MARC 9

1Jésu ede doobulege se njékuwe-girnge ede nè: – An-in! man m’ede sei ndàt, dooge ke nange dann si sei ke i ndii nè’t a an-in Konɓee le Nube ke ndɔ ke rang à ree se tɔgmong nga pa ɓita à weii ɓai. 2Loo ke Jésu ede njékuwe-girnge tà yoo’n se kunde loo tee le’n dann njé ke koo’t, ra ndɔ mute-mute ɓaa, è ɔr Pierre, Jacques se Jean njɔl ade awi se’n dɔ dè mbal karé’t bè. Ra’n tel waks tàkum de’t. 3Kubuge le’n ke rann’t unni gir ndoléi kein-kein a, ndai káng-káng a tɔ. Doo karé ke dè nang nè ase togo kubu kade nda tite kubuge le Jésu ke rann’t nè goto. 4Njékuwegir-Jésuge ke mute nè nga an-in njèyo Moise se njèyo Elie undei loo teei hɔi ke ra de’t, ndai ɔji tà se Jésu. 5Pierre unn tà tam ede Jésu ede nè: – Ngar, è soo’t kade jè ndii nè: J’à ra kei kanm mute, karé à è lei, karé à è le Moise, karé à è le Elie a tɔ. 6Pierre ger gir tà ke è tam nè nga lé, tede ɓel ra Pierre se madennge ke joo nè nga ngain. 7Bum ree utu dè de lêt, Nube tam tà dann bum’t nè ede nè: – E nè nga è Ngonn’m ke m’tár’n ngain, ooi tà tànn’t. 8Ke loon’t nè kuwe, njékuwe-gir-Jésuge ke mute gon-in loo yó, ke nè. Moise se Elie gotoi njêl karè. Nè Jésu kuwe se kar’n luk-luk á nain se de. 9Jésu se njékuwe-girnge ke mute nè in-in dè mbal’t dɔ à risi ke nang ɓaa, è ndeje de ndej-ndej ede nè: – Nyan ke sei an-in nga, ɔri ser’n adi doo karé ke rang bè oo lé sár kade man ke m’ee Ngonn doo m’unde’n loo m’tee’n dann njé ke koo’t ɓita. 10Njékuwe-gir-Jésuge ilei koje dè tà ke è ede de’t nga. Nè né è bè géa, ei deji nan tà dann de’t edi nè: – Kunde loo tee dann njé ke koo’t leyé ke n’tam tà’n nga, ké gir’n è ri wa? 11Njékuwe-gir-Jésuge deji nin edi nè: – Ké bain á njékɔrgir gute-nduge tami dɔ-dɔ edi nè: Gar-gar Elie à tel ree pa ɓita nyange ke rang à teei ɓai wa? 12Jésu ede de ede nè: – Elie à tel ree le gɔl nyange malang kade teli tooi loon’t titeke kété pa ɓita. A ɓaa, ké bain á dé ndang tà kêm Magtubge’t d’ɔje’n dè’m man Ngonn doo d’ede nè: Gar-gar nyankêmkonge ngain à ra’m a, d’a d’an’m ke nyan lé a tɔ wa? 13Nè né è bè géa, man m’ede sei titeke Elie nga tel ree ɓá, nè dooge ke nange rai se’n nyan titeke kêm de ndige se go tà ke dé ndang kêm magtub’t d’ɔje’n dè’n kété mari. 14Jésu se njékuwe-girnge ke mute teli à reei ke ra njékuwe-girnge ke rang. Ei an-in doobulege gugi dè njékuwe-girnge ke rang nè nga wàk. Njékɔrgir gute-nduge ndii à naji se de tà ke kété-kété. 15Loo ke kosdoo-bulege an-in Jésu pan ɓaa, ke loon’t nè kuwe, ei ndebi ɗêk-ɗêk, an-in ngɔde le rai nin lapya. 