MARC 12

1Jésu unn gir kede dooge tà se gostàge ede nè: – Doo karé bè aw se loo ndɔr nduu, è man kage nduuge tutu. E ɔr gali gan’n dè wàk. E nder bolè le kade dé mboré mann nduu d’um tutu a, è ra kei ngonm loo a tɔ. Go’t gugu, è ɓar njéra kule kêm ndɔr nduuge’t um kule’n ji de’t ɓita ɔte aw mba’t dè ɓee ke rang. 2Loo ke nan kuje kann nduu ase ɓá ɓaa, kuwe-ndɔr nè ule ngonn njèndi le’n ra njéra kule kêm ndɔr nduuge’t le kade adii kann nduu ke ɔje dè’n. 3Njéra kule kêm ndɔr nduu’t nè nga, uwei ngonn njèndi nè nga tundei nin, taɓai rɔi nin ade tel ji’n karè ɗáng-ɗáng. 4Kuwe-ndɔr nduu ɔr ngonn njèndi le’n karé ke rang ule’n ra de’t. E nè nga géa, d’unde dè’n se dò katem a, dé taje’n a tɔ. 5E ɔr ngonn njèndi le’n ke njèkon madege’t mute ule’n ra de’t kuwe ɓai, nè dé tɔl’n. E ɔr ngann njéndige le’n ke rang bule ule de ra njéra kule kêm ndɔr nduu’t. Njéra kule kêm ndɔr nduu’t tundei njé ke nange a, tɔli njé ke karége a tɔ. 6Kuwe-ndɔr nduu nè aw se ngonn ke dingem ke dagi. E tár’n ngain. E nè kuwe karé luk-luk á nain. E ule’n ke ngei njékulege le’n ra njéra kule kêm ndɔr nduu’t ede nè: «D’a ɓel ndil ngonn kêm’n.» 7Nè njéra kule kêm ndɔr nduu’t nè edi nan edi nè: «An-in! njè ɓa nyan-ndube ke ndɔ ke rang nga. I reei ade j’umi tà le jéi nan’t, jè tɔli nin ɓaa, ndɔr nduu nè à tel k’ee nyankinge jéi.» 8D’in d’uwe’n, dé ndɔr’n kêm ndɔr nduu’t d’aw se’n ngang loo’t nata, dé tunde’n njanm-njanm dé tɔl’n. 9Jésu deje maw njékuje nyan-mesege se njékɔrgir gute-nduge se ngatɔgege a tɔ, ede nè: – Ké ri á kuwe-ndɔr nduu à ra ta wa? E à aw le kade dé tɔl njéra kule kêm ndɔr nduu’t. Taɓai è à tel se kule kan dè ndɔr nduu nga kum ji dooge ke rang. 10Magtub ke tò se ninn’n tam ede nè: «Kuberi her ke njékunde keige an-in ke nyan lé nga, tel è njè mong kum kei ke get-get. 11Nyan nè nga, è kule ra Nube. E nyan ke dum kum jéi kerɔte kuwe.» Sei i tutei tà nè nga an-in ɓá. 12Njékɔr non Juipge geri titeke Jésu tam gostà nè ɔje’n dè de. Ei sangi le kade d’uwe’n, nè ɓeli kum doobulege ɓaa, ei inyei nin ɔti awi. 13D’ɔr Pharisienge se pajage le Hérode Antipas ke nange d’ule de ra Jésu’t le kade uwei nin se tà se go tà ke à tee tànn’t. 14Ei reei rann’t edi nin edi nè: – Ngar, jè ger titeke i njè tam ngarankum tà kuwe. I njè ndête kum doo lé a, i njèkɔr kum doo lé a tɔ. I ndó dooge ngarankum nyan ke Nube ɔje a tɔ. Kuge tir le ngar ke bò César nga, è loon’t lé wa? Gar-gar, j’à j’ugei éké j’à j’ugei lé wa? Ede jè. 15Nè Jésu ger kede gos le de mbak ɓaa, è deje de ede nè: – Ké bain á ulei kêm’m wa? E ede de ede nè: – I reei