MARC 11

1Jésu se njékuwe-girnge undei dè ɓee ke Bethpagé se Béthanie ngɔr. Bethpagé se Béthanie nga, ei kɔki ɓeege le ɓee-bò ke Jérusalem. Loo ke ei awi teei kàde mbal ke kage olivierge ndai tutu ɓaa, Jésu ɔr njékuwe-girnge joo ule de nonn’t kété. 2E ede de ede nè: – Awi kêm kɔki ɓee ke tò non si’t non. Loo ke awi i teei kêm ɓee’t nè ɓaa, ke loon’t nè kuwe a ingei ngonn koro ke dingem ke dé dɔ’n nang. E ngonn koro ke ndɔ karé doo in dènn’t lé ɓai. I tutii, i reei se’n adi man. 3Ke nè á doo karé deje sei ede nè: «Ké bain á sei tutii wa?» ɓaa, edi nin edi nè: «E Kuwe-ɓee lei Jésu á aw ndoo kin dènn’t.» Ke loon’t nè kuwe à inye sei kade i reei se ngonn koro nga. 4Loo ke njékuwegir-Jésuge ke joo nè ɔti awi ɓaa, ingei ngonn koro nè nga tɔ. Dé dɔ’n nang ka-rebe’t ngɔr se tàbit kei ke nata ɓaa, dé tutu’n. 5Dooge ke nange ke ndai loon’t deji de edi nè: – Ké i tuti ngonn koro nè nga le rai ri wa? 6Njékuwe-gire-Jésuge edi dooge nè nga titeke Jésu ede’n de. D’inye loo d’ade njékuwe-gir-Jésuge tuti koro nè nga ɔti awi. 7Njékuwe-gir-Jésuge reei se ngonn koro nè nga rann’t. Ei labi kubuge le de ke bòi yul-yul dè ngonn koro’t adi Jésu al ndi dè’t mbeng. 8Dooge ngain labi kubuge le de ke de bòi yul nanga. Njé ke nange têti balkum kagege labi nang ka-rebe’t kété non Jésu’t ɗɔyi nin. 9Dooge ke nonn’t kété se njé ke goon’t gugu rai nyan jik-jik edi nè: – Ngar ke Kuwe-ɓee Nube ule’n nga, maje kade ndutɔr le Nube nain se’n ade dè’n mong káng-káng. 10Maje kade ndutɔr nain se konɓee ke ndi à ree. Konɓee nè nga à tò tite le kà jéi David ke kété. Ulei ndubra dè Nube ke njè ndi kêm danran’t dɔ. 11Jésu ree tee kêm ɓee-bò ke Jérusalem. E aw kêm kei le Nube gon loo ɗêrêr-ɗêrêr. E tel se njékuwe-girnge ke dɔg-gidé-joo reei kêm ngonn ɓee ke Béthanie tede ndɔ il ɓá ta. 12Ndɔ ke njékon’t joo, loo ke Jésu se njékuwe-girnge à in-in Béthanie le kawi ɓaa, ɓo ra Jésu. 13Loo ke è unn kum’n ɓaa, è an dè kage koté ite lurr. E tɔ aw giré kade bainléa n’inge kann’n dè’t n’use. Nè loo ke è ree ngɔr ɓaa, è an mbi’n karè tede nan kann le kage koté nain ɓai. 14Jésu tam se kage ede nè: – Doo karé bè géa à kuse kanni gugu ndan lé. Njékuwe-gir-Jésuge ooi tà ke è tam nè nga se mbi de. 15Jésu se njékuwe-girnge teei kêm ɓee-bò ke Jérusalem. Jésu aw kêm kei’t le Nube. E unn gir rɔ njékige nyange se njéndogo nyange nata. E koto tablege le njémbel narge se nyan-ndige le njékige derge tile piring-piring kɔke. 16Jésu inye doo karé bè géa ade unn nyan tuge’n kêm kei le Nube gang lé. 17E deje de ede nè: – Kei le’m nga, ké njéribe-dè-tàge ke tà Nube’t ndangi kêm magtub’t edi nè: «A è kei kɔje tà se Nube le kosdooge malang» lé wa? Ké bain á sei i telii ke mbonreen loo ɓɔyɔ ra le gon-ɓogege wa? 18Maw njékuje nyan-mesege se njékɔrgir gute-nduge ooi sertà nè. Ei sangi ké se rebe ke ra n’a tɔli Jésu wa? Nè dé ɓel’n tede doobulege malang nga, ndil de tee an-in soin-soin dè nyan ke è ndó de se ndɔge-ndɔge. 