓaa, ɓel unde’n ndàt gang’n ade unn gir ndui mann. E ule tà’n non’t ede nè: – Kuwe-ɓee, I taa’m tà yo’t aje’m. 31Ke loon’t nè kuwe, Jésu ule ji’n uwe’n Pierre, taɓai deje’n ede nè: – Ké i doo ri á kundekêm lei ii lé bè wa? Ké bain á i naje se rai bè wa? 32Loo ke Jésu se Pierre ali kêm bato’t ɓá ɓaa, nel gang ɗás. 33Loo ke njé ke ndii kêm bato’t an-in bè ɓaa, ei ɗɔyi Jésu edi nè: – Kerɔte, i i Ngonn Nube nga kuwe. 34Jésu se njékuwe-girnge gangi ba awi kêm ɓeekon ke Génésareth. 35Dooge ke kêm ɓeekon’t nè nga geri Jésu maje. Ei ulei kule se kêm ɓeege malang ke an-in dè de adi dooge otoi njératurge reei se de. 36Dé ra ndoo ra Jésu’t le kade inye loo ade d’ɔde tà kubu ke rann’t lêm. Dooge malang ke ɔdi tà kubu ke rann’t lêm nga, ra de tel tò karé ndát-ndát.

will be added

X\