se nar kule ke ndɔ karé nga adi man! 16Dé ree se nar kule ke ndɔ karé nga d’ade Jésu an. E deje de ede nè: – E ndil dè doo se ri doo ke dé ndang tu sile’t nè nga, ké ɔje dè nan wa? Dé tel d’ile’n dè’t d’ede nè: – E ndil dè César a, è ri César a tɔ á dé ndang tutu. 17E á Jésu tel ede de ede nè: – Nyan ke ɔje dè ngar César ɓaa i teli adi ngar César, nyan ke è le Kuwe-ɓee Nube ɓaa i teli adi Kuwe-ɓee Nube a tɔ. Tà ige de sêl dè tà ke è tam’t. 18Saddusienge nga tami edi nè: Doo à kunde loo tee dann njé ke koo’t ndan lé. Njé ke nange dann de’t reei ra Jésu’t deji nin tà karé edi nè: 19– Njèndó dooge nyan, Moise ndang tà nè ade jéi Juipge ede nè: «Ke nè á doo taa dinye nal koje’n ngonn á wei ɓaa, ngokon’n ke ndêin à taa dinye ndube nè le kunde’n ko ngokon’n ke wei.» 20Kété mari, ngakon nange ke dingem ji sejimute ndii tutu. Njè ke tɔge taa dinye oje’n ngonn unde ko’n lé ɓai kuwe ɓaa, è wei. 21Ngokon’n ke girn’t taa dinye ndube nga oje’n ngonn unde ko ngokon’n ke tɔge lé ɓai kuwe ɓaa, è wei ke le’n tɔ. Njèkon de’t mute nga géa, è wei titeke bè tɔ. 22Dinye ndube nè nga, ngakon nange ke ji sejimute mbak taai nin. Nè è oje ngonn se doo karé dann de’t lé sár ade weii ɔsi gonan-gonan malang. Dinye nè nga géa wei utu go de mbak. 23Loo ke ndɔn’t dooge à undei loo teei dann njé ke koo’t ɓaa, ké nan dann de’t á à è ngaw dinye nè wa? Kerɔte kuwe, dé ngakon nange ke ji sejimute nè nga, dé taa’n ke dinye le de mbak. 24Jésu ede de ndàt ede nè: – Sei geri Magtub le Nube lé a, tɔgmong le’n lé a tɔ. Gir’n ke nè á in-in ilei tà kɔke salang. Ké è bè lé wa? 25Ndɔ ke dooge à undei loo teei dann njé ke koo’t ɓaa, dingemge se dinyege à taai nan lé, nè à ndii tite dooge ke danrán bè. 26Tà ke ɔje dè dooge ke à undei loo teei dann njé ke koo’t nga, ndɔ ke Nube ede Moise tà’n kété ede nè: «Man Nube le Abraham, le Isaac, le Jacob a tɔ.» Nube ede Moise tà nè kɔte ngonn kage ngarr’t ke on por bilm-bilm. Ké bain á i tutei magtub ke Moise ndang ɔje’n dè tà nè nga an-in lé wa? 27Nube nga è Nube le dooge ke ndii kumgajer m è Nube le dooge ke weii lé. Tà nè nga ur se si walé ngain. 28Njèkɔrgir gute-ndu karé bè oo ndu de ke dé naje’n nan tà. E an tite Jésu ile Saddusienge dè’t maje ngain ɓaa, age meen-meen ree rann’t deje’n ede nè: – Dann gute-nduge’t malang nga, ké è ke ra dum dè madege malang wa? 29Jésu tel ile doo nè dè’t ede nè: – Sei Israelge, uri mbi si maje ooi gute-ndu ke desêin ke dum dè madege malang á tò nè: «Kuwe-ɓee Nube le jéi kuwe è Nube karé bere luk-luk. 30Gar-gar i a tár Kuwe-ɓee Nube ke è Nube lei nga