LUC 8

1Go’t gugu ɓaa, Jésu aw se loo-loo kêm ɓee-bòge se kêm ngann ɓeege ile mber Tà ke Maje ke ɔje dè Konɓee le Nube ade dooge. Njékuwe-girnge ke dɔg-gidé-joo danni nin. 2Dinyege ke nange ke Jésu rɔ ndilge ke majelé kêm de’t se dinyege ke rang ke è ɔr raturge gai-gai ra de’t nga géa danni nin a tɔ. Dé dinyege nè nga ri de á tò ne: Marie ke ɓee le’n è Magdala ke ndɔ ke Jésu rɔ ndilge ke majelé ji sejimute kêmn’t, 3se Jeanne, dinye le Suza njèkan dè nyange le ngar Hérode, se Suzanne a, se njé ke rang bule a tɔ. Dinyege nè malang unni nyankingege le de rai se Jésu se njékuwe-girnge. 4Dooge in-in se kêm ɓee-ɓee reei ra Jésu’t. E unn gostà karé ede dooge ke ɔsi nja nan rann’t ede nè: 5– Dingem karé ndi tutu. E in se ko nyan kêm kei le’n aw’n unde kêm ndɔr’t. Loo ke è nda à unde ko nyan kêm ndɔr’t le’n nga, njar ko ke nange tée toso nang ngang rebe’t. Dooge njiyei dè’t a, helge ke walé otoi turi a tɔ. 6Njar ko ke nange ke rang tée toso dè her’t tɔ. Loo ke ubei ɓaa, ke loon’t nè kuwe ndolèi sabak a, tuti parr tede nang ke gir de’t è ngain lé. 7Taɓai njar ko ke nange ke rang tée toso dè jig-konnge’t ade ubei nan’t, nè konnge in-in pujuri dè de mbak. 8E ke nange tée toso dè nang ke maje’t ade ubei a, tɔgi a, ɔri dè de maje a tɔ. Dè ko karé-karé malang ide ase njar’n aru. Taɓai Jésu tam se ndu’n ke bòi ede nè: – Ke nè á mbi si tò tutu ɓaa, uri maje ooi tà ke m’ede sei nè. 9Njékuwe-gir-Jésuge dejii le kade ɔrgir gostà nè nga ade de. 10E tel ile de dè’t ede nè: – Sei ɓaa, Nube ɔrgir nyange ke ɔje dè Konɓee le’n ke tò loo ɓɔyɔn’t nga ade sei geri ɓá. Nè dooge ke rang ɓaa, nyange ke tooi loo ɓɔyɔn’t ɔje dè Konɓee le Nube nga, d’a d’ede de se gostà. «Nyan nè nga tee titeke bè le kade d’an se kum de, nè d’an njai lé, le kade d’oo se mbi de, nè geri gir njai lé a tɔ.» 11Jésu ede de ede nè: – Gir gostà nè nga á tò nè: Tà le Nube nga tò asenan se ko nyan ke doo unde bè. 12Dooge ke nange tooi asinan se njar ko ke tée toso ngang rebe’t. D’oo Tà ke Maje le Nube kuwe, nè njèban ree ɔr Tà ke Maje nè nga dè ɓengre de’t wont kɔke ɔge de kum kêm de dè’t kaje’n ra de. Dé nè nga, dé tò d’asenan se njar ko ke tée toso dè her’t bè. 13Dooge ke nange taai Tà ke Maje nè nga se ranel. Nè tà nè nga ule ngire’n nang dè ɓengre de’t lé. D’um kêm de dè’t mbɔr nè loo ke nyan unde loo tee nan kundekêm le de ɓaa, ke loon’t nè kuwe dé sure go kundekêm le de d’inye. 14Njar ko ke tée toso dè jig-konnge’t nga, ei dooge ke ooi Tà ke Maje, nè inyei loo adi tàgirge ke ɔje dè nyankinge se ngur-nyange gai-gai ke dè nang nè pujuri dè Tà ke Maje nè nga se rebe kɔke nuji. 15Njar ko ke tée toso dè nang ke maje’t nga, ei dooge ke ooi Tà ke Maje se kêmnda káng ɓaa ngonmi dè ɓengre de’t a, ligri dè’t lagr-lagr sár adi kann de tò tutu. 16Loo ke doo unde por tu lampe’t ɓaa, à tel sebe nyan dè’t éké à tel kule gir tire’t lé. Nè à nan dɔ tà kage’t le kade njé ke reei kêm kei an-in loo njai-njai. 17Nyan malang ke tò loo ɓɔyɔn’t ɗarinè nga, ndɔ ke rang d’a tee se gir’n nata ɓai, nyan malang ke tò loo ngeinn’t ɗarinè nga, ndɔ ke rang d’a kuje gir ndát-ndát ɓai. 18Undei kumkunju dè ra si’t dè tà ke ooi’t nga. Nanan ke aw se nyan jinn’t lé ɓaa, nyan ke ndêin bè ke è gir kêmn’t ede nè è nyan le’n nga, Nube à uwe taa jinn’t wont kɔke. 19Kon Jésu se ngakonnge reei le kan-in nin nè asi kawi teei rann’t lé tede dooge njin nan rann’t njàng-njàng. 