LUC 9

1Ndɔ karé bè, Jésu ɓar njékuwe-girnge ke dɔg-gidé-joo ɔse nja de nan’t . E ade de dèmong se tɔgmong le rɔ’n ndilge ke majelé malang kêm njératurge’t a, se le kɔr’n ratur ra dooge’t a tɔ. 2Jésu ule de le kade d’ile mber Konɓee le Nube á go karé lé. Nè è ule de le kade d’ɔr ratur ra njératurge’t a tɔ. 3Taɓai Jésu ede njékuwe-girnge ke dɔg-gidé-joo nga ede nè: – Mba ke a awi nga, otoi nyange ke tite kage ke tà ɗuge, éké mbu, éké nyankuse,éké nar ji si’t lé. I tulei kubu dè nan’t joo lé a tɔ. 4Kêm kei ke rara ke d’uwe sei mba tutu nga, è kuwe i ndii kêmé sár le kade in-in awi kété. 5Kêm ɓee ke rara ke dooge d’uwe sei ke ra de’t lé nga, loo ke a undei loo teei ɓaa, i geki bubur ke nja si’t gák-gák, undei naje le si. 6Titeke bè á, njékuwe-gir-Jésuge awi se kêm ɓee-ɓee ilei mber Tà ke Maje a, ɔri ratur ra dooge’t se loo malang a tɔ. 7Loo ke ngar Hérode, njèkonɓee ke dè nang ke Galilée oo ser nyange ke teei nè ɓaa, è ger nyan ke get kum ra lé. Tede dooge ke nange tami tà ɔji dè Jésu edi nè: – E Jean ke njèkule dooge manné njonm á unde loo tee dann njé ke koo’t. 8Njé ke nange tami edi nè: – E Elie njèribe-dè-tà ke tà Nube’t á unde loo tee hɔi. Njé ke rang edi nè: – E doo karé ke dann njéribe-dè-tàge ke tà Nube’t ke kété mari á unde loo tee dann njé ke koo’t. 9Hérode tam kêmn’t ede nè: – Jean géa è man kuwe á ndɔ ke m’ade dé tuge kɔbe’n dé gang ɓá. A ɓaa, doo ke dé tam tà nyange ke titeke bè d’ɔje’n dè’n á m’oo nè nga, è nan taɓai wa? Hérode sang le kan Jésu se kum’n. 10Loo ke njékawkulege in-in mba’t teli reei ɓá ɓaa, ɔri ser nyange malang ke rai adi Jésu oo se de. E ɔr ra’n se de aw se de ngang loo’t nata kum’n ke ɓee ke Bethsaida. 11Loo ke kosdoo-bulege geri tà kaw de ɓaa, ndolèi go de. Jésu uwe de ke rann’t ede de tà ke ɔje dè Konɓee le Nube a, dooge ke awi ndoo kade ratur ɔr dè de’t nga, è ɔr ratur ra de’t a tɔ. 12Nain ngɔr kade kàde ur. Njékuwe-gir-Jésuge ke dɔg-gidé-joo reei rann’t edi nin edi nè: – Ngar, inye dooge ade awi kêm ɓeege ke dè nan’t gêrêr nè se kêm ngann ɓeege sangi loo tò de se nyankuse de. Tede loo ke jè ndi tutu nè nga, è dè dile-loo karè. 13Jésu ede de ede nè: – Sei kuwe adi de nyan d’use. Dé tel d’ede’n d’ede nè: – Ke nè á j’aw le ndogo nyankuse ke rang lé ɓaa, wal-mur ke mi se tutu kanje ke joo bere nè nga, à ase kosdoo-bulege nè nga malang titeke bain wa? 14Kɔr dingemge malang nga è aru dɔg loo mige bè. Jésu ede njékuwe-girnge ede nè: – Uwei de dè nan’t ase kɔr-mi, kɔr-mi. 15Dé ra titeke è ede’n de ɓaa, d’ade