MARC 8

1Kêm ndɔn’t nè nga, kosdoo-bulege teli kebi nan ra Jésu’t. Nyan ke bè le kade usei goto. Jésu ɓar njékuwe-girnge rann’t ede de ede nè: 2– M’an kumndoo le kosdooge nè nga. An-in! dé ndi se’m ase ndɔ mute ɓila. Nè ɗarinè nyan ke bè le kade d’use goto. 3Ke nè á m’inye de bè m’ade dé tel d’aw ɓéee kêm de ɓo ɓaa, kumkil à ra de rebe, tede njé ke nange dann de’t in-in heb ngain. 4Njékuwe-gir-Jésuge edi nin edi nè: – Loo ke nè nga, è kêm dile karè. Ké j’à j’ingei mapa ra le kade dooge nè nga usei ade kêm de ndann wa? 5Jésu deje njékuwe-girnge ede nè: – Ké mapa ke ji si’t nga è kandang wa? Njékuwe-girnge teli ilei nin dè’t edi nè: – Mapa ke tò ji jé’t nga è ji sejimute bere. 6Jésu unn ndu’n ade doobulege ede nè: – I ndii nang se mate si-mate si. Go’t gugu è unn mapa ke ji sejimute nè nga jinn’t, è an loo ke danrán, ra Nube oiyo ɓita uwe tête danné ade njékuwe-girnge kade kayai mate doobulege nè nga.Njékuwe-girnge kayai mapa nè nga kosdoo-bulege se mate de-mate de. 7Ngann kanjege ke kɔbe tò ji de’t tɔ. Jésu ra Nube oiyo dè’t ɓita ede njékuwe-girnge le kade unni awi undei non kosdoo-bulege nè nga tɔ. 8Kosdooge usei mapa ndanni gɔj-gɔj. Njékuwe-gir-Jésuge kotoi gute ke nain nanga rusu ngann janga ji sejimute. 9Dooge ke usei mapa nga ei dingemge aru dɔg loo sɔ. Jésu unn ndu’n ade doobulege teli awi ɓéee le de. 10Ke loon’t nè kuwe, Jésu se njékuwe-girnge ali kêm bato’t awi kum de ke ɓeekon ke Dalmanutha. 11Pharisienge reei ra Jésu’t, ei unni gir naji se’n tà. Ei deji nin le kade ra nyankɔbe tɔje’n de titeke tɔgmong le’n nga in danran ra Nube’t kuwe. Dé ra titeke bè le nan’n kêm’n. 12Jésu ile kêm’n puun ede nè: – Ké bain á sei dooge ke i ndii dè nang ɗarinè i deji nyankɔbe ke gai ke in danrán ra Nube’t wa? Kerɔte kuwe, man m’ede sei ndàt, nyankɔbe ke i deji nga, d’a ra kade an-in ndan lé. 13Jésu se njékuwe-girnge inyei Pharisienge ali kêm bato’t awi gide ba’t gugu. 14Kêm njékuwe-gir-Jésuge wei nal dè kɔi mapa bule ji de’t. Nè nyan ra maje ade mapa karé bere luk-luk nain kêm bato’t. 15Jésu ndeje njékuwe-girnge ndej-ndej ede nè: – Undei kumkunju dè ra si’t le gang kɔte pululu’t le Pharisienge éké le Hérode Antipas nga lé. 16Njékuwe-gir-Jésuge murin tà dann de’t edi nè: – Ké n’tam tà nè nga bè tede mapa ke goto ji jéi’t nga wa? 17Jésu ger tà ke kêm de’t nga mbak. E deje de ede nè: – Ké bain á sei murin tà edi nè: «E tede mapa ke goto ji si’t wa?» Ké è tede kunn mbi dè tà’t le si nga wa? 18Kum si tò tutu kuwe, nè sei an-in loo lé. Ka mbi si tò tutu kuwe, nè sei ooi tà lé. Ké kêm si wei nal dè mapa ke ndɔ ke m’ade i kayai dooge nè ta wa? 19Mapa ke mi ke ndɔ ke m’tête danné m’ade i kayai kosdoo-bulege aru mi loo dɔg nga, ké ndɔ ke i kotoi gute ke nain rusu ngann janga kandang wa? Njékuwe-gir-Jésuge ilei nin dè’t edi nè: – Ndɔ ke j’oto gute ke nain rusu ngann janga dɔg-gidé-joo. 20– Mapa ke ji sejimute ke ndɔ ke m’tête danné m’ade i kayai kosdoo-bulege aru sɔ loo dɔg nga, ké i kotoi gute ke nain rusu ngann janga kandang wa? Dé tel d’ile’n dè’t d’ede nè: – Ndɔ ke j’oto gute ke nain rusu ngann janga ji sejimute. 