20Doo karé ree ede’n ede nè: – Koin se ngakoinge ndai nata non ndigi kilei kum de dèi’t. 21Jésu ede dooge malang ede nè: – Dooge malang ke ooi Tà le Nube rai nyan’n nga, ei á m’an de tite kon’m se ngakonmge bè. 22Ndɔ karé bè, Jésu se njékuwe-girnge ali kêm bato’t ɓaa, è ede de ede nè: – Ade jè gangi ba j’awi gide ke nú’t. D’ɔte ke loon’t nè d’aw kuwe tɔ. 23Loo ke d’ade gang ba ɓaa, Jésu tò ɓi ndêr-ndêr. Ke loon’t nè kuwe nel-bò unde loo tee pitring sebe dè ba’t gap. Mann unn gir taa kêm bato pel-pel ade dé malang ndi tà yo’t. 24Njékuwe-gir-Jésuge reei rann’t ndelii edi nè: – Ngar, ngar, mann à uwe jéi. Loo ke Jésu in gir ɓi’t ɓaa, unn ndu’n ade nel-bò a, se kɔr-mann ke tal bungus-bungus a tɔ ebe’t ra’n kule a, ade dè mann toso ɗêng-ɗêng a tɔ. Ká loo tel pa sibik. 25Taɓai Jésu deje njékuwe-girnge ede nè: – Ké kundekêm dèm’t le si tò ra wa? Nè ɓel unde de ndàt gang dè ade dé deje nan tà d’ede nè: – Ké doo nè nga è doo ke bain á nel-bò se mann-ba géa ooi tà tànn’t titeke bè wa? 26Jésu se njékuwe-girnge gangi ba awi kêm ɓeekon ke Gérasa ke tà’n sɔbe nan se ɓeekon ke Galilée. 27Loo ke Jésu rise nang ɓá ɓaa, dingem karé ke kêm ɓee’t nè nga ree tile kum’n. Dingem nè nga ndilge ke majelé tooi kêmn’t. Doo nè nga ule kubu rann’t lé mari bere a, ndi kêm ɓee’t lé nè ra ɓee kêm be-ɓadege a tɔ. 28Loo ke è tête kum’n an Jésu ɓaa, è oso nang njann’t, taɓai unn gir tam tà se ndu’n ke bòi beng ede nè: – Jésu, Ngonn le Nube ke njèdum dè nyange malang, ké ri lei á i sang ram’t wa? Kɔkrɔ karè, i ra kum ndoo lé. 29Dingem nè tam tà nè nga titeke bè tede Jésu unn ndu’n ade ndil ke majelé le kade unde loo tee kɔke kêm doo’t nè. Dɔ-dɔ ndil ke majelé nè nga unn dingem nè tile’n barak-barak. Doo nè nga, dɔ-dɔ dé tɔ ji’n se sul a, d’ile kanglang njann’t dé ngonm’n nang. Nè è gang sul ke jinn’t nga ɗap-ɗap a, tête kanglang ke njann’t dap-dap a tɔ. Ndil ke majelé nga ɔr dingem nè aw se’n kêm dilege’t a tɔ. 30Jésu deje dingem nè nga ede nè: – Ké rii nè nan wa? E tel ile’n dè’t ede nè: – Ri’m nè «kos njérɔge.» E tam tà nè nga titeke bè tede ndilge ke majelé ke ndii kêmn’t nga bulei ngain. 31Ndilge ke majelé nè nga, ndingei ndoo tà Jésu’t le kade unn ndu’n ade n’undei loo n’teei n’awi kêm bolè ke son’n goto’t nga lé. 32Kos kɔsnyonge ndai dè mbal’t ngɔr kɔte loo’t nè nga à usei nyan. Ndilge ke majelé nga rai ndoo ra Jésu’t le kade inye loo ade n’awi kêm kos kɔsnyonge’t nè nga. E inye loo ade de le kade d’aw kêm kos kɔsnyonge’t nè nga. 33Ndilge ke majelé undei loo kêm dingem’t nè teei awi kêm kos kɔsnyonge’t. Ke loon’t nè kuwe, kos kɔsnyonge nè nga in-in dè mbal’t ɓungei nan an-in jɔrèi baa weii kabak. 