MARC 6

1Jésu in loon’t nè tel aw kêm ɓee ke Nazareth ke ndɔ ke tɔge tutu. Njékuwe-girnge danni nin awi se’n. 2E unn gir ndó dooge nyan kêm kei kebe nan’t se ndɔ taa kebe. Doobulege ke ndii tutu ooi tà lé’n nga, tà ige de sêl ade tami edi nè: – Ké n’inge tàgirge ke titeke bè nga ra wa? Ké gos nyanger nè nga n’in’n ra wa? Ké nan adé tɔgmong á n’ra’n nyankɔbege ke doo an kété ndan lé nè nga wa? 3Ké n’ee nga n’ee njè tɔl kagege ke n’ee ngonn le Marie nga lé wa? Ké Jacques se Joses se Jude se Simon nga ei ngakonyége lé wa? Ké kon nannége ei dann jéi’t laa lé wa? Kêm dooge ke Nazareth on de ngain dè Jésu’t ade undei kêm de dènn’t lé. 4Nè Jésu ede de ede nè: – Njèribe-dè-tà ke tà Nube’t nga d’ile riɓar dènn’t se looge ke rang malang. Nè njé ke ɓee kojenn’t se njé ke girkà’t le’n, se njénojege le’n kuwe karé á ilei riɓar dènn’t lé. 5Jésu asekum ra nyankɔbe karé bè kêm ɓee ke Nazareth’t nga lé. Nè né è bè géa, è ɔr ratur ra dooge ke nange. 6Tà ige Jésu sêl dè kunn mbi dè tà’t le doobulege. Jésu ɔte aw se ngann ɓeege ke gan-in dè Nazareth gêrêr ndó dooge nyan. 7E ɓar njékuwe-girnge ke dɔg-gidé-joo rann’t. E unn gir kule de joo-joo loo kile mber Tà ke Maje’t. E ade de tɔgmong le rɔ’n ndilge ke majelé. 8Jésu unn ndu’n ade njékuwe-girnge ede nè: – Loo ke a awi ɓaa unni sade, éké mbu kɔ nyan, éké nar ji si’t lé nè unni kage tɔse kuwe karé bere ji si’t. 9I tulei gabang’t nja si’t, nè i tulei kubu dè nan’t joo lé. 10E tel ede de ede nè: – Kêm kei ke rara ke awi tutu nga, è kuwe i ndii tutu sár kade in-in awi kété. 11Kêm ɓee-bò ke rara ke awi tutu nga, ke nè á dooge ke kêm ɓee’t nè uwei sei ke ra de’t lé a, ooi tà le si lé a tɔ ɓaa, loo ke a undei loo le teei nata kêm ɓee’t nè nga ɓaa, i gegi bubur ke nja si’t gák-gák umi dè de’t undei naje le si. 12Njékuwe-gir-Jésuge ke dɔg-gidé-joo ɔti awi ilei mber edi nè: – I turi hal si le kade i ndii kumgajer se non. 13Njékuwegir-Jésuge rɔi ndilge ke majelé bule ngain kêm dooge’t a, ndumi wubu dè njératurge’t bule ɔri raturge dè de’t a tɔ. 14Ngar Hérode Antipas oo titeke kɔbe Jésu oso se loo mbit-mbit ade dooge ke nange tami edi nè: – E Jean ke ndɔ ke è njèkule dooge manné njonm nè á unde loo tee dann njé ke koo’t. Gir’n ke nè á aw’n se tɔgmong le ra’n nyankɔbege gai-gai. 15Dooge ke nange tami edi nè: – E Elie. Njé ke nange ke rang tami edi nè: – E njèribe-dè-tà ke tà Nube’t ke tite made’n karé dann njéribe-dè-tàge ke kété mari á unde loo tee dann njé ke koo’t. 16Nè loo ke ngar Hérode Antipas oo sertàge nè nga bè ɓaa, è tam kêmn’t ede nè: – E Jean ke njèkule dooge manné njonm ke ndɔ ke m’ade dé tuge kobe’n dé gang nè nga kuwe á unde loo tee dann njé ke koo’t non. 17Hérode Antipas kuwe ndɔ ke unn ndu’n ade d’uwe Jean dé tɔ’n d’ile’n dangai’t . E ra bè tede le taa’n kum neen’n Hérodiade. Hérodiade nga kété taa Hérode Philippe ngokon Hérode Antipas. 