dooge ndii nang malang se mate de-mate de. 16Jésu koto wal-mur ke mi se tutu kanjege ke joo nè, an loo ke danrán, ra Nube oiyo ɓita è kai ade njékuwe-girnge kade noboi doobulege nè nga ɓai. 17Dé malang d’on mur d’ade kêm de ndann gɔj-gɔj. Gute wal-mur ke nain nang nga d’ɔi kêm ngann janga dɔg-gidé-joo. 18Ndɔ karé bè, Jésu aw ngang loo’t nata ndi ɔje tà se Nube se kar’n. Nè njékuwe-girnge ndii kɔtenn’t. E unn tà karé deje de ede nè: – Man nga, ké dooge tami edi nè man nan wa? 19Dé tel d’ile’n dè’t d’ede nè: – I nga dooge ke nange tami tà ɔji dèi edi nè: «I Jean ke ndɔ ke è njèkule dooge manné njonm, njé ke nange giri kêm de’t edi nè: i Elie, njé ke nange ke rang tami edi nè: i njèribe-dè-tà ke tà Nube’t ke kété mari á unde loo tee dann njé ke koo’t.» 20Jésu tel deje de ede nè: – A ɓaa sei, ké i tami edi nè m’ee nan wa? Pierre ile jésu dè’t ede nè: – I i Krist ke Nube ule’n. 21Jésu on njékuwe-girnge njanm-njanm ede nè: – I tami tà nè nga adi doo karé bè oo lé. 22Taɓai è ede de ede nè: – Man ke m’ee Ngonn doo nga, gar-gar m’a m’inge nyantosowur. Ngatɔgege le juipge se maw njékuje nyan-mesege a, se njékɔrgir gute-nduge à adi d’ade ɓer’m kàde kage-ke-dese’t. Nè ndɔ ke njèkon’t mute ɓaa, m’a m’unde loo tee dann njé ke koo’t. 23Go’t gugu, Jésu ede dooge malang ke ndai rann’t ede nè: – Ke nè á doo karé ndige kunn dè nja’m têr-têr ɓaa, maje kade an ra’n ke nyan lé a, maje kade uwe dè nja ra’n le kwei tite man m’ra’n bè, ɓita unn rebe goom’t se ndɔge malang ɓai. 24Ke nè á doo karé ndige kaje ra’n ɓaa, à ile ra’n kɔke salang; nè ke nè á doo karé ile ra’n kɔke salang tede kunn ke è unn rebe goom’t nga ɓaa, è doo nè nga á ndi kumgajer kerɔte kuwe. 25Ke nè á doo karé inge nyan malang ke dè nang nè, nè ile ndikumgajer le’n ke get kɔke salang ɓaa, ke ri á à è soon’t wa? 26Ke nè á doo karé ra rasɔl dèm’t se dè tàge’t le’m ɓaa, man ke m’ee Ngonn doo nga, ndɔ ke m’a m’tel ree dann ndubra’t le’m se le Bɔ’m se le njékêmndage ke danrán a tɔ ɓaa, ra’m à sɔl’m dènn’t tɔ. 27Kerɔte kuwe, man m’ede sei ndàt, doo ke nange dann njé ke ndai nè à weii lé sár kade an-in Konɓee le Nube se kum de ɓita à weii ɓai. 28Jésu ede dooge tà kwei le’n se tà kunde loo tee le’n dann njé ke koo’t. Loo ke ra ndɔ sɔsɔ ɓaa, è ɔr Pierre se Jean se Jacques aw se de dè mbal’t tede kɔje tà se Nube. 29Loo ke è nda à ɔje tà se Nube ɓaa, tàkum’n tel waks. Kubuge le’n ke rann’t teli ndai káng-káng a, ndoléi kein-kein a tɔ. 30An! dingemge joo teei ndai à ɔji tà se Jésu. Dooge ke joo nè nga, è njèyo Moise se njèyo Elie. 31Moise se Elie undei loo teei dann ndubra’t ndai à ɔji tà se Jésu. E tà ke ɔje dè rebe ke Jésu ayé kɔr’n son kule le’n se yo kêm ɓee-bò ke Jérusalem. 