19Loo ke ndɔ il ɓá ɓaa, Jésu se njékuwe-girnge undei loo kêm ɓee-bò’t nè teei awi. 20Barè se ndɔgé ɓat, loo ke Jésu se njékuwe-girnge teli teei loo ke kage koté nda tutu nga ɓaa, ei an-in nin tutu wùm sár tee’n girn’t nang. 21Kêm Pierre olé dè tà ke tagela Jésu tam se kage koté ɓaa, è ede Jésu ede nè: – Kuwe jé, an! kage koté ke tagela ɔr se’n nga wei njanm. 22Jésu ede njékuwe-girnge ede nè: – Undei kêm si dè Nube’t. 23Kerɔte kuwe, man m’ede sei ndàt, ke nè á doo karé ede mbal nè ede nè: «Ɔr rai loo ke nè’t kɔke aw oso ba ɓaa, d’ade ra nyan nè kade’n kuwe. Nè è tà le kade um kêm’n dè’t bɔk-bɔk m naje se ra’n dè’t lé. 24Gir’n ke nè á man m’ede sei: nyan malang ke sei deji Nube loo ke ɔjii se’n tà nga, ke nè á umi kêm si dè’t titeke a ingei nga nyan nè nga kerɔte kuwe ɓaa, d’a d’ade sei nyan nè kuwe. 25Dɔ-dɔ loo ke in-in i ndai dɔ le kɔji tà se Nube nga, ke nè á kêm si on sei dè doo karé’t ɓaa, inyei go nyanrage le’n ke se go rebe’n lé. Titeke bè á Bɔ si ke ndi danrán géa à inye go nyanrage le si ke se go rebe’n lé le si nga tɔ. 26Nè ke nè á inyei go nyanrage ke se go rebe’n lé le dooge ke rang lé ɓaa, Bɔ si ke ndi danrán géa à inye go nyanrage le si ke se go rebe’n lé nga ndan lé tɔ. 27Jésu se njékuwe-girnge teli reei kêm ɓee-bò ke Jérusalem gugu. Jésu njiye kêm kei le Nube. Ke loon’t nè kuwe, maw njékuje nyan-mesege se njékɔrgir gute-nduge se ngatɔgege reei rann’t deji nin edi nè: 28– Ké nan adi tɔgmong á i ra’n nyange nè nga wa? Ké nan á inye loo adi kade i ra’n nyange ke titeke bè wa? 29Jésu ede de ede nè: – M’a deje sei tà karé luk-luk le koo. Ke nè á ilei man dè’t ɓaa, m’a m’ede sei ri njèkinye loo kade m’ra’n nyange nè nga tɔ. 30Kule dooge manné njonm ke ndɔ ke Jean ile m’ber’n kété ɓita ule dooge manné njonm a tɔ nga, ké gir’n in danrán ra Nube’t éké in ra dooge’t wa? Ilei man dè’t. 31Dé murin tà dann de’t d’ede nè: – Ké j’à kilei n’ee dè tà’t kedi nè ri wa? Ke nè á j’à j’ilei n’ee dè’t kedi nè: Gir’n in danrán ra Nube’t ɓaa, n’a n’deje jèi kede nè: A ɓaa ké bain á umi kêm si dè tà’t le Jean lé wa? 32Ke nè á j’à j’ilei n’ee dè’t kedi nè: Gir’n in ra dooge’t ɓaa, kosdoo-bulege à in-in se jéi se tà ke le de tɔ. Dé ɓel kosdoo-bulege tede dooge malang an-in Jean ke ngarankum njèribe-dè-tà ke tà Nube’t. 33Gir’n ke nè á dé tel d’ile’n Jésu dè’t d’ede nè: – Jè, jè ger lé. Jésu tel ede de ede nè: – Ke nè á è bè ɓaa, m’a m’ede sei ri njékinye loo kade m’ra’n nyange nè nga ndan lé tɔ.

will be added

X\