MARC 3

1Ndɔ karé ke rang, Jésu tel aw kêm kei kebe nan’t. Dingem karé ke ji’n wei tonrin ndi kêm kei kebe nan’t nè nga tɔ. 2E ndɔ taa kebe. Dooge kêm kei kebe nan’t undei kum de lêr -lêr le kan ké Jésu ayé kaje dingem nè nga se ndɔ taa kebe wa? Dé ra titeke bè le kile’n tà dènn’t. 3Jésu ede doo ke ji’n wei tonrin nga ede nè: – Ɔse nang in dɔ ade d’an-in malang. 4Jésu deje de ede nè: – Ké ndɔ taa kebe nga, tò tede le ra’n maje se dooge éké le ra’n se de majelé wa? Ké ndɔ taa kebe tò tede le kaje’n doo éké le kinye’n doo kade tuju wa? Nè d’ile’n dè’t lé. 5Jésu an de ɗêrêr-ɗêrêr ɓaa, wur’n ndir’n njàk-njàk tede kêm majelé le de. Go’t gugu è ede dingem ke ji’n wei tonrin nè nga ede nè: – I ndaje jii. Dingem nè nga ndaje ji’n ɓaa, tel tò karé titeke kété. 6Ke loon’t nè kuwe, Pharisienge undei loo teei kêm kei kebe nan’t teei awi ɔri nan tà se pajage le ngar Hérode Antipas dè rebe ke ayé tɔli Jésu. 7Jésu ɔr ra’n se njékuwe-girnge awi tà ba-bò ke ɓeekon ke Galilée. Kosdoo-bulege ndolèi goo’n. Kosdoo-bulege nè nga njé ke nange in-in kêm ɓeekon ke Galilée se Judée. 8Kêm ɓee-bò ke Jérusalem se ɓeekon ke Idumée, njé ke in-in gide ba’t ke Jourdain se njé ke in-in ngann ɓeege le ɓeekon ke Tyr se Sidon géa ndolèi go Jésu tɔ. Kosdoo-bulege nè nga reei ra Jésu’t tede ooi ser nyange malang ke è ra. 9Jésu ede njékuwe-girnge kade uwei dè nja ngonn bato undei konn tede le kade doobulege mboin-in de nang lé. 10Jésu ɔr ratur ra dooge’t bule kêm ndɔn’t nè nga. Gir’n ke nè á njé raturge malang nanri nan loo tede kɔde ra’n lêm. 11Dɔ-dɔ loo ke ndilge ke majelé an-in Jésu ɓaa, ei osoi nang njann’t ɓari nin kaláng-kaláng edi nè: – I, i Ngonn Nube kerɔte kuwe. 12Nè Jésu ndáng de le kade d’ɔr gir’n ɗarinè titeke è Ngonn Nube lé ɓai. 13Go’t gugu, Jésu al dè mbal’t dɔ. E ɓar njé ke è aw ndoo de ade undei loo dann doobulege’t teei reei rann’t. 14E tɔr dooge dɔg-gidé-joo unde de ke njékawkulege. Jésu tɔr de unde de le kade umi se’n nan’t bɔk a, le kule de loo kile mber’t a tɔ. 15Taɓai è ade de tɔgmong le rɔ’n ndilge ke majelé kêm dooge’t a tɔ. 16Dooge ke dɔg-gidé-joo ke Jésu tɔr de unde de ke njékawkulege nga, ri de á tò nè: Simon ke Jésu ile ri tɔy’n nè Pierre, 17Jacques ngonn le Zébédée se ngokon’n Jean ke Jésu ile ri tɔy de nè Boanergès (tel se tà koje jéi ɓaa, è ngann ndi ke ndang), 18André, Philippe, Barthélemy a, Matthieu a, Thomas, Jacques ngonn le Alphée a, Thaddée, Simon doo ke ɓee le’n è Cana a, 19Judas Iskariot ke njèkunn dè Jésu. 20Jésu tel aw kêm kei karé’t bè. Doobulege teli ɔsi nja nan rann’t ade è se njékuwe-girnge an-in loo kuse nyan lé. 21Loo ke njénojege le Jésu ooi tà ke ɔje dè’n bè ɓaa, in-in awi le kɔr’n dann doobulege’t le tel ree se’n ɓéee. Ei giri kêm de’t edi nè: – Tà gir le’n ke maje tel waks. 22Njékɔrgir gute-nduge ke in-in kêm ɓee-bò ke Jérusalem reei tami edi nè: – Jésu nga, ngar le ndilge ke majelé ke ri’n nè Béelzébul tò kêmn’t. E takul ngar le ndilge ke majelé nè á è rɔ’n ndilge ke majelé kɔke. 23Jésu ɓar njékɔrgir gute-nduge rann’t deje de se gos ede nè: – Ké Sú asekum tel rɔ se ra’n titeke bain wa? 24Ke nè á ɓeekon le ngar karé kaya ra’n danné loo joo ɓaa, ɓeekon nè nga à aw mbɔr ndan lé. 25Ke nè á dooge ke kêm ɓee karé kayai nan loo joo le rɔi nan ɓaa, ɓee nè nga à aw mbɔr ndan lé. 26Ke nè á Sú ɔse nang in dɔ se ra’n è kuwe ɓaa, è kaya ra’n loo joo, tɔgmong le’n à aw mbɔr lé a, gir’n à gang ɗás a tɔ. 27Doo karé à kin se dè ra’n kaw kêm kei le njétɔg ndur nyange le’n lé. Maje kade uwe’n tɔ’n njanm-njanm kété ɓita à inge loo kɔi nyange le’n kei ráw-ráw ɓai. 28Kerɔte kuwe, man m’ede sei ndàt, kaiyage malang ke dooge rai se tàge ke majelé ke dooge tami dɔ-dɔ se Nube nga, Nube à ade kêm’n à tin mbit dè’t ɓai. 29Nè nanan ke nede Ndil-Kêmnda nga, Nube à ade kêm’n à tin mbit dè’t ndan lé sár se non. 30Jésu tam tà titeke bè se njékɔrgir gute-nduge tede tam ke tami edi nè: «Jésu nga ngar le ndilge ke majelé tò kêmn’t.» 31Kon Jésu se ngakonnge ke ndêin reei ndai nata, ulei kule ɓari nin. 32Doobulege njin nan ra Jésu’t njàng-njàng. Doo karé ree ede Jésu ede nè: – An, koin se ngakoinge ndai nata non à deji nin. 33Jésu deje de ede nè: – Ké dooge ke bain á ei konmge se ngakonmge wa? 34E unn kum’n an njé ke ndii gan-in dè’n wàk ɗêrêr-ɗêrêr ɓaa, ede de ede nè: – An-in konmge se ngakonmge á ndii nè. 35Nanan ke ra nyan ke kêm Nube ndige ɓaa, è nè nga è ngokon’m, se kon nann’m a tɔ.

will be added

X\