MATTHIEU 10

1Jésu ɓar njékuwe-girnge ke dɔg-gidé-joo ade reei rann’t. E ade de tɔgmong le kade dumi dè ndilge ke majelé a, se le rɔ’n de a tɔ. Tɔgmong nè nga, è ade de le kade d’ɔr’n ratur ke rara géa ra njératurge’t a, se njé ke kêl ra wei tonrin a tɔ. 2Njékawkulege ke dɔg-gidé-joo nga ri de á tò nè: E ke desêin è Simon ke dé ɓar’n Pierre se ngokon’n André, Jacques ngonn Zébédée se ngokonn Jean, 3Philippe se Barthélemy, Thomas se Matthieu ke njètaa tirge, Jacques ngonn Alphée se Thadée. 4Simon ke njè kile ra’n kɔke tede ɓee le’n a, se Judas Iskariot ke ndɔ ke è njèkunn dè Jésu. 5Njé ke dɔg-gidé-joo ke Jésu ule de nga, è unn ndu’n ade de ede nè: – Unni rebe ke ra dooge ke geri Nube’t lé a, awi kêm ɓee-bòge ke Samarie nga lé a tɔ. 6Nè è soo’t kade awi kum si ke ra batege ke kêm ɓeekon ke Israel nga kété ɓita. 7Loo ke a awi ɓaa, ilei mber dɔ-dɔ edi nè: «Konɓee ke danrán nain ngɔr ta.» 8Ɔri ratur ra njératurge a, adi njé ke weii tɔsi ndeli in-in a, ɔri banje ra njébanjege’t a, i rɔi ndilge ke majelé kêm dooge’t kɔke a tɔ. Man m’ade sei tɔgmong nè nga kade i rai se dooge karè tite man m’ade sei karè nga tɔ. 9An-in! tá nè a kin-in kunni nar-ɔr, éké nar-nda, éké ninge-kase kêm mbuge’t le si. 10Loo ke a awi ɓaa, unni ɓɔkrɔ ji si’t lé a, i tulei kubu dè nan’t joo lé a, i tulei gabang’t nja si’t lé a, unni kage ke tà ɗuge ji si’t lé a tɔ. Kerɔte kuwe, njèkule à inge nyankuse’n kuwe gar-gar. 11Kêm ɓee-bò éké ngonn ɓee ke rara ke sei a awi tutu nga, i deji ké doo karé ke asekum kuwe sei ke rann’t ndi tutu wa? Ke nè á doo ke asekum kuwe sei ke rann’t ndi tutu ɓaa, è kuwe i ndii rann’t sár kade in-in awi kété. 12Loo ke awi kêm kei karé’t ɓaa, i rai lapya njékêmkeige edi nè: «Maje kade kêmlom nain se si.» 13Loo ke njéɓeege d’uwe sei ke ra de’t ɓaa, ndutɔr le si à nain dè de’t. Ke nè á d’ute sei mbeng ɓaa, ndutɔr le si à tel ke ra si’t gugu. 14Ke nè á dooge ke kêm ɓee karé éké kêm ɓee-bò karé d’uwe sei ke ra de’t lé a, d’oo tàge le si lé a tɔ ɓaa, undei loo i teei. I geki bubur ke nja si’t gák-gák kɔke. 15Kerɔte kuwe, man m’ede sei ndàt, ndɔ gangtà’t nga nyan ke ndɔ ke tee dè njé ke ɓeekon ke Sodome se Gomorhhe nga géa è soo’t dum le dooge ke kêm ɓee-bò’t nè nga ɓai. 16An-in! man m’ule sei titeke doo ule’n batege dann bise-kɔrge’t bè. Undei kumkunju dè ra si’t asenan se lige bè a, adi kêm si nda káng-káng tite der-ndage bè a tɔ. 17I ndai kêm si se dooge lé, tede à ulei sei ji njégangtàge’t a, à tundei sei se ndêin maru kêm kei kebe nange’t a tɔ. 18D’ade kali sei kaw se si non njékonɓeege’t se non ngarge ke bò tede tà le’m. Bè ɓaa, ɔri go tà le’m adi de a, adi dooge ke ei Juipge lé a tɔ. 19Nè loo ke d’a d’aw se si le kule sei ji de’t nga, adi kêm si tò kekek dè tà ke uwei dè nja le tam nga lé. Tede tà ke sei a i tami nga, d’a d’ule tà si’t kêm kàdenn’t nè kuwe. 20Tà ke à tee tà si’t kêm kàdenn’t nè nga, è sei á a in-in se dè si tami lé. Nè è tà ke Bɔ si á ade Ndil-Kêmnda ule tà si’t. 21Ngakon nange à unni dè nan le kade dé tɔl è ke karé a, bɔ ngannge à unni dè ngann dege. Ngannge à kin-in se njékoje dege a, à adi d’ade tɔl de a tɔ. 22Dooge malang à ɔri sei njêt tede ri’m man. Nè è ke nda dè