18Jean nga ndɔ ke ede Hérode Antipas ede nè: «Taa neen ngokoin nga è nyan ke kum ra lé sár.» 19Wong ra Hérodiade ngain dè Jean’t ade ndige tɔl’n. Nè è se dè ra’n asekum sule Hérode kade tɔl Jean lé. 20Hérode Antipas ile koje dè Jean’t ngain. E ger’n ke doo ke njè ra nyan se dè naje’n a, se doo ke tò se ninn’n a tɔ. E an dè Jean sêw-sêw, nè loo ke è oo tà le’n ɓaa, tàgir le’n aw yo-yo, nè-nè. Nè né è bè géa, Hérode Antipas ur mbi’n oo’n tà le Jean se ranel. 21Ndɔ karé bè, Hérode ra nan ke ɔje dè ɓal koje’n. E ndɔ ke kanm ke Hérodiade ndi ngine tchên. Hérode Antipas ade dé ra nyankusege ranm-ranm ɓar’n balkum njékonɓeege le’n se njé kan dè njérɔge a se dooge ke ngàk-ngàk ke kêm ɓeekon ke Galilée a tɔ. 22Ngonn le Hérodiade ke mande aw go de’t kêm kei loo ra nan’t nè nga. E ndam ade nel ngar Hérode se njé ke è ɓar de loo nyankuse’t nè nga. Ngar Hérode ede ngomande nè nga ede nè: – Nyan riri géa i deje’m ɓaa, m’a m’adi kuwe. 23Hérode in ile tà kɔke salang ede nè: – M’unn ndu’m se ri Nube, nyan riri ke i deje’m nga, né è debe ɓeekon le’m géa, m’a m’adi kuwe. 24Ngomande nè nga unde loo tee aw deje kon’n ede nè: – Ké ri á i ndige kade m’deje wa? Kon’n ede’n ede nè: – I deje dè Jean ke njèkule dooge manné njonm nga. 25Ke loon’t nè kuwe, ngomande nè nga ɔse wan tel dè njann’t aw ra ngar Hérode’t ede’n ede nè: – Ade’m dè Jean ke njèkule dooge manné njonm kêm nyan’t ɗari-ɗarinè. 26Ngar tel ndinge ra’n. Nè è asekum kɔge nyan ke ngomande deje’n nè nga lé, tede tà ke kété in ile kɔke salang tàkum dooge ke è ɓar de loo nyankuse’t nga. 27Ke loon’t nè kuwe, ngar Hérode Antipas unn ndu’n ade njèrɔ karé ke njè ngonm dangaige ede nè: – Aw i ree se dè Jean ke njèkule dooge manné njonm ade’m. Njérɔ nè nga ɔte aw kêm kei dangai’t, tuge dè Jean se kuye kaskar gang. 28Loo ke è tuge dè Jean gang ɓá ɓaa, è ile kêm nyan ke laa’t ree’n ade ngomande. Ngomande nè nga in-in’n ke kété aw’n ade kon’n. 29Loo ke pajage le Jean ooi tà’n ɓaa, awi unni ninn’n dubi. 30Njékawkulege teli reei ɔsi nja nan ra Jésu’t ɔri ser kulege malang ke kété rai a, se nyange malang ke kété ndói dooge a tɔ adi oo. 31Jésu unn ndu’n ade de ede nè: – Sei kuwe i reei ade j’awi ngang loo’t nata jè taai kebe ndêin ɓita. Tede doobulege awi a, teli a, ade d’inge loo kuse nyan bè géa lé. 32Jésu se njékuwe-girnge ali kêm ngonn bato’t, awi ngang loo’t nata. 33Dooge ngain an-in de loo kaw’t a, geri loo ke d’a d’aw ke tutu a tɔ. Dooge in-in se kêm ɓee-ɓee malang awi se nja de teei loo ke Jésu se njékuwe-girnge à awi ke tutu nga kété. 34Loo ke Jésu rise nang kêm ngonn bato’t ɓaa, an kosdoo-bulege. E an kumndoo le de tede tooi asinan se batege ke njèkul de goto bè. E an kumndoo le de ade unn gir ndó de tàge ngain bè. 35Nain ngɔr kade kàde ur. Njékuwe-gir-Jésuge reei rann’t edi nin edi nè: – Loo ke nè nga è ngang loo ke nata karè a, kàde géa à ur ngɔr a tɔ. 36Unn ndui ade doobulege teli awi kêm ɓeege’t se ngann ɓeege ke dè nan’t gêrêr nè, ndogoi nyan