LUC 6

1Ndɔ taa kebe karé bè, Jésu unde kêm ndɔr gang. Njékuwe-girnge têti dè ko tonmi usei. 2Pharisienge ke nange deji de edi nè: – Ké bain sei rai nyan ke gute-ndu le jéi ɔge jéi ra se ndɔ taa kebe nga wa? 3Jésu tel ile de dè’t ede nè: – Nyan ke ndɔ ke David ra nga, ké sei i tutei tà’n an-in lé wa? Ndɔ karé bè, ɓo ra David se dooge le’n ngain. 4E aw kêm kei kubu’t le Nube, è unn mur ke tò se ninn’n on a, ade dooge le’n on-in a tɔ. Nè gute-ndu le jéi ɔge nanan géa kon mur nè tede tò ɔje dè njékuje nyan-mesege kuwe se kar de bere. 5Jésu tel ede de kuwe ɓai ede nè: – Man ke m’ee Ngonn doo nga, m’ee ngar dè ndɔ taa kebe’t. 6Ndɔ taa kebe karé ke rang, Jésu aw kêm kei kebe nan’t. E unn gir ndó de nyan. Dingem karé ke jikon’n wei tonrin ndi dann de’t tɔ. 7Njékɔrgir gute-nduge se Pharisienge undei kum de lêr-lêr le kan-in ké Jésu ayé kɔr ratur ra dingem’t nè nga se ndɔ taa kebe wa? Dé ra titeke bè le kile’n tà dènn’t kede nè è al tà tà gute-ndu’t le de. 8Nè Jésu ger tàgirge le de ke kêm de’t mbak. Gir’n ke nè á, è ede’n dingem ke ji’n wei tonrin nè nga ede nè: – Ɔse nang in dɔ i nda dann de’t nè ade d’an-in. E ɔse nang in nda dɔ dann de’t ngurung. 9Go’t gugu, Jésu deje de ede nè: – Man m’deje sei tà karé koo: Ké gute-ndu inye loo ade jéi se ndɔ taa kebe le ra maje se doo éké le ra se’n majelé wa? Ké è tà le jéi le kaje doo kêm ndɔn’t nè éké le kinye’n kade tuju kɔke wa? 10Jésu an de ɗêrêr-ɗêrêr malang ɓaa, è ede dingem ke ji’n wei kàdenn’t tonrin nè nga ede nè: – I ndaje jii. Ɓaa è ndaje ji’n kuwe tɔ. Ji dingem nè nga tel tò karè ndát- ndát titeke kété. 11Nè wong ase njékɔrgir gute-nduge se Pharisienge nák ade unni gir kɔr nan tà dè nyan ke ayé rai se Jésu. 12Kêm ndɔn’t nè nga, Jésu aw dè mbal’t le kɔje tà se Nube. E ɔje se’n tà dann ndɔ sár ade loo ar yerer. 13Loo ke loo ar yerer ɓá ɓaa, Jésu ɓar njékuwe-girnge rann’t. E tɔr njé ke dɔg-gidé-joo nga unde de se ninn de ke njékawkulege. 14Njékawkulege nè nga ri de á nè: Simon ke Jésu ile ri’n nè Pierre se André ngokon’n ke ndêin, Jacques se Jean, Philippe se Barthélemy, 15Matthieu se Thomas, Jacques ngonn le Alphée se Simon ke njèrakɔlé, 16Jude ngonn le Jacques se Judas Iskariot ke tel è njèkunn dè Jésu nga. 17Jésu rise se njékuwe-girnge aw se de kade mbal’t inge’n kutu kos njékuwe-girnge. Kosdoo-bulege in-in dè nang’t le Juda malang se kêm ɓee-bò ke Jérusalem se kêm ɓeege ke tooi tà ba-kate’t, Tyr a, Sidon a tɔ. 18Dooge nè nga reei le kooi tà le Jésu a, le kade ɔr raturge ra de’t a tɔ. Njé ke ndilge ke majelé tooi kêm de’t géa, Jésu aje de a tɔ. 19Nanan géa dann de’t sang le kɔde ra’n lêm tede tɔgmong kaje njératurge tee rann’t aje de malang. 