34Loo ke njé ngonm kos kɔsnyonge an-in nyan ke tee nè nga bè ɓaa, an-in nan awi se tà nè nga asi loo nák-nák kêm ɓee-bò’t se kêm kɔki ɓeege malang ke an-in dè’n. 35Dooge malang ke tà nè oso mbi de’t nga teei som-som le kawi kan-in nyan ke tee nè nga se kum de. Loo ke dé tee ra Jésu’t ɓaa, d’inge dingem ke ndilge ke majelé undei loo teei kêmn’t nga. Dè’n tel tò maje ade tule kubuge rann’t ndii’n nang ngêrêng nja Jésu’t. Ɓel unde dooge ndàt gang de. 36Njé ke an-in nyan ke tee nè nga se kum de, ɔri ser’n adi dooge ke rang titeke dingem ke ndilge ke majelé ndii kêmn’t nga d’ade tel ndi karè ta. 37Dooge malang ke kêm ɓeekon ke Gérasa nga ɓel ra de ngain ade deji Jésu le kade in aw rang. Jésu al kêm bato’t tede le tel kaw. 38Ke loon’t nè kuwe dingem ke ndɔ ke ndilge ke majelé undei loo teei kêmn’t nga, è deje Jésu ede nè: – Tài tò njak, ade m’aw sei. 39Nè Jésu ede dingem nè nga ede nè: – I tel aw ra njé lei’t, ɔr ser nyan malang ke Nube ra tedei ade d’oo. Dingem nga tel aw, ɔr ser nyan malang ke Jésu ra tede’n nga ase’n loo nák-nák kêm ɓee-bò’t nè nga bere mbak. 40Loo ke Jésu in gide ba’t nú à ree ɓaa, doobulege reei tilei kum’n se rebe tede dooge malang ndii tchên nginei ndɔ tel’n. 41Dingem karé bè ri’n nè Jairus ree tee pan. Doo nè nga, è ngar dè kei kebe nan. E oso nang nja Jésu’t ndête’n ɓɔk-ɓɔk le kade aw se’n kêm kei le’n, 42tede ngonn’n ke dinye ke dagi nga tò à tile pal yo. Ngonn ke dinye nè nga aw se ɓal dɔg-gidé-joo ta. Jésu in ke loon’t kuwe aw se Jairus, nè dooge njin nan ra Jésu’t njàng-njàng ɔgii loo taa kebe. 43Dinye karé ke mese tal rann’t gavbak-gavbak ase lo dɔg-gidé-joo nda dann dooge’t nè tɔ. E tunde nyankingege le’n malang tin sakt-sakt kɔke ra njékugege’t. Nè doo karé bè ke njèkuge asekum kɔr ratur nè rann’t lé. 44E ngein go Jésu’t ree ɔde tà kubu ke kàdenn’t lêm. Ke loon’t nè kuwe mese ke tal rann’t nga gang ɗás. 45Jésu deje ede nè: – Ké nan ɔde ra’m nè wa? Dé malang dé naje. Pierre tam ede nè: – Ngar, doobulege ke njin nan rai’t njàng-njàng nè nga ké an de lé wa? 46Nè Jésu ede Pierre ede nè: – Kerɔte kuwe, doo karé ɔde ra’m, tede m’ger titeke tɔgmong le’m tee ram’t ndêin. 47Loo ke dinye nè an titeke nyan ke è ra se gide ngein nga gir tee ɓá ɓaa, ra’n ndebe ngann-ngann ade ree uwe nja Jésu. E ɔrgir nyan ke in kêmn’t á ade n’aw n’ɔde’n ra Jésu a, ke loon’t nè kuwe ade ratur ɔr’n dènn’t a tɔ. E ɔr gir nyan nga ade kosdooge malang ke ndai tutu ooi. 48Jésu ede dinye nè nga ede nè: – Yaa, kundekêm lei aji ɓá ta. Aw se kêmlom. 49Loo ke tà nain tà Jésu’t ɓai ɓaa, njèkule karé in kêm kei le Jairus, ngar dè kei kebe nan ree ede’n ede nè: – Ngonni ke dinye nga tà’n tête ɓá, an tá nè à kade njèndó jéi nyan ɔr se ndáng karè. 50Nè loo ke Jésu oo tà le njèkule nè nga bè ɓaa, è ede Jairus ede nè: – I ɓel lé nè um kêmi dè’m man’t kuwe karé ɓaa, ngonni ke dinye nè à tɔse ndel kin ɓai. 51Loo ke Jésu aw tee ɓéee ɓaa, è inye loo ade doo karé ke rang aw se’n kêm kei dè ninn ngonn ke dinye’t nè nga lé. Nè è inye loo ade Pierre, Jean, se Jacques, bɔ ngonn se kon ngonn ke dinye nè ade awi se’n kei. 52Dooge malang ke ndai loon’t nè nga noin jik-jik a, undei kàde de dai-dai a tɔ, tede ngonn ke dinye nè nga. Nè Jésu ede de ede nè: – Ebi’t non jik-jik. Ngonn ke dinye nè nga wei lé, nè tò ɓi karè. 53Nè dé ngon kum de go Jésu’t ngon tede dé ger kêm de’t mbak titeke ngonn ke dinye nè nga wei kerɔte. 54Jésu uwe ji’n ɓar’n se ndu’n ke bòi ede nè: – Ngomande, i tɔse ndel in. 55Ke loon’t nè kuwe ndil’n tel ree rann’t ade tɔse ndel in ndi dɔ. Jésu unn ndu’n ade de le kade d’ade ngomande nè nyan use. 56Njékoje ngonn ke dinye nè nga tà ige de sêl, nè Jésu ndeje de le kade dé tam tà nyan ke tee nè nga d’ade doo karé bè géa oo lé.

will be added

X\