usei. 37Jésu ede de ede nè: – Sei kuwe adi de nyan d’use. Nè njékuwe-girnge deji nin se gos edi nè: – Ké i ndige kade j’aw jè ndogo nyankuse kum nar kule ke ndɔ aru joo ɓaa, j’ade de d’use wa? 38Jésu tel deje de se gos ede nè: – Ké mapa ke ji si’t nga è kandang wa? Awi an-in ɓita. Loo ke d’aw dé deje ɓaa, d’ede’n d’ede nè: – Mapa è mi a, tutu kanje è joo a tɔ. 39Jésu unn ndu’n ade njékuwe-girnge ede nè: – Adi dooge malang ndii nang. Adi mate de ke karé ndii dè walè ke tebe’t nè a, adi mate de karé ke rang ndii dè walè ke tebe’t nú a tɔ. 40Dooge ndi nang rip-rip se mate de, mate de. Njé ke nange ndii dè nan’t aru, njé ke nange ndii dè nan’t asi kɔr-mi a tɔ. 41Jésu unn mapa ke mi se tutu kanjege ke joo nè nga jinn’t. E an loo ke danrán, ra Nube oiyo ɓita tête danné ade njékuwe-girnge le kade kayai awi undei non mate dooge malang. Go’t gugu, Jésu kai kanje ke joo nè nga kosdooge malang. 42Nanan géa use mapa ndann gɔj-gɔj. 43Gute mapa se kanje ke nain nga njékuwegir-Jésuge otoi rusu ngann janga dɔg-gidé-joo. 44Dann dooge ke usei mapa nga, dingemge ei aru dɔg loo mi. 45Loo ke Jésu nda ede doobulege kade teli awi ɓéee ɓaa, ke loon’t nè kuwe è unn ndu’n ade njékuwe-girnge ede nè: – Ali kêm bato’t awi gide ba’t kété nonm’t kum si ke ɓee ke Bethsaida. 46Loo ke è inye de ade d’aw ɓá ɓaa, è ɔte aw kum’n ke dè mbal’t tede kɔje tà se Nube. 47Ndɔ il ɓá, njékuwe-gir-Jésuge ali kêm bato’t awi danné bɔp. Jésu kuwe se kar’n bere á nain nang. 48E an titeke tur se njékuwe-girnge ngain loo kɔse bato kade aw ke kété tede nel tile kum de ɔse de ke gugu-gugu. Ase tite tà gir loo’t á Jésu njiye dè ba’t ɔje ke ra njékuwe-girnge’t. E ra titeke ayé tuge tà de gang bè. 49Loo ke njékuwe-gir-Jésuge an-in nin njiye dè ba’t titeke bè ɓaa, ei giri kêm de’t edi nè è doo ke koo. E á ei noin kaláng-kaláng. 50Tede loo ke d’an’n ɓaa, ndil de tee an-in soin-soin. Ke loon’t nè kuwe, Jésu tam se de ede nè: – Ebi’t ɓel, è man Jésu kuwe. 51Go’t gugu, Jésu al aw ndi kɔte de’t kêm bato’t ɓaa, ke loon’t nè kuwe, nel gang ɗás. Njékuwe-girnge malang teli ndii giw. 52Dé ger gir nyan ke ɔje dè mapa ke Jésu ade in dè made’t ke kété-kété nga lé. Nè d’uwe kêm de mong dè kunn mbi dè tà’t le de nga ke kété-kété. 53Loo ke Jésu se njékuwe-girnge gangi ba ɓaa, ei reei teei kêm ɓeekon ke Génésareth, undei bato le de tà ba’t. 54Loo ke ei undei loo kêm bato’t teei nata ɓaa, ke loon’t nè kuwe, dooge an-in Jésu geri nin ɓá ta. 55Dooge awi se loo-loo kêm ɓeekon’t nè bere mbak. Taɓai unni gir koto njératurge se nyan tò de reei se de ra Jésu’t tede d’ede de loo ke è ndi tutu. 56Se looge malang ke Jésu aw tutu, kêm ngann ɓeege se ɓee-bòge éké loo ndɔrge géa, dooge otoi njératurge umi de nang rip-rip ndá-loo’t. Dé ndête Jésu le kade inye njératurge ade ɔdi tà kubu ke rann’t lêm. Gir’n ke nè á, njératurge malang ke ɔdi tà kubu ke rann’t ɓaa, ratur le de in dè de’t kengeng.

will be added

X\