20Loo ke Jésu ɔr kum’n dɔ an njékuwe-girnge ɓaa, è ede de ede nè: – Sei njéndooge, adi ra si nel sei tede Konɓee le Nube è le si! 21Sei ke ɓo tɔl sei ɗarinè nga, ali ra si tede ndɔ ke rang d’a d’ade a i ndanni gɔj-gɔj ɓai! Sei ke i noin se mann non kum si’t ɗarinè nga, ndɔ ke rang a ali ra si ɓai! 22Ke nè á dooge ɔri sei njêt a, dé mbate sei a, dé taje sei a, se d’an sei ke dooge ke majelé tede k’ee ke sei njékuwe-gir’m man ke m’ee Ngonn doo nga ɓaa, adi ra si nel sei! 23I rai ranel kêm ndɔn’t nè nga, ali ra si se kêmnda káng a tɔ, tede nyan-kunde nja si ke bò tò ngine sei danrán. Kà de dé njékɔr sei njêtge nè géa, kété dé ra nyange nè titeke bè se njéribe-dè-tàge ke tà Nube’t tɔ. 24Nè sei njényan kingege a an-in ɓai, tede sei ingei nyange ase sei nák-nák ɗarinè ɓá! 25Sei ke kêm si ndann gɔj-gɔj ɗarinè nga a an-in ɓai, tede ndɔ ke rang ɓo à ra sei ɓai! Sei ke gɔge si nda se kogo ɗarinè nga, a an-in ɓai, tede ndɔ ke rang a i ndii se kumndoo-yo a, a i noin se mann non kum si’t ɓai a tɔ! 26Sei ke dooge malang piti sei nga, a an-in ɓai, tede kà de dége nè géa, ndɔ ke rai titeke bè se njé ke rai ra de ke njéribe-dè-tàge ke tà Nube’t! 27Nè sei ke ɗarinè uri mbi si ooi tàge le’m nga, man m’ede sei ndàt: I tári njébange le si a, i rai maje se njékɔr sei njêtge a tɔ. 28I deji Nube le kade tɔr ndu’n dè njé ke d’ɔr se si a, ɔji tà se’n tede le njé ra se si majelége a tɔ. 29Ke nè á doo karé unde mbɔri karé ɓaa, inye’n ade unde mbɔri ke kêl karé ɓai. Ke nè á doo banmi taa kubu lei ke bòi yul ɓaa, inye’n ade ɔr kubu lei ke kàdi’t tɔ. 30Nanan ke deji nyan ɓaa, ade’n. Ke nè á doo taa nyange lei ɓaa, i deje’n kade tel’n adi gugu lé. 31Nyan ke sei ndigi kade dooge ke rang rai tede le si nga, sei géa, i rai titeke bè tede le de tɔ. 32Ke nè á sei tári njé ke tári sei tá ɓaa, ké i giri kêm si’t titeke è kêmnoje ke ngain á sei rai wa? Tede njé ke ali tà tà Nube’t nga géa rai titeke bè se nan tɔ. 33Ke nè á i rai maje se njé ke rai se si maje tá ɓaa, ké sei giri kêm si’t titeke è kêmnoje ke ngain á sei rai wa? Tede njé ke ali tà tà Nube’t nga géa rai titeke bè se nan tɔ. 34Dooge ke sei giri kêm si’t titeke à teli kuge sei kure tá adi tunei sei nyan nga, ké sei giri kêm si’t titeke è kêmnoje ke ngain á sei rai wa? Tede njé ke ali tà tà Nube’t nga géa tunei nan nyan dann de’t tede le teli kingei gugu ɓai. 35Nè sei ɓaa, i tári njébange le si, i rai de maje, adi dooge tunei sei nyan, nè i giri kêm si’t edi nè: «M’a tel kinge gugu