32Ɓi ase Pierre se njé ke ei se’n nák. Nè ei uwei ra de mong kêm ndɔn’t nè an-in Jésu se dingemge ke joo ke ndai se’n dann ndubra’t le’n nga. 33Loo ke dingemge nè à inyei Jésu le kɔti kawi ɓaa, Pierre ede’n ede nè: – Ngar, è soo’t ngain kade jè ndii nè. Ade jè rai kei kam mute, karé à è lei, karé à è le Moise, è ke karé à è le Elie tɔ. Pierre tam tà nè nga bè anje ger gir. 34Loo ke tà nain tànn’t ɓai ɓaa, ke loon’t nè kuwe, bum ree sebe rap dè Jésu se dingemge joo ke ndai à ɔji se’n tà nga. Loo ke njékuwe-girnge an-in de dann bum’t nè ɓaa, ɓel unde de ndàt gang de. 35Ndu Nube ɓar dann bum’t nè ede nè: – E nè nga è Ngonn’m ke get, è man kuwe á m’ɔr’n m’unde’n se ninn’n gai. Ooi tà tànn’t. 36Loo ke Nube tam tà nè bè ɓá ɓaa, Jésu kuwe se kar’n bere á nain. Njékuwe-girnge ndii tà de mundu. Kêm ndɔn’t nè, d’ɔr ser nyan karé bè ke d’an se kum de nè nga d’ade doo karé bè géa oo lé. 37Barè lookar’n, Jésu se njékuwe-girnge in-in dè mbal’t à risi nang. Kosdoo-bulege ngain reei tilei kum’n. 38An! dingem karé bè in dann doobulege’t nè nga tam tà se ndu’n ke bòi ede nè: – Njèndó dooge nyan, m’ra ndoo rai’t, kɔkrɔ karè, i ree ile kumi dè ngonnm’t ade’m sei. Tede è nga è ngonn dagi le’m ke dingem. 39An! ndil ke majelé uwe ngonn nè nga mêtch, ke loon’t nè kuwe ra’n ade non ɓerer-ɓerer a, sure mbangang-mbangang ade pululu tee tànn’t pɔt-pɔt a tɔ. Taɓai ndil nè nga uwe’n gudu’n ngoin-ngoin ke mari-mari ɓita inye’n ɓai. 40M’deje njékuwe-girige tede kade rɔi ndil ke majelé nè nga kɔke, nè tɔg de ase lé. 41Jésu unn tà tam ede nè: – Sei ke njé kunn mbi dè tàge’t se njé ndɔje lɔk-lɔkge ke ɗarinè nga, ké m’a ndi se si dè nang nè ndɔ kandang ɓai wa? Ké m’a kile kêm dè si’t nja kandang ɓai wa? Jésu tel ede dingem nè nga ede nè: – I ree se ngonni nga ke nè. 42Loo ke bɔ ngonn nè à ree se’n ɓaa, ndil ke majelé unn ngonn nè ile’n nang njanm ade sure mbangang-mbangang. Nè Jésu in se ndil ke majelé nè nga ndáng’n. E aje ngonn nè nga tel ule’n ji bɔn’t. 43Ndil doobulege malang tee an-in soin-soin dè tɔgmong ke bò le Nube nga. Tà ige doobulege nè sêl dè nyange malang ke Jésu ra ade teli ndii giw. E ede njékuwe-girnge ede nè: 44– Sei ɓaa, uri mbi si maje ooi tàge ke m’a m’ede sei ɗarinè. Man ke m’ee Ngonn doo nga, d’a d’ule’m ji dooge’t. 45Nè njékuwe-gir-Jésuge geri tà nè nga lé. D’ade