16Jésu deje njékuwe-girnge ede nè: – Ké tà ri á i ndii i naji nan se njékɔrgir gute-nduge wa? 17Dingem karé dann kosdoo-bulege’t in ile jésu dè’t ede nè: – Ngar, m’ree se ngonn’m ke dingem ke ndil ke majelé ɔge’n tam tà rai’t. 18Loo ke rara géa, ndil ke majelé uwe’n ile’n nanga barak. Loo ke uwe’n ile’n nang barak ɓaa, pululu tée tànn’t pɔt-pɔt a, use gɔge’n matchatch-matchatch a, sure mbangang-mbangang a tɔ. M’deje njékuwe-girige le kade rɔi ndil ke majelé nè nga kɔke kêmn’t, nè tɔg de ase lé. 19Jésu deje njékuwe-girnge ɓai ede nè: – Sei dooge ke i ndii dè nang nè ɗarinè nga, ké sei doo rige á kundekêm le si goto bè wa? Ké m’a ndi se si dè nang nè ndɔ kandang ɓita kundekêm le si à tò ɓai wa? Ké m’a kile kêm’m dè si’t nja kandang wa? I reei se ngonn nè nga ram’t laa. 20Dé ree se ngonn nè nga ra Jésu’t. Loo ke ndil majelé an Jésu pan ɓaa, ke loon’t nè kuwe è unn ngonn nè nga yei’n yák yák ile’n nang barak. Ngonn nè ndubri nang gurur-gurur a, pululu tée tànn’t pɔt-pɔt a tɔ. 21Jésu deje bɔ ngonn ke dingem nè nga ede nè: – Ké nyan nè nga ra ngonni ase ndɔ kandang ɗarinè ta wa? E tel ile jésu dè’t ede nè: – Nyan nè nga ra’n se ngonn’n mari. 22Dɔ-dɔ ndil ke majelé sure ngonn nè nga ile’n poro éké manné le kade an-in mann wei. Nè ke nè á ase ra nyan karé tede tà le’n ɓaa, kɔkrɔ karè i din-in jè. 23Jésu tel deje bɔ ngonn nè nga ede nè: – Ké bain á i tam ede nè: Ke nè á ase ra nyan karè wa? Doo ke unde kêm’n dè Nube’t ɓaa, Nube asekum ra nyan malang tede’n kuwe. 24Ke loon’t nè kuwe, bɔ ngonn nè nga tam se ndu’n ke bòi beng ede nè: – Kuwe-ɓee, m’unde kêm dè Nube’t kuwe! I din-in’m tede kundekêm le’m ase lé. 25Jésu an kosdoo-bulege têti nan yip à reei ke ra de’t. E unn gir ndáng ndil ke majelé nè nga ede nè: – I ndil ke majelé ke njé kɔge ngonn nè tam tà se koo tà nga, man m’unn ndu’m m’adi, unde loo i tee kêmn’t aw se noin. 26Ndil ke majelé ra ngonn nè ade non kaláng-kaláng a, sure mbangang-mbangang a, ɓita unde loo tee aw ɓai. Ngonn nè tel tò nang ratch. Dooge bule dann njé ke ndai loon’t edi nè: – Ngonn basa nga wei ɓá ta. 27Nè Jésu uwe ji’n ade ɔse nang in nda dɔ. 28Jésu tel aw ɓéee. Loo ke njékuwe-girnge ndii se’n se kar de bere ɓaa, ei deji nin edi nè: – Ké gir’n è ri á jè j’aw se tɔgmong le rɔ’n ndil ke majelé nè nga kɔke lé wa? 29Jésu ede de ede nè: – Ndil ke majelé ke tite è ke nè bè nga, asekum kunde loo tee takul kɔje tà se Nube kuwe karé bere luk-luk. 30Jésu se njékuwe-girnge in-in loo’t nè awi undei kêm ɓeekon ke Galilée gangi se nja de dɔ. Jésu ndige le kade doo karé bè géa ger tede’n lé. 31Tede è ndi à ndó nyan njékuwe-girnge ede nè: – Man ke m’ee Ngonn doo nga, d’a d’uwe’m kule’m ji tɔgmong’t le dooge a, d’ade tɔl’m a tɔ. Ndɔ ke njèkon’t mute go kwei’t le’m ɓaa, m’a m’unde loo tee dann njé ke koo’t. 32Njékuwe-gir-Jésuge geri tàge nè nga njai lé ɓai, nè ei ɓeli le deji nin gir. 33Jésu se njékuwe-girnge awi teei kêm ɓee-bò ke ri’n nè