ɓai» lé. Titeke bè á, nyan-kuge dè ji si à ee’n ngain a, a k’eei ngann le Nube ke Njèndi sêm danran’t. Tede Nube ke Njèndi sêm danran’t nga, è njè ra maje se dooge ke geri loo tel ra’n oiyo lé a, è njè ra maje se njékêmyêrge a tɔ. 36I rai kêmkanm titeke bɔ jéi ra’n kêmkanm se dooge bè tɔ. 37Ilei tà dè dooge’t lé ɓaa, Nube à ile tà dè si’t lé tɔ. Uwei dooge se tà lé ɓaa, Nube géa à uwe sei se tà lé tɔ. Adi kêm si tin mbit dè majelége’t le dooge ɓaa, Nube géa à ade kêm’n à tin mbit dè majelége’t le si tɔ. 38Adi dooge nyan ɓaa, Nube géa à ade sei nyan tɔ. Nube à um nyan kêm nyan-kɔje nyan’t le si le korè gam-gam maje a, à mbusu nják-nják kade ribe nang a tɔ. Nyan ke sei ɔjii nyan adi dooge nga, Nube à ɔje’n nyan kade sei tɔ. 39Go’t gugu, Jésu unn nyan-tɔje karé tɔje de ede nè: – Ké njèkumtɔ karé asekum kule kage ji njèkumtɔ madenn’t wa? Ḿ-m̀! Ke nè á njèkumtɔ ule kage ji njèkumtɔ madenn’t ɓaa, ké dé joo mbak d’a nal pater koso kêm bolè’t lé wa? 40Njèndó nyan à ger nyan dum njèndóo’n nyan lé, nè loo ke tɔl ngang nyan ndó le’n mbas ɓita à è tite njèndóo’n nyan ɓai. 41Ké bain á oré kumi dè bum walè ke tò kum ngokoin’t tá nal kade kêmi olé dè maman kage ke tò kumi’t wa? 42Ké asekum kede ngokoin kede nè: «Ngokon’m, inye’m ade m’ɔr walè ke tò kumi’t», nal kade kêmi olé dè maman kage ke tò kumi’t titeke bain wa? I njèkede gos, ɔr maman kage ke tò kumi’t pa ɓita asekum kan loo njai le kɔr’n bum walè ke tò kum ngokoin’t nga ɓai. 43Kage ke sɔl asekum kann se kann’n ke ate lé. Kage ke ate nga asekum kann se kann’n ke sɔl lé tɔ. 44Jè geri kagege se go kann de ke ɔje dè de-dè de. Doo asekum kuje kann koté dè kage-ngarr’t lé a, doo asekum kuje kann nduu dè ngarr-kalè’t lé a tɔ. 45Doo ke ɓengre’n maje ɓaa, à ra nyan ke maje. Doo ke ɓengre’n majelé ɓaa, à ra nyanra ke majelé a tɔ. Nyan ke rusu kêm ɓengre doo njin-njin ɓita al tee tànn’t ɓai. 46Ké bain á sei ɓari man «Ngar, Ngar» se ndɔge malang, nè i rai nyan ke man m’unn ndu’m kade i rai nga lé wa? 47Nanan ke ree ram’t oo tàge le’m ra nyan’n ɓaa, m’a m’ede sei, è tò asenan se: 48Doo karé ke njèkunde kei ke nder bolè ade heb ɗak ɓaa, è um kuberi herge tutu ɓita unde gir kei le’n dè’t dɔ mbeng ɓai. Loo ke ndi ede ndài-ndài ade mann’n ule loo gangang-gangang gir kei’t nè nga. Nè kei nè nga yei lé, tede njèkunde’n unde maje. 49Nè nanan ke oo tàge le’m nal ra nyan’n ɓaa, tò asenan se doo ke unde gir kei dè nyeenger’t anje nder bolè kade heb ɗak. Loo ke ndi ede ndai-ndai ade mann’n ule gangang-gangang gir kei’t nè ɓaa, ke loon’t nè kuwe-kei nè oso tête ɗêk-ɗêk.

will be added

X\