se ngaran kêmi bere mbak a, se danrai bere mbak, se tàgir lei bere mbak a, se tɔgi bere mbak a tɔ.» 31An! gute-ndu ke njèkon’t joo ke dum dè madege malang á tò nè: «Gar-gar i a tár doo madi titeke i tár’n danrai i kuwe bè.» Gute-ndu ke rang ke dum dè gute-nduge ke joo nè goto. 32Njèkɔrgir gute-ndu nè ile Jésu dè’t ede nè: – Maje ngain, njèndó dooge nyan! I tam è kum kerɔte, tede i tam ede nè: Kuwe-ɓee Nube kuwe è Nube se kar’n bere luk-luk. 33Gar-gar i a tár Nube se ngaran kêmi bere mbak a, se tàgir lei a, se tɔgi bere mbak a tɔ. Taɓai i a tár doo madi titeke i tár’n danrai i kuwe bè tɔ. E ke nè è soo’t ngain dum nyankuje-mesege se nyankulge ke tɔl ró se por kade Nube nga. 34Loo ke Jésu an titeke njèkɔrgir gute-ndu nè nga ile’n dè’t se kumkunju’n ɓaa, è ede’n ede nè: – Nube à on ɓee dèi’t ngɔr ta. Dooge malang ɓeli teli deje Jésu tà. 35Loo ke Jésu ndi à ndó dooge nyan kêm kei le Nube ɓaa, è deje de ede nè: – Ké è titeke bain á njékɔrgir gute-nduge tami edi nè Krist nga è ngonnkà David karè wa? 36E David nga géa, Ndil-Kêmnda ɔse’n balang-balang ade tam ede nè: «Nube ede Kuwe-ɓee le’m ede nè: I ndi dè jikonm’t sár le kade m’ade njébange lei teli nyan-sure-nja kum lei.» 37David ke karé nè kuwe ɓar doo nè nga Kuwe-ɓee Nube le’m. A ɓaa, ké Kuwe-ɓee le’n à tel k’ee ngonn’n titeke bain taɓai wa? Tà ke Jésu ndó kosdoo-bulege nga, nel de ngain ade uri mbi de tchên ke rann’t. 38Loo ke Jésu ndi à ndó dooge nyan ɓaa, è ede de ede nè: – Undei kumkunju dè ra si’t nè a kin-in ndaji nyanra njékɔrgir gute-nduge. E ndigi ringei se kubu ke ngal julul-julul a, ndigi kade dooge rai de lapya ndá-looge’t a tɔ. 39Njékɔrgir gute-nduge nga ndigi ndii loo ke kété non kosdooge’t kêm kei kebe nan’t. Loo ke dé ɓar de loo nyankuse’t géa, ei ndigi ndii loo ndi dooge ke bò’t kété a tɔ. 40Ei njé táa nyange le dinye ke njékei-kingege ndát-ndát a, ɔji tà se Nube adi kur de heb ɗak tede le libe’n kum dooge. Dé nè nga, ndɔ gangtà’t ɓaa, Nube à gangtà ke bòi dum madege dè de’t. 41Jésu ndi nang kɔte mbu ke dooge umi nar tutu’t. E an doobulege unni gir kum nar tutu. Njé ke nyankinge de è ngain ɓaa, umi nar tutu ngain tɔ. 42Njèkei-kinge karé bè ree se ngann sile ke njêk-njêk joo um kêm mbu nar’t nè nga tɔ. 43Jésu ɓar njékuwe-girnge ke rann’t ɓaa, è ede de ede nè: – Kerɔte kuwe, man m’ede sei ndàt, ngann nar ke njèkei-kinge um nè nga dum dè nar malang ke njé ke rang umi. 44Njé ke rang malang ɓaa, unni tà nar ke ase de nák-nák á ilei. Njèkei-kinge nè nga, unn nyan ndoo le’n ke ayé ngonm’n ra’n mbak ade.

will be added

X\