Capernaum. Loo ke ei awi teei kêm kei ɓéee ɓaa, Jésu deje de ede nè: – Ké ri á i naji nan tà dè’t kété loo ke jè njiyei rebe ɓai nga wa? 34Nè doo karé bè dann de’t ile’n dè’t lé, tede kété dé naje nan tà rebe d’ede nè: Ké nan à è doo ke bò dum dè madennge wa? 35Jésu tête ra’n ndi nang. E deje njékuwe-girnge ke dɔg-gidé-joo le kade reei rann’t an-in dè’n ulei nan’t. Jésu ede de ede nè: – Ke nè á doo karé ndige le k’ee ngawtà madennge ɓaa, gar-gar maje kade tel ra’n ke njè kutu go madennge malang a, ke njèkule le de malang a tɔ. 36Jésu uwe ji ngonn karé bè, ɔr non’n aw se’n danné bɔp non njékuwe-girnge’t ke an-in dè’n ulei nan’t wàk nga. Go’t gugu è unn’n unde’n non kejenn’t ɓaa, è ede de ede nè: 37– Nanan ke uwe ngonn ke nain dap tite njè ke nè ke rann’t tede tà le’m ɓaa, è man kuwe á uwe’m ke rann’t non. Nanan ke uwe’m ke rann’t ɓaa, è man á uwe’m ke rann’t lé, nè è Nube ke njèkule’m kuwe á uwe’n ke rann’t non. 38Jean ede Jésu ede nè: – Kuwe jé, kété j’an doo karé unn rii rɔ’n ndilge ke majelé kêm dooge’t kɔke, nè jè j’ɔge’n dè’t tede è le jéi lé. 39Nè Jésu ede’n ede nè: – Ɔgi n’ee dè’t lé, tede doo karé ke unn ri’m ra’n nyankɔbe nga, asekum tam tà le’m majelé mbɔr go’t gugu lé. 40Kerɔte kuwe, doo ke ute jéi mbeng lé ɓaa, è le jéi kuwe. 41Nanan ke ade sei mann kain kêm kalmann karé tede k’ee ke sei le’m man Krist nga ɓaa, man m’ede sei ndàt, doo nè nga à inge nyan-kunde nja’n kuwe mbain. 42Doo karé ke ra ngonn ke nain dap ke unde kêm’n dèm’t tite njé ke nè bè ade oso dann majelé’t nga, è soo’t le tɔ kule tu kuberi mbal ke bòi kɔbenn’t, kile’n dunge ba’t. 43Ke nè á jii karé è nyan ke à tugei jig’t kade oso dann kaiya’t ɓaa, uje’n i gang’n kɔke kade aw danrán loo ndikumgajer se non se meti nga, maje dum kade d’ilei se jii joo mbak loo ke tur’t, dann por’t ke wei ndan lé’t. [ 44E loo ke kodége ke tooi tutu weii ndan lé a, por ke tutu wei ndan lé a tɔ.] 45A ke nè á njai karé è nyan ke à ɔti dann majelé’t ɓaa, uje’n i gang’n kɔke. E soo’t kade aw danrán loo ndikumgajer se non se meti maje dum kade d’ilei se njai joo mbak loo ke tur’t. [ 46E loo ke kodége ke tooi tutu weii ndan lé a, por ke tutu géa wei ndan lé a tɔ.] 47Ke nè á kumi è nyan ke à tugei jig’t kade oso dann majelé’t ɓaa, uwe’n ɓarak ɔr’n kɔke. Kawi se kumi ke karé kêm Konɓee’t le Nube nga, maje dum kade d’ilei se kumi joo mbak loo ke tur’t. 48E loo ke kodége ke tooi tutu weii ndan lé a, por ke tutu wei ndan lé a tɔ. 49Nanan géa d’a d’ule’n por ke tur’t titeke d’ile’n kate ke don janm tu nyankuse’t bè. 50Kate nga è nyan ke maje. Nè ke nè á kate tel bɔlɔs ɓaa, ké ri á a i rai kade tel don gugu wa? Sei kuwe i teli i tooi tite kate ke don bè. Umi kêm si nan’t bɔk.

will be added

X\