21Jésu tel deje njékuwe-girnge ede nè: – A ɓaa, ké kêm si tɔ kuju tà ade i geri tà nè njai lé ɓai wa? 22Jésu se njékuwe-girnge reei kêm ɓee ke ri’n nè Bethsaida. Dooge ɔri non dingem karé ke njèkumtɔ reei se’n ra Jésu’t. Dé ndête Jésu le kade ule ji’n ɔde’n ra dingem nè nga lêm. 23Jésu uwe ji njèkumtɔ nè nga ɔr’n njɔl aw se’n gide ɓee’t nata. Go’t gugu è ra mann tà’n jinn’t ɔde’n kum njèkumtɔ nè nga ɓaa, è deje’n ede nè: – Ké an loo lit-lit ndêin wa? 24Doo nè nga teen kum’n ɓaa ede nè: – M’an dooge njiyei gangi lit-lit tàkum’t tite kagege bè. 25Go’t gugu Jésu tel ɔde kum dingem nè nga se ji’n. Dingem ke njèkumtɔ ɔr kum’n an loo gerer ɓaa, kum’n tel tò karè ade an’n loo njai-njai. 26Jésu ede njèkumtɔ nè nga ede nè: – Aw kumi ke kété m i tel aw kêm ɓee’t gugu lé ta. 27Jésu se njékuwe-girnge awi ke kêm ngann ɓeege le ɓeekon ke Césarée le Philippe. Loo ke dé nain rebe ɓai ɓaa, Jésu deje njékuwe-girnge ede nè: – Man nga, ké dooge tami edi nè m’ee nan wa? 28Dé d’ede’n d’ede nè: – Doo ke nange tami edi nè: I Jean ke ndɔ ke è njèkule dooge manné njonm; njé ke nange edi nè: I Elie; njé ke nange ke rang edi nè: I njéribe-dè-tà ke tà Nube’t karé dann njéribe-dè-tàge’t le’n ke mari. 29Jésu deje njékuwe-girnge ede nè: – A ɓaa sei, ké i tami edi nè m’ee nan wa? Pierre tel ile jésu dè’t ede nè: – I i Messie. 30Jésu ɔge de le kade dé ribe dè’n d’ade doo karé bè géa oo lé. 31Unn gir kêm ndɔn’t nè nga, Jésu ede njékuwe-girnge ede nè: – Man ke m’ee Ngonn doo nga, nyankêmkonge ngain à rai man. Ngatɔgege le Israel se njékɔrgir gute-nduge se maw njékuje nyan-mesege à utei man mbeng a, à tɔli man a tɔ. Ndɔ ke njèkon’t mute ɓaa, m’a m’unde loo tee dann njé ke koo’t. 32Jésu ede de tà nè nga ndàt. Nè Pierre ɔr’n njɔl aw se’n ede’n ede nè: – I tam tà titeke bè lé. 33Nè Jésu tel tur kum’n ke ra njékuwe-girnge’t ke rang. E ndáng Pierre ede nè: – Sú, ɔte tàm’t ke rang tede nyan ke Nube ndige uwe kêmi lé, nè nyan ke dooge ndigi tá uwe kêmi. 34Taɓai è ɓar doobulege se njékuwe-girnge ke rann’t ede de ede nè: – Ke nè á doo karé ndige le k’ee njèkuwe-gir’m ɓaa, maje kade inye go tàgir ke ɔje dè ra’n kɔke a, maje kade unn kage-ke-dese le’n ndolè’n goo’m a tɔ. 35Nanan ke ndige ngonm ra’n sár-sár ɓaa à wei, nè nanan ke ile ra’n kɔke salang tede tà le’m a, tede Tà ke Maje a tɔ ɓaa, à ndi kumgajer kerɔte. 36Ke nè á doo karé inge nyan-majege malang ke dè nang nè, nè kure nyan ra’n ɔde kum ngarankum ra’n ɓaa, ké ri á à è soon’t wa? 37Ké ri á doo ayé kade le taa’n ngarankum ra’n wa? 38Man Ngonn doo nga m’a m’tel ree dann ndubra’t le Bɔ’m se njékêmndage ke danrán. Nanan ke ra’n sɔl’n dèm’t se dè tà’t le’m non njé ra majelége ke njé mbate Nubege ke ndii dè nang nè ɓaa, man Ngonn doo nga géa ra’m à sɔl’m dènn’t tɔ.

will be added

X\