njann’t njáng sár ndɔ ke ngeinn’t ɓaa, Nube à aje’n. 23Loo ke d’a d’ɔr sei kororoi kêm ɓee-bò ke nè’t ɓaa, an-in awi kêm ɓee-bò karé ke rang’t. Kerɔte kuwe, man m’ede sei ndàt, sei a kɔri son ɓee-bòge le ɓeekon ke Israel lé ɓai kuwe bainléa Ngonn doo à tel ree’n. 24Njèndó nyan dum dè njèndó’n nyan lé, éké ngonn njèndi à dum dè kuwe’n lé a tɔ. 25Maje kade njèndó nyan è tite njèndó’n nyan bè a, maje kade ngonn njèndi è tite kuwe’n bè a tɔ. Ke nè á d’ile ri-tɔi kuwe-kei d’ede nè: Ngar le ndilge ke majelé ɓaa, ké njékêmkeige le’n nga d’a t’ile ri de dum le’n è ɓai lé wa? Kuwe-kei géa á dé ɓar’n Ngar le ndilge ke majelé nè a njékêmkeige le’n tá ɓai wa? 26I ɓeli dooge nè nga ndan lé. Nyan karé ke tò loo ɓɔyɔn’t ɗarinè ke d’a nal tee se gir’n ke nata goto a, nyan karé ke tò loo ngeinn’t ɗarinè ke d’a nal kuje gir’n ke nata ndát-ndát goto a tɔ. 27Tà ke m’ede sei dann ndɔɔ nga, ilei mber’n dann kada ndái-ndái. Tà ke dé kɔte mbi si’t nga, ilei mber’n adi dooge malang se loo-loo. 28Njé ke à tɔli danra si nè asikum tɔl nganrankum ra si lé nga, i ɓeli de lé. Nè è soo’t kade i ɓeli ndil Nube ke asekum kade dé tɔl danra si se nganrankum ra si nan’t bere mbak kum de dann loo ke tur’t. 29Ké d’ige tuinge joo kum sisi karé d’ade an-in lé wa? Nè né è bè géa, è ke karé dann de’t oso nang anje kêm ndige le Bɔ si lé. 30Sei ɓaa, bin dè si géa dé tute malang. 31I ɓeli nyan karé lé, tede sei nga gate si dum dè le kos tuinge nja bule. 32Nanan ke tam ndàt non dooge’t ede nè: n’ee le’m ɓaa, man géa m’a m’tam ndàt non Bɔ’m ke danrán titeke doo nè nga è le’m man kuwe. 33Nè doo ke rara ke naje se ra’n dèm’t non dooge’t ɓaa, man géa man m’naje se ra’m dènn’t non Bɔ’m ke danrán a tɔ. 34Ké sei giri kêm si’t edi nè: man m’ ree le kade dooge ke dè nang nè ndii se kêmlom wa? Ḿ-m̀ è bè lé. Nè man m’ree se kuye kaskar le kile’n tà tin nan dann dooge’t dè nang nè. 35Oiyo, man m’ree le kade ngonn ke dingem tin se bɔ’n a, le kade ngonn ke dinye tin se kon’n a, le kade kon dingem se wum’n ke dinye tin-in nan a tɔ. 36Njékêmkeige le doo karé à teli k’ei njébange le’n. 37Nanan ke ndige bɔ’n éké kon’n tá dum’m man ɓaa, è asekum k’ee le’m man lé. Nanan ke ndige ngonn’n ke dingem éké ke dinye tá dum’m man ɓaa, asekum k’ee le’m man lé. 38Nanan ke uwe dè nja ra’n le kwei titeke man m’ra’n bè lé ɓaa, asekum k’ee le’m man lé karè. 39Nanan ke sang le kaje ra’n ɓaa, ndɔn’t à ile ra’n kɔke salang. Nanan ke ile ra’n kɔke salang tede’m man ɓaa, à tel kinge ra’n ɓai. 40Doo ke rara ke uwe sei ke rann’t ɓaa, è man kuwe á uwe’m ke rann’t. Doo ke rara ke uwe’m ke rann’t ɓaa, è njèkule’m kuwe á uwe’n ke rann’t. 41Doo ke uwe njèribe-dè-tà ke tà Nube’t ke rann’t tede k’ee ke è njèribe-dè-tà ke tà Nube’t ɓaa, a inge nyan-kunde nja ke d’a d’ade njèribe-dè-tà ke tà Nube’t nga tɔ. Doo ke uwe njè ra nyan se dè naje’n ke rann’t tede k’ee ke è njè ra nyan se dè naje’n ɓaa, à inge nyan-kunde nja ke d’a d’ade njè ra nyan ke se dè naje’n nga a tɔ. 42Man m’ede sei ndàt, nanan ke ɔde mann ke sɔl kêm kalmann karé luk-luk ade ngonn karé dann madennge’t ke ei njékuwe-girmge’t tede k’ee ke è njèkuwe-gir’m ɓaa, à nal nyan-kunde nja’n ndan lé.

will be added

X\