gir tà nè tò putru kum de’t tede kade dé ger’n gir njai lé. Nè né è bè géa, njékuwe-gir-Jésuge ɓeli dejii tà dè tà’t nè tɔ. 46Tàgir karé in dann njékuwe-gir-Jésuge ade unni gir deji nan tà edi nè: – Ké nan dann jéi’t è doo ke bò dum jéi malang wa? 47Nè Jésu ger tàgir le de ke dè ɓengre de’t mbak. E unn ngonn karé ke ndêin bè unde’n kɔtenn’t ɓaa, è ede de ede nè: 48– Nanan ke uwe ngonn ke tite njè ke nè ke rann’t tede ri’m ɓaa, è man kuwe á uwe’m ke rann’t. Nanan ke uwe’m ke rann’t ɓaa, è njèkule’m kuwe á uwe’n ke rann’t. Nanan ke tel ra’n ke ngonn ke ndêin bè dann si’t malang, è nè nga ndɔn’t à è doo ke bò dum sei malang. 49Jean unn tà tam ede nè: – Kuwe jé, j’an dingem karé bè rɔ ndilge ke majelé kɔke se rii. Nè j’in se’n dè’t tede è nè nga, è njèkuwe-giri tite jé jè lé. 50Nè Jésu in se’n dè’t ede nè: – Ɔgi nin dè’t lé. Tede nanan ke ɔse se si tà lé ɓaa, è njèmade kule le si. 51Ndɔ ke d’a d’unn Jésu dè nang nè kaw se’n danrán nain ngɔr ta. E ɔje njáng le kaw kêm ɓee-bò ke Jérusalem. 52Jésu ɔr ngann njékulege le’n ule de nonn’t kété. Ngann njékulege le’n nga in-in osoi rebe awi teei kêm ɓee karé ke ɓeekon ke Samarie tede kade uwei dè nja nyange tede’n. 53Nè dooge ke kêm ɓee’t nè nga utei Jésu mbeng tede kaw ke ndi aw kum’n ke ɓee-bò ke Jérusalem. 54Loo ke njékuwe-gir-Jésuge joo, Jacques se Jean ooi tà nè nga bè ɓaa, ei deji Jésu edi nè: – Kuwe-ɓee, ke nè á i ndige ɓaa, ade j’ade ndi ile de njanm ró de rák-rák kɔke. 55Nè Jésu tel tur ra’n dè de’t, è in se de ndáng de dè tà tam de’t. 56Dé d’ɔte d’aw kêm ngonn ɓee karé ke rang. 57Loo ke dé nain se rebe ɓai ɓaa, doo karé ede Jésu ede nè: – Ngar, loo malang ke i a aw tutu nga, m’a m’aw sei nan’t, nan’t. 58Jésu ile doo nè nga dè’t se gostà ede nè: – Njange géa ingei bolè tò de a, helge ke walé géa ingei ndis tò de a tɔ. Nè man ke m’ee Ngonn doo nga, m’inge loo kule dè’m bè taa kebe lé. 59Jésu ɓar doo karé ke rang kuwe ɓai ede’n ede nè: – Unn dè nja’m têr-têr. Nè doo nè nga tel ede Jésu ede nè: – Ngar, inye’m ade m’aw m’dubu ninn bɔ’m ɓita. 60Jésu tel ile doo nè nga dè’t ede nè: – Dubu ninn dooge nga, è kule ke ɔje dèi lé ta. Nè i ɓaa, aw ile mber Konɓee le Nube ade dooge ke rang. 61Doo karé ke rang ree ede Jésu ede nè: – Kuwe-ɓee, m’a m’unn dè njai têr-têr kuwe, nè inye’m ade m’aw m’an kum njénojege le’m m’nain’n kété pa ɓita. 62Jésu ile doo nè nga dè’t ede nè: – Doo ke rara ke uwe dè kɔse-mang à ndɔr’n á tel mer loo ke goon’t gugu ɓaa, Konɓee le Nube tò ɔje dè’n lé.

will be added

X\